الرئيس: "اللي باقي من الإصلاح الاقتصادي قليل ومش أقسى من اللي فات"

كتبت – أماني موسى
قال الرئيس عبد الفتاح السيسي، خلال كلمته في الاحتفال بعيد الشرطة الـ67، متحدثًا عن برنامج الإصلاح الاقتصادي: "هنا لازم أحيي كل المصريين، هذا البرنامج كان شديد القسوة، حيث كان من المطلوب معالجة حاسمة وعميقة للتحديات والظروف، التي أدت لوصول الاقتصاد المصري للحالة التي كان عليها".
وأضاف، كان السؤال: يا ترى هنستمر كدة ولا نتخذ هذا البرنامج الموضوع من قبل خبراء متخصصين، لما جينا نرفع سعر الصرف من 8 جنيه للدولار لأكثر من ذلك بكثير كان ليه تأثير ضاغط على المصريين، ولكن على الرغم من قسوة الظروف الصعبة دي، كان هو ده العلاج الحاسم والناجع لتجاوز التحدي بشكل علمي وواقعي، ومكانش في مسار تاني، والطريق التاني كان طريق الضياع لدولة بمقدراتها لأن الاقتصاد جزء كبير وأساسي جدًا في العالم كله، لأن الاقتصاد معناه قدرة، والقدرة يعني شعب يقدر يعيش، والدول كلها بتشتغل على ده".

وأضاف الرئيس، "أقدر أقول أن إحنا عبرنا مرحلة صعبة وماشيين في طريقنا، واللي تبقى في هذا الأمر مش كتير أوي ولن يكون أقسى مما كنا فيه، وإحنا مصرين على إننا نخلصه، ومش بنخلصه لينا، بنخلصه للشباب والأجيال القادمة، والمؤشرات الموجودة بشهادة كل العالم بتقول إننا ماشيين بنفس الهمة والإصرار القوة علشان نحقق كل اللي بنتمناه لبلدنا، وربنا يوفقنا وينجحنا، اللي جاي واللي فات نجاحنا فيه بالمصريين مش بحد تاني".