أجازة زوجية على طول

"العلاقة الزوجية هي العلاقة اللي بتجمع بين اتنين نفسهم يعيشوا كل حياتهم مع بعض ثانية بثانية مايستغنوش عن بعض أبدا، يشوفوا بعض على طول، يفضلوا مع بعض على طول كل لحظة."*

*الأكذوبة الأولى عن العلاقة الزوجية
أول ما كنت بافكر في موضوع المقال افتكرت قصة عن أحد أصحابي اللي لما خطيبها قالها لازم منبقاش مع بعض كل ثانية ومينفعش نحتكر حياة بعض، هي زعلت منه وكانت شايفة إن ده معناه إنه مش عايز يكمل معاها بس هي مصرحتش ب ده، وبعد تفكير كتير وبعد قراءات كتير،

فهمت إنه بيتكلم صح وإن اللي مش طبيعي واللي للأسف بيحصل كتير، إن كل واحد بيحتكر حياة الطرف التاني من أول مراحل الارتباط، وبعدها بيقولوا هو إحنا ليه اتغيرنا كده؟!!! في حالة التغيير للأسوء وبيفكروا ياخدوا أجازة من العلاقة عشان يرجعوا تاني لبعض بشكل فيه تجديد بس للأسف يومين ومدة التجديد بتنتهي!

لما كانت صاحبتي بتحكيلي قصتها عن خطيبها ومناقشتنا إحنا الإتنين إن هو فعلا بيتكلم صح بس إحنا اللي إتربينا على مفاهيم غلط عن الحب والجواز والتربية و التعليم...الخ، كانت الفكرة اللي بتدور في خيالي فكرة إن أي اتنين محتاجين ياخدوا من بعض أجازة على طول.

بمعنى إن أي اتنين مينفعش يفضلوا قدام بعض طول الوقت، لازم دايما ياخدوا أجازة من بعض:

أجازة كل يوم:
الأجازة بمعنى إن كل يوم، كل واحد ليه جزء خاص في حياته سواء في عمله، في علاقاته، في هواياته، بيضيف ليه على منحنى ما من حياته، من غير الإضافات دي هيجف ومش هيبقى عنده حاجة جديدة يقدمها لنفسه أو يقدمها لحد تاني.

أجازة كل أسبوع:
في أزواج كتير بتشوف إن أجازة نهاية الأسبوع المفروض تكون مخصصة للطرف التاني بما إن في أيام كتير بينشغلوا عن بعض فيها بسبب العمل أو التزامات أخرى، إلا إن حتى أجازة نهاية الأسبوع المفروض يكون فيها جزء لكل واحد لوحده حتى لو الجزء ده ساعة يقضيها كل طرف مع نفسه يراجع أيامه وأهدافه ومشكلاته وحياته،

ويشوف هو حاسس إنه ماشي في الطريق اللي بيحبه أو ماشي في طريق يوصله للي بيحبه ولا لأ، الأجازة دي بتجدد العلاقة كل شوية وبتخليها دايما زي الزرع اللي بيطرح ثمار أكتر لو إتراعى أفضل.

أجازة كل فترة:
والفترة دي مابتكونش محددة، كل زوجين بيحددوها حسب اتفاقهم، بيحاول كل واحد من الطرفين إنه يستغرق في حاجة معينة زي دراسة جديدة، زي هواية جديدة، زي نشاط تطوعي، زي رحلة مع العيلة بيجدد فيها نفسه ويغسل فيها هموم روحه ويرجع إنسان جديد مليان حياة يقدر يشاركها مع نصه التاني.

أجازة مع بعض:
الزوج والزوجة لازم ياخدوا أجازة من بعض ويقضوها سوا، أجازة يعيدوا فيها اكتشاف نفسهم واكتشاف بعضهم البعض، الأجازة دي ممكن تكون حضور ورشة تدريبية عن حاجة جديدة، المشاركة في عمل تطوعي، حضور نشاط ثقافي، رياضة جديدة يمارسوها سوا.

والمهم إن في كل أجازة، كل طرف يكون مرتاح مايكونش حاسس إنه أخد أجازة غصب عنه أو التزم بحاجة هو مش قادر على العمل بيها، ويبقى فاهم ومقدر يعني إيه كل طرف ميحتكرش حياة التاني، وقبل ده كله يغسل دماغه من المفاهيم الغلط اللي بتخلي حياته تمشي.. بس مش لقدام.
نقلا عن نون