بقلم: مهندس عزمي إبراهيم

أنكل ساويرس ليه تعتــَذِر؟
سواء تعتــَذِر
أو لا تعتــَـذِر
دي قنبـلة وبتنفجـِر
***
الميكي ماوس اِبن امريـكا
فـار بـريء
من غير لـَوَع ولا تشكيكه
فيـه فـن وعلـم
صورة ومازيكا
تاريخه طويـل
مالهوش في الديـن
لا في القرآن ولا في الإنجيل
بَـدَعه "ديزني" أبو الإبـداع
وعمـَل منه فنـون أنـواع
وزنه وخفيـف
ودمـُّـه خفيـف
فـَرَّح مش بس الأطفــال
فـَرَّح حتى نساء ورجال
وشهر إسمه في كل الكون
وصار محبوب منين ما يكون
حَبـُّه ياباني ودرزي وصيني
وحَبـُّه أفريقي وحَبـُّه لاتيـني
والمسلم وابناء صهيون
واللي ما حَبـُّـه
أكيــد مجنــون
***
من سنتـين
دعاة الدين
أصدروا فتــوى.. كأنها لعبة
ودي مش نكتة ولا هي كِذبه
وروحوا اسألوا رجال الديـن
نـاس فاضيين!!
هاجوا وماجوا وقادوا حريـق
أهـْدروا دمـُّـه وقالـوا زنديـق
قول على مين؟؟
على ميكي ماوس المسكين
بعدين عفـوا عنـُّه
قـال سامحوه!
أقـول الحــق؟
غصباً عن أنفـهم قـَبَـلوه
***
بعد شوية
بالظبط في 2008
أيوه في عام ألفين وتمانية
الميكي ماوس اِبن امريكا
هـَلّ هِـلالـه في السعودية
خــده فنــان "مسـلم"
وسعـودي
لا هوّا مسيحي ولا هوّا يهودي
لـَبِّسُه من الديــــن أثـواب
أطهر برقع وأنقى ونقاب
عجب الناس في السعودية
في كل الشرق
حتى في مصر أم الدنيا
نشروا له وفتحـوا له البـاب
وأعجـَب بيه شيوخ وشباب
لا مفــتي هـاج
ولا شيـخ مـاج
***
جيت يا ساويرس
وانـت القبـطي
إزاي تغلـط.. وازاي تـُخطي
جيت وأخدته زي ما هـُوّا من السعودية
لابس البرقـُع والجلابية
بنفس المنظر بنفس "الـ "لــوك"
وحطيته في "الفيـس بــوك"
قاموا عليك
دِبـَّان السياسة الخايبين
ومعـاهم دُعـاة الديـن
بكل شهامه
وهمـَّـا يامه
اللي هـاج
واللي مـاج
وبحر الحقـد فاض أمواج
***
فلا انت غلـِطت في أي كتـاب
ولا خربشـت في حـُرمة ديـن
ناس فاضيين
ناس لا بتبـدع، ناس لا بتصنع
ولا حتي بتنتـج شيء أو تزرع
نـاس.. في الهايفـات ماسكين
سابوا حضارة وسابوا حرية
ومش فاهمين معـنى المدنـية
وبيمضغوا لبـانة الديــن
رافعين في ايديهم سكاكين
يدبحـــــوا مين
ويكـَفـَّـروا مين
ليه ما هاجوش ألفيـن وتمانية
ليه ماهاجوش على السعـودية
***
التمييز واضح كالشمس
رح اقولهالك من غير همس
دي ألاعيــب سيــاسة ودَس
من أحزاب مش قادرة تنافسك
خليــك انـت واثـــق من نفسك
***
لازم تعــرف
أنـَّـك جبـَـل
أنـَّـك جمـَـل
أعمالك من أشرف عمــل
وانت أشرف راجل مصري
وانت حضاري ومدني وعصري
مهما اتقــال ومهما اتعمل
أما حكايـة التلكيـكه
الميكي ماوس.. اِبن امريكا
حكاية طالعـة من الفابريكه
***
مادام خطـِّيت في البلوتيـكا
وبقيت وردة
في سَـبـَت شيكابيـكا
يا ما حتشبع من دا يا ويـكا
زِد على ذلك انك قبطي
يا ريت تقدر تقرا خطي
حيطلع غيرها ميـت تلكيـكه
***
لكن قـول لي، وانـت نبيــه
وانـت تاريخك قبطي نزيـه
مين المفروض كان يعتـَـذِر؟
***
أنكل ساويرس ليــه تعتـَـذِر؟
سـواء تعتـَـذِر
أو لا تعتــَـذِر
دي بالــُّونه وبتنفجـِر

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :