بقلم: أماني موسى
زي ما أنتوا عارفين إن الجواب بيبان من عنوانه، بس دة كان زمان ، دلوقتي الجواب بيبان من اللي بين السطور مش من عنوانه بس، وبالعنوان دة هيتقسم المصريين فريقين، فريق هيشجعني ويهلل وفريق أقل ما فيها هيسب لي الديك... لكن أنا هقول رأيي بحيادية من غير ما ألزم حد بيه، وعليه لا حد يشتم ولا حد يسقف لكن نفكر ونختلف بهدوء.
صلي ع النبي وكل من له نبي يصلي عليه، الرئيس المخلوع مبارك تمت محاكمته أول أمس، وعلى فكرة ملحوظة مهمة جدًا: خلونا نتفق على المسمى الحقيقي مش المجازي وهو أنه رئيس مخلوع بحكم أنه موظف عام في الدولة ومش بابا ولا جدو ولا حتى خالتو.
وفي محاكمته أستاءوا أصحاب القلوب الرحيمة واللي قلبهم قلب خساية من شكله وكالوا الاتهامات والشتايم للمصريين اللي بقيوا أشرار وفقدوا إنسانيتهم ورحمتهم وإزاي يعاملوا باباهم كدة!!

تعالوا نبدأ بالرد على بعض الأسباب الوجيهة اللي قالوها أصحاب القلوب الرحيمة:
1– أنه بابانا: لازم نفرق بين مشاعرنا الإنسانية وبين الواقع، الواقع بيقول أن موظف عام بالدولة تسلم مسئولية قيادة البلاد وعليه أنه يقدم كشف حساب ويتم مكافأته لما ينجز ومعاقبته لما يقصر.
مسألة أنه بابانا مشكوك فيها لأن مفيش حد فينا هيورث سحتوت من ملياراته وعقاراته وألماظاته!!
إلى جانب بقى أنه مفيش أب بيسم أجساد عياله بأغذية مسرطنة مثلاً ولا بيقتلهم عشان أعترض معاهم في رأي!!
شيفاك طلعت وعمال تقول: مهو قال إنه مش مسئول عن إطلاق النار أو قتل المتظاهرين، ماشي موافقاك وإحنا عالم كدابة ومفترية... لما هو والعادلي وكلهم يقولوا إحنا لم نصدر أوامر بإطلاق نار على الشباب اللي زي الفل دول ، يبقى الرصاص خرج لوحده لا مؤاخذة!!! بما إنه رصاص ذكي تابع للحكومة الذكية؟!
خد عندك دي كمان: لو هو بالفعل بريء ولم يصدر أوامر بالقتل، طيب ليه ما أصدرش أوامر بوقف إطلاق النار على المتظاهرين؟ وليه مستجابش لمطالب الناس لكنه طلع يعزيهم على طريقة "اقتل القتيل وأمشي وصوت في جنازته"!!
إذًا مبارك مسئول بشكل أو بأخر وغير معفي من المسئولية، لأنه لو عارف وسكت ومقدرش يوقف المهزلة يبقى مذنب ولو مش عارف هتبقى مصيبة أكبر (عذر أقبح من ذنب).

2- ارحموا عزيز قوم ذل: مبارك مُنح العديد من الفرص طيلة 3 عقود، ولكنه سعى بكل ما يملك من قوة لإفساد مصر ونهبها واعتبارها عزبة السيد الوالد، ولم يرحم المصريين بل تلذذ بألمهم.
ويا أحبائي الرحمة شيء إنساني جميل ومطلوب لكنها لا تتنافى مع العدل الإلهي بل مكملة له ، وإلا كان مصير كل البشر الجنة والنعيم والقاتل مع المقتول والجاني مع المجني عليه، وتبقى مهلبية، وساعتها الله يقدم استقالته لما رحمته تنفي عدله.... يا سادة اقرأوا ما تشاءوا من الكتب السماوية ستجدوا إن الله كما هو رحيم فهو عادل.

في الكتاب المقدس: مبرئ المذنب ومذنب البريء كلاهما مكرهة الرب.
وأيضًا: لي النقمة أنا أجازي يقول السيد الرب.
وفي القرآن الكريم: "ولكم في القصاص حياة يا أولي الألباب لعلكم تتقون، واخد بالك من تتقون دي؟!
إذًا عدل الله يأخذ مجراه بعد فترة من الرحمة، والعدل والرحمة من صفاته جل جلاله.
عزيزي المصري: معروف عنك طيبتك وكرمك لكن متضيفش عليها بلهك وسذاجتك وتبقى سادي بتبوس جزمة جلادك.
انظر لمرآتك ودقق بملامح وجهك... شوف علامات السنين والفقر والمرض وقارن بينها وبين وجه مبارك وأولاده اللي بينضح نضارة وحيوية.
مبارك الرئيس الطيب الجميل ليه ميتعالجش في مستشفى حكومي من اللي عملهم لك يا غلبان؟ ليه مياكلش أكلك المسرطن واللي مليان بمية المجاري؟ ليه وليه.....



وأخيرًا أحب أختم ببعض إنجازات مبارك اللي تستدعي إننا فعلاً نبكي عليه وأعتقد إن إنجازاته دي طالت كل بيت مصري:
1- المساواة والعدل حيث الجوع والمرض والفقر يحاصر كل بيت مصري.
2- غرق شباب مصر في قوارب الموت بحثًا عن فرصة عمل وحياة على سواحل إيطاليا وليبيا وغيرها.
3- البطالة منتشرة في ربوع المحروسة ما شاء الله، وتعليم ناجح وخريجين ميعرفوش أي حاجة عن متطلبات سوق العمل.
4- أمن الدولة وأقسام الشرطة وفنون إهانة البشر داخلها.
5- سكان المقابر والعشوائيات وهو متنعم في قصور مكيفة.
6- أطفال الشوارع اللي بقيوا علامة من علامات مصر الحضارية.
7- الفقر المدقع للدرجة اللي بقى فيها مصري بيدور على أكله وسط صندوق الزبالة.
8- طوابير العيش والغاز اللي مات فيها ناس في عهده.
9- طوابير الموت اللي انتظرت المصريين في العبارات وتحت صخور الدويقة وغيرها.
10- طوابير الموت اللي انتظرت المصريين في حرق وتفجير كنايس واللعب بورقة الأقباط والفتنة الطائفية من غير أي عقاب لواحد بس من الجناة.

11- المواطن الغلبان الربع كم اللي أجره 160 جنيه وصاحب عيلة والشلة بتاعتك اللي بياخدوا مئات الالآف شهريًا.
12- السرطانات والكبد الوبائي اللي هلك أجساد المصريين وساب في كل بيت مصاب أو متوفي، وللا القمح المسرطن واللحوم الفاسدة والمواد المنتهية الصلاحية، حتى الميه شربتنا مية المجاري لحد ما انتشر فينا السرطان والفشل الكلوي وكل الأمراض.
13- وبعد سيرة الأمراض مش هفكرك بالمستشفيات الغير آدمية وأنت لو صوباعك وجعك تسافر ألمانيا، أما المصري يمرض وييفضل يتألم لغاية ما يجيله قضاه.
14- شلة تنابلة السلطان نهبت البلد لأخر قطرة واحتكار الحديد، دة غير اللي ربنا كرمهم وهربوا باللي سرقوه.
15- الإعلام اللطيف اللي غيب عقول الملايين ولجاؤا للإعلام الديني المتطرف اللي بيحرض ضد أي آخر.
16- الزبالة والمجاري واللي بيها بقى المصري بيعيش مع الحشرات والفيروسات في آلفة وتآخي جنبًا إلى جنب.
17- عهد مبارك هو عهد الحريات واللي يتكلم كان بيبقى مصيره في دهاليز أمن الدولة، دة غير الشرف والنزاهة في الانتخابات اللي كان عنوانها اخترناه اخترناه.
18- في عهده بقت مصر من أكتر دول العالم نسبة أمية وناس عايشة تحت خط الفقر، بلد 45% من أهلها عندهم أمية قراية وكتابة (مصيبة سودا منقطة بأزرق).

19- وفي عهده أتطور مجال البحث العلمي، وهاجر العلماء للخارج، وخرجت الجامعات المصرية من التصنيف الدولي لأفضل الجامعات.
20- كان برضه ضمن خطة المساواة والعدالة في عهده ، إهدار كرامة المصري جوة وبرة وأصبح المصري مسخة العالم.
21- من الأخر كدة مبارك تآمر على مصر والمصريين ومسلم بلد خربانة غرقانة في الديون والفساد للذمم والأخلاق والمناصب وعقول فاضية وقلوب مليانة بكراهية الآخر ودين محشور في كل حاجة في الحياة ورجال دين تلاعبوا بدماغ المصريين مستغلين فراغها التام.

نصيحة هامة: لتتخلص من حالة التعاطف اللحظي مع المذنب أنظر لأم فقدت ابنها أو وحيدها بطلقات رصاص غادر أو سرطان غير مسبب أو بتعذيب جوة سجن ولا قسم شرطة، وساعتها هتشعر أن عدل الله يأخذ مجراه.