ثورة على الكراكيب (قبلة الفيشاوي ..)

حضنها بدراعه وباسها أدام الناس ..يعني فعل إنساني تلقائي  راقي  في الهواء الطلق ..العالم كله شافهم ..فين المشكلة ..!

 

اللي اعترض على الفساتين هو اللي سخر  من التجاعيد هو اللي خاض في الأعراض هو اللي سب وشتم بأحط الألفاظ ..هو اللي فتش بدقه عن أي خبر قديم يسيء للسمعه  هو اللي حشر أنفه و حكم وأفتى  بشي لحمهم في النار  هو اللي انتقد بوضاعة  واستشاط  حنفا على  البوسة هو نفسه  اللي  أدعى الفضيلة .. وطبعا كتير جدا منهم ستات ..

.

ومادام  أغلبهم  ستات وبنات يبقى كلمة واحدة بس ..مش عاجبك الفسق دا  ياقطة  يبقى إياك تنزلي على صفحتك صور لعشاق وتنادي في أشعارك  بسلطان الحب وعلانية المشاعر ..وصور قبلات الأمير وليم للست كيت ..وسعاد حسني والدونجوان رشدي اباظة ولا فاتن  مع فتى احلام البنات عمر الشريف وتغني بكلمات شكل الصدق  ..ولا تقفي تشعري قصايد في القبلة والحضن  والقمر  وثوري ثوري ثوري  وإنتي بترفضي تمدي ايدك  تسلمي على زميلك   (قطة بجد )

 

إياكي  تعملي فيها متحررة  وصاحبة مباديء  وإنك ضد ضرب النساء  وضد  أي معاملة خشنة تتعرض لها في الشارع  من زوج أو أخ  أو ي رجل  زي التحرش مثلا..تبقي كدابه   ومصابة  بنفس عقدة  النقص  والكبت  والإسم مثقفة..

 

وانتو ياقطاقيط  مش مقتنعين بنفسكوا  وحياتكوا اتغيروا 

بدل ماتعملوا مصلحين وشتامين ومندفعين   علشان عيب أوي  بنت تقول الألفاظ الرخيصة  دي ..المفروض إنك أنثى .. ولا يليق بالرجل أبدا  لأن بذاءة الفم ونجاسة القلب  ضد فخامة الرجولة ..

      ..

طيب هانروح بعيد ليه ماتشوفوا الكورنيش والنوادي وشكل  اغلب العلاقات بين الشباب والصبية   وحتى في الدراما  كلها علاقات غير ناضجة  ماتشوفو ا اللبس في الشوارع  والمناسبات حتى بسبطة الحال شكله  إيه 

 

وعلى فكرة العلاقات  الفجة دي  بين الشباب  تسبب لي استياء  كبير لسبب لأن اغلبها   تنفيس عن كبت وعقد نقص  وتمرد  ..للأسف علاقات  منفلتة  ومستهترة . غير راقية  ولا جادة ولا ملتزمة  ولا متحضرة وبلا هدف .. بالبلدي كدا  مجرد  هلس وفجر لانها أبعد ماتكون عن الاحترام   والرقي .. بدليل فور انتهائها لأتفه الأسباب تكثر الفضايح وتبادل  الاتهامات  وقلة القيمة  والانحطاط والتطاول وتشويه السمعة .. .

. 

.الغريب.. لو  ضرب أي راجل ست بالشارع وإدعى انها زوجته أو أخته  ونزل فيها  تلطيش ماحد يقدر يدافع عنها  ( هو حر دي مراته ..أو اخته  أ و بنته رغم إن البعض عارف أنها لاتقرب له )  لكن صورة فيها  بوس تؤ تؤ ..صور لمظاهر أناقة  وبهجة بكل مراحل العمر برضة تؤتؤ ..

 

  .طبعا حايطلع أفاضل يقولوا إنت عاوزها مليطة ..ومعاهم حق. لأن أقصى  حدود تفكيرنا الغامق  عن التحرر هي المليطة .. ماهو مافيش لا فهم ولا أخلاق  و لا ثقافة ولا تمييز  ..

 

ومش مطلوب أبدا  نكون زي فلانة أو علانة   ..مطلوب نكون نفسنا ..نتصرف بشياكة ونظافة وأدب .. نلبس اللي شبهنا مش اللي اتفرض  علينا ونقول حرية شخصية ..لو حرية شخصية  يبقى نسيب  غيرنا في حالة يعيش حريته الشخصية  وقناعته   هو كمان .. مادمنا احنا مقتنعين بنفسنا وبأفكارنا وبشكلنا العسل دا  ..بس للأسف إحنا كدابين وخايفين ..ومش دورنا نتفق أو نختلف أو نقيم فعل البوسة بس على الأقل نكون مهذبين ..صعبة دي ..!

 

للأسف  .احنا نتاج  مرحلة وفكر مأزوم  وضار  ومضطهد  وقاتل  للإنسانية ولكل محاولة جميلة للتنفس  والنقاء  والبناء 

 

إحنا نتاج فكر مخرب قتل فينا الاعتدال والاتزان  ودمر قيم الشرف... حرم كل فعل جميل وكل تعبير إنساني  أنيق  وحلل ودعم  الغلظة والاعتداء على الحرية والجمال والنور  على إنها سمات الشرف  لما بقينا محل سخرية وشفقة ..

لاعتمة ابدا على الجمال والفنون والبهجة ..

ثورة على الكراكيب ..