بقلم: مايكل فارس
يا شعبي العزيز.. باعتباري الرئيس القادم.. ونظرًا للشكاوى المتعدِّدة من الشباب المصري بخصوص الكبت الجنسي اللي هما عايشينه.. دايمًا يقولولي مفيش فلوس، مفيش شغل، مفيش شقة، وبالتالي مفيش خطوبة، مفيش جواز.. ولو عاكسنا بنت على نفسنا بنتحبس طاب نعمل إيه طيب نموووووووت بحسرتنا.. المفروض البنت من دول تخلي عندها دم وتحس بينا، يعني لما تشوف شاب بيعاكسها المفترض ماتكشرش في وشه.. ده لازم تبص ليه وتضحكله وتقله "يا ضانايا يا بني.. عاكس يا بني عاكس.. انت هتلاقيها منين ولا منين.. كفايا إنك هتموت وآخرك حتت المعاكسة دي.. لا عاكس عاكس".

بس للأسف، البنات مش مقدرة شعور الشباب، خاصة لما يشوف الأفلام والمسلسلات التركي والعربي والأجنبي ولا الأغاني في مزيكا ولامولدي تيونز" بتاعت All English all the time".. ولا لبس البنات اللي فيها يعني يعمل إيه الشاب طيب ينتحر.. يرمي نفسه من البلكونة، وباقي الشباب يعمل "ثورة المزز" مثلًا؟!

شعبي العزيز، أنا عملت قانون تنظيم المعاكسات قبل كده، بس أعتقد إنه مش كفاية نظرًا لزيادة كبت الشباب يوم بعد يوم، خاصةً مفيش فعلًا شغل ولا فلوس واقتصاد بلدنا ف النازل، عشان كده قررت أعمل قانون جديد اسمه "المبوسة العامة"، وده هعمله في كل "طابونة" أو فرن عيش.. وإحنا عارفين زحمة أم الشعب عليها لما بيجيب عيش. فالفرنة هتشتغل في الصبح لحد العصر وبعدها هقلبها مبوسة، يعني هحط "موزة" على كل فرن وهتاخذ أجرة شهرية على حسب كل منطقة اجتماعية ونسبة السكان، اللي فيها.. المزة دي هتقعد على باب الفرنة والشاب من دول يبوسها ويمشي، وهكذا لكل الشباب، وبكدة أعتقد أن ده هيخف الضغط من ع الشباب.

واللائحة الداخلية لقانون "المبوسة العامة"، هي:
• المٌزة اللي هتتباس من سن 18-35 سنة.
• الراتب الشهري للمزة بداية من ألف جنيه فصاعد- على حسب المنطقة.
• مواعيد العمل بالمبوسة العامة من الساعة السادسة مساءًا حتى الواحدة فجرًا.
• البوسة نوعين؛ الأولى في الخد اليمين أو الشمال، ودي الشاب هيدفع فيها اثنين جنيه ع البوسة.. لأنها بوسة مدعومة، ولا تتجاوز مدة البوسة عن (30) ثانية فقط لا غير، علشان الأعداد الغفيرة للشباب اللي هيجي يبوس.. النوع التاني البوسة في "البق"، ودي أجرتها 5 جنيه، ومدتها (15) ثانية فقط لا غير.. علشان عارف الشباب هيستهبل ويسرق فلوس من أهله ويقضيها بوس مشروع.
• الشاب لا يبوس إلا مرة أو مرتين على أقصى تقدير.
• من حق الشاب أن يستخرج "بطاقة البوس" زي بطاقة التموين كدة، ودي بتكون مدعومة من الدولة، بحيث يمكن يعمل اشتراك شهري بالمبوسة العامة في المنطقة التابع ليها.
• بعد عملية البوس يقوم الشاب بالإمضاء عن طريق "بطاقة البوس" حتى يتم التأكد أنه مش هيستهبل ويدخل تاني الطابور ويبوس أكتر من مرتين..
• من يضبط متلبسًا في حال مخالفة القواعد السابقة سيتم حبسة في قسم شرطة جديد، أنا هعمله اسمه "قسم شرطة المباوس العامة"، وهيتم عقابة عن طريق اثنين غفر من بتوع الأفلام القديمة، والعقوبة بقانون "كما تفعل سيُفعل بك"، وهيبوسوه بس مش بالعدد، يعني مش بوسة ولا اثنين، لا دول هيبوسو بالمدة، والعقوبة الأولى بدايتها ربع ساعة.. يعني هيقعدوا يبوسوا فيه ربع ساعة.. علشان أنا أما أحط قانون خلي حد يخالفه!

شباب "مصر" الأعزاء، أنا رشحت نفسي رئيسًا لأجلكن أنتن، وشعاري ليكن "هدلعكوو هدلعكوو.. هشخلعكوو هشخلعكوو"، والله الموفق.