أثارت الفنانة سارة نخلة جدلا كبيرا على مواقع التواصل الاجتماعي بعدما بعثت من خلال حسابها على فيسبوك رسالة لزوجها أحمد عبد الله محمود، الذي تسعى للطلاق منه كما رفعت أكثر من دعوى قضائية تتهمه بالاستيلاء على أموالها.
وكتبت :" بمناسبة رمضان، وأنا سنجل بعد 4 سنوات وكام شهر زواج، انتهت بكامل إرادتي، بتمناله ربنا يوفقه ويسعده وبرضو مهما كان، ومهما حصل، ومهما كنت متضايقة عشان الحوار طول، وما انتهاش بهدوء، وعشان لسة مش راضي يطلق لغاية النهاردة، بس العشرة والعيش والملح بتخليني اتمناله كل خير في حياته، ربنا يعوضه ويبعتله بنت تانية تقدر تسعده وتهنيه وتشيله على دماغها، وتبقى أحسن مني كمان".
وأضافت :"عشنا أيام صعبة وحلوة ومتعبة ضحكنا وبكينا فحضن بعض، ابتدينا من الصفر، وأقل أحيانًا كتير عدت علينا أيام مش سهلة خالص، انكسرنا مع بعض ووقفنا تاني مع بعض، عشنا أيام نجاح وصعود حلوة، عمرها ما تتنسي والحمدلله بشهادة الدنيا كلها وبشهادته برضو، كان وشي حلو عليه، و قدمي كان قدم خير، ويارب يفضل الخير مرافق دربه، بعد ما أنا مشيت ولآخر العمر، حاولت أعدي كتير عشان المركب تمشي بس ربنا كاتب أن المركب توقف في نفس اليوم اللي اتقابلنا فيه بعد 4 سنين بالظبط باليوم وبالدقيقة، أنا مش هتكلم تاني في حياتي الشخصية أبدًا، وحبيت يكون دا آخر بوست في الموضوع دا".
وتابعت :"أنا ماشية في قضية الطلاق وقريبًا الموضوع يخلص إن شاء الله، إحنا بنتقابل في أي لوكيشن عادي إحنا في الآخر زملاء وأصدقاء قبل ما نكون زوجين في يوم من الأيام، لكن له كل الاحترام أنا وهو ما اتفقناش وبس، وكل حاجة قسمة ونصيب، لأول مرة هفطر لوحدي وأجهز الفطار لنفسي، واتفرج على شغلي، عندنا أجازة يوم واحد وهنكمل تصوير في رمضان، أكيد في غصة أني بعيدة عن أهلي بشتغل وبعافر بس أنهم فخورين بيا، وفرحتهم بس يشوفوا اسمي على التلفزيون، أكتر حاجة بتفرحني وبتنسيني التعب وكل سنة وانتو طيبين يارب، ويارب المسلسل يعجبكو ودوري يعجبكو".
