بلاى ستيشن

متهيألى لو يوسف بك وهبى عايش فى أيامنا دى كان هيقول ما الدنيا إلا...... ؟ لأ مش مسرح كبير طبعاً دى بلاى ستيشن كبير

 

أه بجد يا صاحبى لأنى كتير بتخيل إننا عايشين جوه game زى اللى بنلعبه سوا يعنى بنبدأ الحياة وإحنا مش عارفين حاجه وبعدين ناخد شوية وقت عقبال ما نستوعب إحنا فين وبنعمل ايه؟ وإيه اللى لازم نعمله وإيه اللى مينفعش وإيه اللى صح وإيه اللى عيب؟؟؟

 

ونكتشف إننا المفروض نواجه صعاب وتحديات كتير ونتفادى حُفر ومطبات أكتر عشان نكسب ونوصل للنهاية

 

وكل ما نجتاز حاجه صعبة ناخد شوية score لزوم التحفيز ولأننا لسه بنلعب جديد بنقع ونخسر ونفتكر أن ال game خلص إنما نلاقيه بيدينا فرصة جديدة نحاول مرة تانية

 

وبعد كام إعاده نبقى حفظنا ال level وبقى عندنا خبرة فيه فنعديه بسهوله ونكسب ونفرح طبعاً لكن بندخل فوراً على اللى بعده وبنكتشف إن الصعاب والتحديات اللى بتتضاف ليه أكتر من اللى قبله

 

وبعد ما كانت المهمة إننا نجتاز شوية صعاب نلاقى حاجات بتتحدف علينا من ناس من مواقف من ظروف من عادات ومفاهيم غبية من أنانية وكراهية من إدانة وإهانة من ومن ومن .... وطبعاً بنفهم إن الحاجات اللى بتتحدف علينا دى لازم نتفاداها وإلا نموت ونخسر روح من الأرواح الإضافية اللى موجودة

 

بس الفرق بقه بين اللعب والحياة أن فى اللعب لما بنخسر كل حاجه ويتكتب لنا game over ممكن ندوس ونلعب game جديد وممكن نقفل اللعبة خالص

 

إنما فى الحياة معندناش رفاهية الاختيار بنلاقى ال game بدأ لوحده تانى لأن طول ما لسه فيك حياة هتلعب وتكمل وتعدى level ورا التانى

 

وبما إننا فى الواقع عندنا روح واحدة بس وتنتهى مرة واحدة وملهاش تجديد على الأرض فموضوع الأرواح الإضافية اللى فى ال game ده يا صاحبى بحس انها الطاقة بتاعتنا يعنى ممكن طاقتنا تخلص ونجددها ونكمل من جديد لكن ساعات ييجى وقت نلاقيهم خلصوا كلهم ونلاقينا وصلنا مع ناس أو مواقف أو أماكن أو.... لل game over العبارة اللى معناها ياااااااه خساره

 

فى الوقت ده بيسود الصمت مع شوية حيرة مفيش مانع من حبة وجع مع حسرة مع لوم ذات على شوية أسئلة زى ليه كده؟ وعشان ايه؟ ويجرى ايه لو؟ وهو فيه إيه؟ وهم بيعملوا كده ليه ؟؟؟ وأسئلة غيرها كتير أوى

 

ورغم كل الزحمة دى نلاقى اللى اتعلم يقاوح وعدى كل اللى فات بيلملم اشلاء مشاعره وأفكاره وطموحه وحلمه ويسعى يجدد طاقته عشان يبدأ ال game الجديد

 

الطاقة دي بقه بتتجد بشوية حاجات كتيرة مع بعضها يعنى بصلاة بمراجعة نفس بتغيير قناعات بتجديد ذهن بنضج وفهم أعمق للناس والدنيا بتنمية وتطوير شوية مواهب أو مميزات جوه الواحد

 

ولكن عارف بقه رغم كل ده يا صاحبى نصيحتى ليك إن مهما وقعت فى ال game ومهما زمن الواقعة طال خليك واثق انك هتجدد طاقتك وهتكمل وهتوصل بمعونة ربنا اللى دايما ساندك لحد ما يتكتب لك you win اصل ربنا مش هيكتب لك game over لأن النهاية معاه مفيهاش خسارة

 

وساعتها يبقى مشوارك الطويل الصعب ده هو نفسه خبرة بتسيبها لغيرك وأثار خطواتك يمشوا وراها عشان يكملوا مشوارهم لأنك كنت مختبِر أوجاع وقاوحت ووصلت

 

وأهم حاجة بقه إوعاااااك يابنى تستغرب من الناس اللى حواليك فى ال game لأنك هتلاقى ناس ملهية فى لعبها وشكاية ومتذمرة وناس فى عز مقاوحتها بتشكر وشايفة ربنا ساندها وعندها ثقة أن كله هيعدى وناس رغم وجعها لما تشوف غيرها واقع بتسنده وتفرح اوى لما يقوموا ويكملوا سوا وناس بتزُق غيرها وتتأمر عليه وتوقعه عشان تعدى هى

وناس وناس وناس وبرضو بكررهالك مستغربش

 

وعموماً يا صاحبى منور واهلا بيك ومن كل قلبى بتمنى لك التوفيق معانا فى الدنيا الكبيرة لا قصدى المسرح يوووووه البلاى ستيشن