قانون منع التمييز "الـمُوزجـنـسي"

بقلم: مايكل فارس
شعبي العزيز الطيب المهدود، أنا شايف أنه كان في "مصر" تمييز واضح موووووووت على أساس الجنس والعرق والدين، بالرغم من وجود قوانين بتؤكِّد المساواة بين الجميع، وكان الهتاف في الثورة مسلم ومسيحي كلنا مصرررررررين.

بس انا شايف ياشباب مصر ورجالتها  وضهرها اللي بيحميها  ورجلها اللي بتمشي عليها وودانها  اللي بتسمع بيها ومراخينها اللي بتنف بيها  ( و....و.....كفاية كده)  ان التمييز لازال قائم في جزء حساس جدا ومحدش اتكلم فية بتاااااااااااااتا

علشان كده.. أولًا هنغيَّر شعار "مسلم ومسيحي كلنا مصريين" وهخليه "مُزة مش مُزة.. كلهن مصرياااات"، وده هيكون شعار منع التمييز الموزجنسي.

ثانيًا: تفسير كلمة "المُزجنسي" هي كلمة من شقيين؛ الأولى هي "مُزة" كناية عن مزازة البنت، والشق الثاني "جنسي" كناية برضة عن البنت بما أنها الجنس الناعم.. وإحنا طبعًا الجنس الخشن المعفن.

تعليق على أولًا وثانيًا: يا شباب "مصر"، لماذا تفرِّق بين المصريات؟ فكلهن مصريات، سواء كانت مزة أو غير مزة (وحشة يعني). فالشاب المصري الأصيل لابد وأن يعاكس فتيات بلده بلا أدنى تمييز.. فجميعنا يعلم أن التمييز على أساس الجنس هو تخلف، لذا فبعد ثورتنا المباركة لن يكون هناك تمييز بعد اليوم.

يا شباب "مصر"، أريد أن أسمع هتافاتكم تجلجل ميدان "التحرير" وكل ميادين "مصر"، وأسمع بأم أذني صوتكم وأنتم تطالبون بقانون منع التمييز الموزجنسي، وتصرخون قائليين: "مزة.. مش مزة.. كلهن مصريات"!!

م الآخر كده.. يا شباب، راعوا مشاعر كل المصريات. مش معقول الضغط كله على المزز بس وباقي البنات تبص وتزعل ولاحد يعبرها. ده هيأثر بالسلب على مجتمعنا. علشان كده لازم توزَّعوا الضغط شوية بالتساوي على كل البنات علشان ما يكونش نص البنات عندها نقص؛ لأن "الشاب مش بس بمعاكسته.. الشاب بنظرته للبنت بحكمته".. الحكمة يا شباب حتى لو عاكست البنت إللي مش مزة على أساس إنك هتاخد ثواب، ومالو خد ثواب، أنت خسران حاجة؟!!

القرار: سيتم تطبيق قانون "منع التمييز الموزجنسي" بكل أنحاء "جمهورية مصر العربية"، وفي حال مخالفة أي شاب للقانون، من حق الفتاة التي تعرَّضت للتميز التقدُّم ببلاغ لقسم الشرطة، وعمل محضر للتحقيق مع ذلك الشاب، وستكون العقوبة غرامة فورية خمسة آلاف جنيه كبداية، وفي حال ثبوت مخالفته للقانون مرة أخرى سيتم حبسه خمس سنوات.