صاحب واقعة الاعتداء عليه بسبب زوجته: "الفعل كان تلقائي"

كتب - محرر الأقباط متحدون ن.ي
رد "عمر مسعد"، صاحب واقعة الاعتداء عليه بعد أن سندت زوجته رأسها على كتفه في أحد المواصلات العامة، على المنتقدين لهم قائلا: "الفعل كان تلقائي وطبيعي جدا وغير ملفت على الإطلاق إلا لنفس مريضة كليا".

وأوضح "مسعد"، في تدوينه له على موقع التواصل الاجتماعي "فيسبوك": "زوجتي مريضة أنيميا، وكانت لسه مخلصة دوام ١٢ ساعة متصلة في قصر العيني كطبيب امتياز (واللي يعرفوا وضع طبيب الامتياز في القصر هيعرفوا أن يومه بيكون مجهد جدا)، ولما سندت راسها عليا ماكانش ده من باب الملاطفة ولا التدلل، كان نعاس وإرهاق، والشخص المعتدي لما خبطها في ضهرها قامت مفزوعة لأنها كانت نايمة فعلا النوم اللي أي حد ممكن ينامه في المواصلات بعد يوم عمل مرهق، وهي بالمناسبة تمتلك سيارة خاصة، ومانزلتش بيها يومها لعدة أسباب منها عدم قدرتها على القيادة مع التعب، أنا خلصت شغلي الساعة ٥:٠٠ مساء واستنيتها لحد انتهاء معاد عملها ٨:٠٠ مساء علشان أروحها لأنها كانت تعبانة فعلا.. والفعل ماكانش ملفت ولا مصادم لأعراف المجتمع بأي صورة من الصور، أنا كنت مركز مع شاشة موبايلي ومانتبهتش حتى لسندتها عليا وفضلت حبة مش فاهم الشخص المعتدي ده بيزمجر ويبرطم ليه!".

وأضاف: "وبغض النظر عن قناعتنا بأعراف المجتمع من عدمها فإحنا بنجيد جدا مراعاتها مش لأي سبب غير لتجنب المشاكل ووجع الدماغ.. فإحنا لا كنا بنحاول نتحدى العرف العام ولا كنا بنحاول نثور على الوضع الشائع ولا بتاع.. الفعل كان تلقائي وطبيعي جدا وغير ملفت على الإطلاق إلا لنفس مريضة كليا".

وتابع: "الكلام اللي أنا بقوله ده مش بقوله على سبيل التبرير لنفسي ولزوجتي، لكن بقوله علشان أوصل رسالة محددة: إحنا لا نتحمل أي جزء ولو بسيط من الغلط في الموقف، وأي حد بيحملنا جزء من الغلط يراجع استواء نفسيته، والحقيقة برضه ده كلام غير موجه لعموم الناس وإنما موجه لمعارفنا باختلاف درجات قربهم، معارفنا اللي آخر حاجة ممكن نستناها من حد فيهم في الوقت ده أنه يقولنا مانتو برضه كنتو عاملين ومتنيلين.. إحنا ماعملناش حاجة غلط في المطلق، ولا عملنا حاجة غلط قياسا حتى على أعراف المجتمع اللي ممكن نختلف معاكم في درجة الإيمان بيها، ومحاولة أي صديق أو قريب تبرير اعتداء الراجل ده بأي شكل بتعمل فجوة كبيرة بيننا وبينه في الوقت الصعب ده.. واللي مش قادر يشوفنا غير غلطانين يحاول يمسك نفسه عن الكلام معانا الفترة دي لو هو باقي على صفو علاقتنا بيه".