شلوط كيكي ..

ماجدة سيدهم

:اهدي يانوسة ..
:  بقولك  إيه ياعوض   اركن كدا على جنب .. ماطيرش الحجرين   وخلي لي  الطلعة دي.

واتلمت نسوان السوق حوالين المعلمة نوسة ويا الباشا

:تعرف يا باشا ... ..أنا اللي حارق دمي الشابة  اللي طالعة  بتصرخ وش دا كدا   ف معاليك   ومحموئة  أوي وهي بتنهج م الجري  "   سيبونا ياريس   احنا اتخنقنا.. حانرقص.. عاوزين نرقص "

طيب  هو انت مالك يا باشا ..كنت منعت كيكي عن حد ..

هي طبعا  ياباشا  خايفة  ومرعوبة وماتقدرش  تبوء  صراحة  كدا  وتقول  "سيينا يامولانا."  ف جابتها ف سعادتك  .. لأنها عارفة كويس وي  إن  دا شغل مولانا  وإن شوية الجرابيع اللي حواليه  حايعملوا  معاها  الصح  .

.لاء وإيه  والبهوات  زعلانين  أوي من حتة رقصة واحنا صلا شعب متحرش على نفسه   .. اي نعم الشكل العام للي بيرقصوا  عرة ومنيل بستين نيلة  ومش لابق علينا..لكن  إن جيت للحق ..هو حق  والفيدويهات  بتنتشر أكتر ..دا يا  باشا   اسمه لوي دراع لبتوع الدين
..
هم  مش كفنونا وحجبونا  وحرموا علينا العيشة  ..وعملوا علينا أحلى نصباية ...لكن والمصحف  بقولك الصدق
  ..الناس طقت  .الناس صرخت وطلعت من هدومها ...وخصوصا الستات اللي هم  جايبن النهاردة  يهاجموهم  ويقولوا عليهم   ستات شمال..طيب ونور عينيك  احنا شمال ياباشا ..؟..دا حنا اللي شايلين  الطين كله وساكتين  .. طيب مين اللي وصلنا لكدا ..

أوعى  تفكر إن الناس  طهقت  م الغلا ولا م الوكسةاللي احنا فيها   ..لااااا....دا  م الكبت بعيد عنك و القهر والظلم  اللي جوه كفن أسود سنين وسنين  ..الله يلطشهم بشبشب متعاص ..

:لا يابشا  انت عارفني..مش أنا مش ضد الرقص خالص ....طيب ياريت  الناس كلها تفوق ومخها ينضف  وتفرح و ترقص  وتشتغل ونعيش زي بقية الخلق ولا زي أهالينا زمان

وبعدين إنت يامايلة  منك ليها  يابتوع الفيديوهات ..كيكي إيه وإنت على راسك حتة الخرقة دي   ..بلا خيبة ..دا بالظبط زي مابتلبسي  البكيني فوق البادي كارينا العرة وفرحانة أوي إنك مودرن  وعلى راسك  طرحة بيئة ...
ولا قاعدة تشيشي  وف ايدك ازازة البيرة  ..بس ملتزمة والحمد لله ..والمحزق  والعريان والخصل الباينة من تحت طرحة حادفة على ورا   ..ياختي مش ماشي خالص ..بجد منظركوا عرة وفضيحة   مسخرة  وبيئةاوي .

.وأوعي  حد يقولي حرية شخصية . لأنهم يا باشا في أول فرصة بيخلعوه  ..شوفهم برا والنبي  على البارات.. دا حتى يامؤمن  ديانتهم  بينكروها ..بلاش نروح بعيد ..ادخل معاليك  أي صالة  جيم  ولا قاعة أفراح  ولا انزل  كدا أي كافيه  ..روح   البلاجات ولا  الحفلات واتفرج  على الهيستيريا والصريخ   اللي على ودنه ..دا كله كبت  وخوف ياباشا  ..مستني ايه منهم ..

.شوف  م الآخر .كيكي مش مجرد رقصة .لأ لأ..كيكي دي شلوط  كبير أو ي..أو بونية تقيلة  .. .حاجة كدا زي بقية  الفوضى اللي بالشارع ..دي  معاليك ثورة .لا ماتتخضش كدا ...ايوه ثورة..  وأخطر ثورة هي ثورة الشلاليط ...اللي الناس فيها بتخرج من  حبستها  وتكسر كل اللي قدامهاعلشان تعيش ..

.ودا اللي بيحصل دلوقت  كل واحد ماشي بدماغه ..وحقه بدراعه .. لا  اخلاق ولاقيم ولا  قانون يلتزم بيه ..ماخلاص المدية انكشفت
ياباشا. اللي اتعمل ف الناس دي كان  عكس خلقة ربنا .الناس بقت   بتكدب وبتكره  بعض وبتكره  اللي احسن منها من كتر الخوف  ..بقت  تقلد  اي حاجة  تشم بيها هوا ربنا حتى لو مش لايقة عليهم  ..عرفت ليه الناس بتصرخ وتتحداكوا  وحاترقص كيكي . قصدي حاتديكوا  بالشلوط ..

..طب إيدك كدا  يا باشا ..وشبكة  العشرة  دول   ..حايقلعوا الطرح   وحايحرقوها  علنا  في الميادين وحايبقى  يوم قومي وذكري كمان ..وافتكر كلامي ..حاتخرج الستات  تحتفل بيه .حاينزلوا  الشوارع  يشتروا أاغلى واجمل الوان للطرح  علشان يحرقوها   في الميادين  ذكرى يعني  أنهم بقوا بني ادمين ..وخايرقصوا كيكي  بس بشياكة ورشاقة ..وتانجو كمان

الستات  ياباشا هي ثورة النهاردة وحضارة بكرا . . سلام