بقلم: نشأت عدلي

لسة

بحبك بجد

صدقيني لسه بحبك

برغم قسوتك عليا

ورغم بعدك وجفاكي .. بحبك

ولسه القلب بيدق لحبك

ظلمتيني وقتلتيني وعايزة تطرديني

وبرضة بحبك

يمكن علشان مولود على أرضك بحبك

ولا علشان فديت ترابك بقيت بحبك

بقيت حتة منك وانتى برضه حتة مني

مانا ابنك .. وانتي امي وبنتي وابني

حتي لما هنتي إسمي وعرضي وشرفي

مقدرتش أسيبك أو حتي أبعد عنك

عايش وحاعيش فيكي وجواكي

حتي لو مت .. حاموت فيكي وعليكي

لاني والله بحبك

لسة النسمة بتاعتك بتسحرني

لسه هواكي معيشني وينعشني

كل طلة صبح شمسك تنورني

ومع كل غروب .. امل في شروقك

اعمل ايه ؟؟؟ مانا مفتون بيكي

اصلي مجنون .. وبحبك بجنون

بحبك نيلك ودفاكي

بحب عمري اللى عشتة فيكي

وبحب قلبي اللي عايش بيكي

مش هاين عليا اسيبك واهاجر

ولا هاين عليا حتي اسافر

تصدقي بقيت احب حتي جفاكي

ويوم مااذهق منك ابص لسماكي

صعبان عليا قوي قسوتك علينا

وانتي شايفة اللى بيحصل لينا

قتل وضرب وحرق فينا

بس في الاخر كلة لينا

وعمرك ماتهوني علينا

حتي لو فكرتي فى يوم ترمينا

و لوقسيتي ..برضة جوايا مسامحك .

وعلي طول حا افضل اسامحك

لو زرعتي شوك في أرضي

أو شلتي نجمة سمايا

حيبقي برضة فيه نور على أرضك

وقمر ينور .. وشمس وضلاية

وقلب يصلي لك في محراب و قلاية

يمكن وانا بصلي ليكي تقتليني

أو تحرقيني وتغرقيني

وبرغم كل ده ياحبيبتي

برضة لسه بحبك

بحب فيكي الصبية الجميلة

ام عيون سحراني

اللى يوم ما اعطش

الاقي مية نيلها روايني

بحبك .. صدقيني لسه بحبك

يا مــــــــــــــــــــــصر