بقلم / ياسر غبريال
هواكِ يا بلد
مش على هوانا
والضهر اللي يوم
انفرد
انحنى تحت
كرباج مولانا
والهم اللي اتفرض
ويا المهانة
طرد العصافير
وجاب الغربان
تعشش حدانا
ومنين يجي الهوا
ومصر بتبات جعانة

=========
هواك يا بلد مجاشي
وجنابه قاعد
ما نتسغناشي
والشعب ماشي
يمشي يروح على فين؟
ميستجراشي
دة الباب مقفول
بسبع قفول
والطريق مخفي
جوا غيطان الفول
وعلى كل مينا
واقف غول
دة حتى الهوا
الهوا
محتاج إذن من مسئول

=========
هواك يا بلد ظالم
ولا مظلوم
بتفرق
يا هوا
ولا معصوم من كلام اللوم
وليه يا هوا
العدل بالقطارة
والظلم بالكوم
دة القبطي اللي بدع الحضارة
ليه صوته
أنين مكتوم

===========
هواك يا بلد متباع
ومتعبي في أزايز
كرامة للي عايز
من حزب العجايز
وبركة للي فايز
بدفع البرايز
ناس بتيع كلاويها
وناس بتبيع البلد
باللي فيها
خد لك إزازة
في زمن اللذاذة
من هوا بلادي
النهاردة الهوا
وبكرة
تراب الوادي

==========
هواك يا بلد
متحني
ومتلون
بلون دمى
ومتكون
من المى و همي
وأنا اللي كنت
على نيلك بغني
(مصر هي أمي)
أتسرق
الغنا منى
إلف سنة نزرع
وغيرنا بيجني

د. ياسر يوسف غبريال
Gobrial.yasser@gmail.com