سائق الجرار: كل عمل له أخطاءه.. أنا شديت الجرار عكس ونزلت اتخانق.. هو أنا كنت اعرف أنه هيمشي ومحمل 3 سرعات؟

-    عقب إفلات الجرار روحت البيت وكنت هاجي تاني يوم الشغل.

كتبت – أماني موسى
قال سائق الجرار صاحب حادثة قطار محطة مصر، أنه يعمل في السكة الحديد منذ نحو 25 سنة، وأنه خريج دبلوم صنايع، ويسكن إيجار متنقل في عدة أماكن، ويعيش الآن في المنوفية ويأتي يوميًا لعمله.

وأضاف في لقاءه مع الإعلامي وائل الإبراشي، ببرنامج "كل يوم" المقدم عبر شاشة ON E، "أنا باخد القرار والبرج بيتصل بيا، بروح أجيب العربيات أنزلها الورشة يتعمل لها صيانة وكدة".

موضحًا أنه لا يسوق قطارات، وتابع: "أنا لا أسوق قطار لمسافات، والجرارات دي حضرتك فيها نسبة بوظان، هاتوا حج فني يشوفها تصلح ولا لأ".

كل عمل له أخطاء
واستطرد، "اللي حصل أنا أخدت العربيات اللي على رصيف 9 ونزلت الورشة وفي واحد في الورشة بيفور الجرار، يعني بيفصل الجرار عن العربيات، وبيرجعني بقى من سكة تاني، أجي يا إما أخد حاجة تاني أنزلها المحطة، أو أجيب حاجة من المحطة أرجعها للورشة، وأثناء ما أنا نازل في حتة متقاطعة والسكة اللي جنبينا جه جرار تاني خبط فيّ".

وتابع "أن الكابينة ممنوع تتحرك من غير سواق وعطشجي، لكن هي شغالة بواحد بس، يعني لو هو في واحد تاني معاه كان نبهه وكانت منعت الحادثة ومكنش خبط فيّ، وبعدين هو في خطأ مني أه، بس طبيعة عملي وكل عمل له أخطاء".

السائق يقول لا أحد مع السائق الآخر ويعود ليقول كان معاه عامل
وممكن يكون هو مخدش باله، وأنا لقيته فجأة، وفي عامل معاه برضه، هو شايف أن أنا غلطان وأنا شايف أن هو غلطان، وأنا نزلت زعقت له لما هو خبط فيا، وحصلت مشادة بيننا، وأنا معرفش الجرار مشي إزاي.

شديت الجرار عكس ونزلت اتخانق والجرار جري بسرعة للمحطة لأنه بايظ
مضيفًا، أنا كنت في قلب الجرار ولما اتخبطت شديت العكس، وهو جري لأنه مش في وضعه الطبيعي ومحتاج صيانة، وأنا لقيت الجرار بينطلق بسرعة كبيرة لقدام ودخل المحطة.

السائق: هو أنا كنت اعرف أنه هيمشي أو أنه محمل 3 سرعات؟
وأضاف، لو عاد بي الزمن كنت سأوقف الجرار، لكن زعلي وأني زعقت له هو اللي خلاني أعمل كدة، وبعدها أنا مصدوم الوضع كان صعب يعني.
واستطرد، هو أنا كنت عرف أنه هيمشي؟ أنا لو أعرف كنت وقفته، متخيلتش أنه هيمشي أو محمل تلات سرعات.

عقب إفلات الجرار روحت البيت
موضحًا أنه عقب سير الجرار ذهب إلى منزله عادي، وتاني يوم كان هيجي الشغل، ومكنتش متوقع أنه هيحصل كل دة.

وتابع، هو في حد عايز يعمل حادثة؟ دي خطأ بس، ومشكلتي أن غلطتي بكارثة بس هو دة ذنبي؟ والخطأ مش مني بس، الجرار عشان يمشي شوفوا السواق والميكانيكي والمهندس، وهاتوا لجنة فنية تشوف الجرارات ينفع تشتغل ولا لأ.