معندهمش "نون"

"سوا نقدر" حملة من حملات "نون" المميزة، اللي أنا شايفة إن قارئات "نون" مش محتاجينلها!

متستغربيش.. أيوه فعلاً إحنا مش محتاجين حملة تقولنا "سوا نقدر"، بصي حواليكي، هتلاقي نفسك بتتعرضي لمشاكل كتير، مشاكل كبيرة جدًا زي التحرش والقهر ونظرة المجتمع للمرأة اللي محتاجة تتفرمت وتتسطب من أول وجديد، ومشاكل تانية كتير أوي محتاجة مجلدات عشان أتكلم عنها.

لكن وإنتي بتبصي حواليكي هتلاقي إنك عمرك ما كنتي لوحدك.

إحنا البنات عارفين إننا مش لوحدنا، عارفين إن مش عيب نشتكي أو نفضفض، عارفين إن اتنين وتلاتة أحسن من واحد، ويقدروا على حاجات كتير أوي مستحيل واحد لوحده يقدر عليها.

إحنا عندنا "نون"، نشكي ونحكي ونستفيد من تجارب بعض.

إحنا دايما سوا، و عارفين إن سوا نقدر من غير حملة مميزة تقولنا "سوا نقدر".

مميزة ومش محتاجينها! طب تيجي إزاي دي؟!

طبعًا مميزة، وجدًا كمان، عشان قراء "نون" همّ اللي محتاجينها.. تمام كده، الأفندي والبيه والباشا اللي هنا همّ اللي محتاجين يعرفوا إن سوا نقدر!

حضرتك مش دورك إنك تتحمل مسؤوليتي وتحميني وتبقى سندي في الدنيا وبس، إنت محتاج تشتكي وأنا أسمعك، محتاج تقول مش قادر لوحدي ساعديني، محتاج تقول أنا خايف، محتاج تعيّطلي عشان ترتاح، مش عيب والله!

محتاج تعرف إن "سوا نقدر" على اللي لوحدك مش هتقدر عليه.

الحملة دي..
للناس اللي معندهمش "نون".

لكل واحد متخيّل إن المشاركة والفضفضة وطلب المساعدة نقطة ضعف، وهي في الحقيقة مصدر قوة.

لكل أم وأب بيربوا أولادهم بطريقة "عيب.. الراجل ميعيطش" أرجوكم خلوه يعيط دلوقتي عشان يعرف يضحك بعدين. 
نقلا عن نون