بقلم - مايكل دانيال
ياريت كل واحد/ واحدة داخلين علي إرتباط يشوفوا الكلام ده :)
فاكرين قصة السمكة و القلاية؟
اختصار القصة ان واحدة كل لما تيجي تقلي سمكه تقطع رأسها و ذيلها، فبنتها اتعلمت ده منها و لما البنت دي اتجوزت و عملت السمك كدة جوزها استغرب و قالها امي مش بتعمل السمك كدة!
البنت سألت امها قالت لها اتعلمت ده من امي، فالبنت سألت جدتها فقالتلها ده كان انسب حل بالنسبالي لان الطاسة عندي صغيرة !!
نفس الكلام بيحصل نفسياً بطريقة لاشعورية، لما بتكون حاكم جواك ان مواصفاتك للعريس/ العروسة، لازم تبقي دكتور او مهندس و مستواه كذا و عنده كذا و كذا او مستوي جمالها بالشكل الفلاني و باباها كذا و عائلتها بالشكل الفلاني
ده غالباً مش بتاعك انت لكن بتاع ناس تاني زي باباك / مامتك.... او قرايبك، و اترمي جواك من كلام زي ".. ما تاخديش واحد اقل من جوز بنت خالتك"، "انت مش اقل من اخوك اللي متجوز صيدلانية و حلوة" .... او ان احسن مؤهل هو الطب او الهندسة علشان بيكسبوا كويس و هكذا :/
الكلام ده نوع من توريث سيناريو نفسي للأجيال اللي جايه (Trans generation scenario) بمعني ان والدك / والدتك شايفين ان دي انسب عروسة ليك كواجهه إجتماعية أو ان ده أفضل مؤهل ممكن تشتغل و تجيب فلوس و تساعدك، و غالبا ورا ده طرف منهم كان نفسه يرتبط بواحد/ واحدة زي كدة و بالنسباله ان ده حل لمشاكل كتير اتعرض ليها و عاوز يجنبك التعرض لنفس المشاكل بالحل ده، لان هو بيفكر انه لو كان اتجوز دكتورة مثلا ماكانش هايبقي فيه المشاكل دي او لأن باباه (اللي هو جدك) كان شايف ان الطب احسن وظيفة و رمي ده جوه باباك اللي شايف ان ده الأفضل من حتته و بناء علي اللي اتعلمه من باباه!
و من هنا - و علشان الاسباب اللي فوق و اللي اترمت جواك غصب عنك - بتبدأ تدور علي المواصفات اللي انت متصور انها بتاعتك و انها اللي هاتريحك في حياتك، بس الحقيقه ان ده المناسب لإهلك مش ليك، و اللي برضة لازم تعرف انهم مش دايمين و انك غالبا كدة ممكن تلبس في الحيط
لإنه ببساطة بعد الجواز هايتقفل عليكم باب واحد و مفيش حد ها يعيش معاكم و هنا مش هايفرق ساعتها مؤهلها او اهلها لكن اللي بجد هايفرق هي مين و انت راحتك معاها ولا لأ
مش معني كدة انك تقبل اي مواصفات لكن لو انت / أنتِ عاوزين تتجوزوا و تعيشوا صح يبقي الاول نعرف ايه اللي جوانا بتاعنا و ايه اللي مش بتاعنا و نراجع نفسنا كويس و نشوف احنا عاوزين ايه قبل ما نروح ندوّر علي واجهه حلوة من برة و جواها متعب لينا
