حته حته

مرقس كمال
كل يوم بعيشه بياخد منى حته
وكل حد بقابله بياخد منى حته
لحد ما هييجى يوم تخلص الحتت والعمر ينتهى
وكل اللى يفضل منى مجرد حتت متسابه عند غيرى

فيه ناس خدت واديتنى
وناس خدت وفرحت
وناس اديتنى من غير ما تاخد
وناس خدت الحتت ورميتها
وناس مش حاسة انها بتاخد
وناس قصرت معاها ومعرفتش اديها

يارب بشكرك على كل ده
وسامحنى على كل حد معرفتش اديله حته

من فضلك يارب خلى الحتت اللى فاضلة منى فى ايامى القليلة الباقية تبقى حب وسلام وفرح وخير واحتمال ومجد لاسمك
وشوف عاوزنى اسيبها فين وازاى
ومتخلنيش امشى وانا لسه عندى حته