بقلم – أماني موسى
مصطلح اشتهر جدًا بالوقت اللي فات ويمكن كان مثار سخرية وتهكم من بعض الرجال بل الكثيرين منهم.. واللي شافوه مجرد مبالغة من ستات عندها عقد نفسية...
قبل ما نرد ببعض الأسانيد القوية الواقعية على هذه الإفتراءات حابة أشير إلى اني من حوالي يومين بدأت أتابع بشغف غير قليل مسلسل حكايات بنات واللي تنوعت حكايا البنات فيه لكن كلهم اجتمعوا على ذات الشيء.. في الآخر لن يبق لك سوى نفسك بعد الله طبعا .
سترونج اندبندنت ومن كلنا عارفين معناه بس خلينا نقوله تاني ونسمعه لنفسنا واللي حوالينا امرأة قوية مستقلة أي تعتمد على نفسها.. لو فسرنا الأول امرأة هيجي في بالنا حوا بكل ما تملكه من قوة وحنان وجمال داخلي وأنوثة
وعن مصطلح قوية يعني قوية يعني ست اتعلمت تعمل حاجات كتير بنفسها لنفسها وللي حواليها.. ست اتعودت تكون قوية مش بس قوة جسدية لكن قوة نفسية تواجه بيها أعباء ومسؤوليات الحياة وتواجه بيها الأشخاص اللي بيعدوا بيومها و بطريقها الطويل في درب الحياة.
مستقلة يعني اتعودت تشيل مسؤولية نفسها المادية ومسؤولية الملتزمين منها... وبالمناسبة دة مش تعريف للبنت اللي متحوزتش ومن غير راجل لكن كمان للست اللي اتجوزت بس ذكر بالبطاقة وبقت هي راجل وست البيت اللي شايلة كل مسؤولياته والأطفال وتعليمهم و وو وو ودول نماذج كتير حوالينا بالمناسبة المرأة المعيلة تشكل حوالي ... من المجتمع المصري.
السؤال هي ليه الست بقت كدة عزيزي الرجل الساخر المتهكم ؟ ؟ ؟ نقول بصراحة وبساطة بقت كدة عشان حضرتك مكونتش الراجل الحيطة الأمان اللي تتسند عليه في حياتها فاضطرت طواعية بقى أو رغم عنها أنها تعتمد على نفسها بالحياة ولا تنتظر مِنة من أحد.
أحب افاجئك بما بإعتراف مفيش ست حابة تبقى راجل وست في نفس الوقت.. بس لما انت تخليت عن دورك كرجل في الحماية والأمان وغيرهم اضطرت هي تاخد الدورين وتضيف على كاهلها أعباء جديدة .
كم من امرأة خُذلت من رجل حبيب كان أو زوج ولم يبق لها إلا خيارين الأول هو أن تستغرق في أحزانها وخيباتها وتسقط في هوة الحزن والخيار الآخر هو أن تقوم تنتصب قامتها تنفض غبارها وتبدأ من جديد.. تكمل مسيرتها برضا وقناعة أنها قوية وقادرة على مواجهة الحياة والأشخاص والمواقف والتجارب برعاية الله وبعض البشر الملائكة الذين يضعهم الله في طريقها ليعينها على المسير .
