بقلم :نورا فريد
قيمه وسيما،وهامه عظيمه
اتبدلت أفراحك لسنين دموع وبكا وآهات
وعالم لئيمه،وفقر وغيما
كل اللي إرتبط بيك،سلب من نهر خيرك
خد من بين ايديك، راح وإداه لغيرك
محدش ياحبيتي كان قلبه عليك
محدش جه ف يوم وفكر ايه الل فيك
كل دا وانت عزيزه وصامده......
واقفه زى الجبل قويه وجامده.....
مع انه لو وحده غيرك ...
حصل معاها اللي حصل معاك
كانت خلصت وانتهت م الدنيا يا ملاك
وكان زمانها متقطعه حتت بسكينه بارده
وإتحولت بين أيديهم لقتيل ،لجثه هامده
إمتي هتبطل تنزف جروحك
ويستأصلوا الورم من جوه روحك
وترجعيلي سليمه وطاهره ياملاك
دا انا لما بعدت عنك،دا انا لما بعدت عنك
كان يوم دمارى ،كان يوم هلاكي
امتي هقدر اعيش اعيش تاني معاك
من غير بكا من غير دموع من غير اهات
وترجعيلي زى ما كنت طول عمرك ست البنات
كل البنات بقت حلوة ومتزينه
وانتي اللي فيهم عجزتي
وبان عليك تجاعيد الهم والضنا
وبعد ما كانوا بيخدموا عليك
وبيوسوا ايديكي وكمان تراب رجليك
بقوا بيعايروك باي منحه
او هديه يدوهالك م السنه للسنه ...
صحيح السوس فيك وصل للعظام
والشباب طار منك بسرعه زى الحمام
بس انا برضه لسه عندى امل...
ييجي يوم نبتدي فيه العمل ...
يوم يجرى فيه الشباب ١٠٠ خطوة للأمام
علشان يغزلولك بسواعدهم اجمل فستان
وترجعيلي يا حبيبتي يا ست البنات
من غير بكا من غير دموع ،من غير آهات
واحس وانا وياك انى انسان
إنى بشر انى حر ،وعايش بأمان
ويعيش ولادنا من غير خوف .من غير اهانه،من غير ذل
تخضر معاك الحياه وفرحتنا تبدأ من بعيد تطل
وترجعيلي يا حبيبتي يا ست البنات
من غير بكا ،من غير دموع من غير اهات
