الراسل: ملاك رؤوف

إهداء إلى كل منْ تلطخت إيديه بدماء الأقباط، صرخة قبطي..
اقتل احرق شرَّد فينا، اضرب ادبح أعز ما لينا، اخطف ماري واقتل مينا، وكفر مرقس ويا مارينا، اقتل طفل في أحضان أمه، اشهر سيفك واهدر دمه، ما يهمكش دموعه في عينه، كافر ذمي هو ده دينه، فجَّر شاب زمنك جرحه، أمه حاضنه بدلة فرحه، أو رمِّل زوجة عائلها وحيد، ويتِّم طفل في ليلة العيد،

اقتل كلمة بابا في عيده، واسرق منه لعبه في إيده، واخطف بسمة في وش أبوه، راحت برصاص اللي قتلوه، يا لا اضربني كمان وكمان، اهدر دمي في كل مكان، واجني بكل قسوة عليا، ما أهو الحكم محسوم في القضية، إني أنا الجاني وأنت الضحية، ده قانون بلدنا وكلنا عارفينه، من الزاوية لإمبابة وإحنا عايشينه، وجاي تقولي همك همي؟! طاب ما إيديك غرقانه في دمي! خلي مكانك هو مكاني، ترضى تكون مكوي بأحزاني؟ ترضى حد يقولك كافر؟ ولو مش عاجبك امشي وسافر؟! صوتي في حلقي بقى مكتوم، ليه يا بلادي أنا مظلوم؟ ولو صرخت وقولت "كفاية"، نرجع تاني من البداية؟!

وحتى صراخي بقى ممنوع، ساكت بصراخ مش مسموع، فاكر زمان لما قالوا جايين نحميك، وفي المناصب والرتب هانعليك، قولت هاتحموني من أخويا؟ ابن أمي وأبويا؟ دا أرضه أرضي، وعرضه عرضي، وسمايا سماه، ونيلك سوا شربناه، ولو هايموت أنا معاه، جاية دلوقتي بتكافئيني يا بلادي؟ بعمرانية وإمبابة ونجع حمادي، بتعامليني كإني غريب؟ علشان داقق في إيدي صليب؟ تايه فيكي وماليش مرسى،

وأقول بكرة يطلع أقسى، مهما حصل ومهما ها قاسي، هأفضل أصلي يا أهلي وناسي، واحرق واقتل وشرد فينا، لينا إله هو اللي حامينا، سامعين صوته وساكن فينا، شايف حالنا وبيعزينا، اقطع رأسي أو اقطع ودني، جاي إلهى عشان يسندني، وهايسألك يا إللي بتهددني، شاول شاول ليه تقتل ابني؟ شاول شاول ليه تقتل ابني؟

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :