مواطنة تروي واقعة مصرع طفلة نهشتها كلاب ضالة في زهراء المعادي: «احنا رخاص»

قالت مواطنة إن طفلة لفظت أنفاسها الأخيرة بعدما نهشتها كلاب ضالة، الخميس الماضي، وسط مطالب للمسؤولين بالقضاء على هذه المشكلة في المعادي والمناطق المجاورة.

من المعادي، كتبت المواطنة خديجة أبو الحسين إلينا عبر خدمة الرسائل المباشرة لصفحة «المصري اليوم» على «فيس بوك».

وروت ما حدث نقلا عن خالة الطفلة القتيلة، قائلة «الحادث كان من حوالي أربعة أيام في منطقة زهراء المعادي بجوار كارفور.. على لسان السيدة التي تساعد أمي في أعمال المنزل، بنت أختها سنة ونص ماتت قدام عينيها.. الكلاب نهشتها وقطعتها والأم كانت بتحاول تنقذها منهم ومقدرتش طبعًا.. الحادث بالنسبة ليا مأساوي زيه زي حوادث الإرهاب ويمكن أكتر.. واللي يوجع إن البنت دي لو كانت بنت ناس من أي طبقة غير طبقتها كانت الدنيا اتقلبت ومشكلة الكلاب الضالة اتحلت في ثانية!».

«البنت أبوها غفير عقار تحت الإنشاء قاعد هو مراته في غرفة في نفس العقار تكاد تكون بدون باب.. الكلاب اللى افترست البنت كلاب شارع ليست سلعوه أو ذئاب.. دي معلومات عشان اللى بيقول إنه إهمال من الأهل أو إنها سلعوه! قمة القهر إنه تم الايحاء لأهل الضحية أنه بلاش تعملوا بلاغ عشان حتروحوا في سين وجيم!».

وأضافت خديجة: «خالة البنت بتسأل للدرجة دي احنا رخاص؟!»، داعية إلى مساعدة الغفير والد الطفلة في الحصول على عمل وسكن آدمي «كأقل تعويض له، خصوصا إنه عنده طفل رضيع تاني.. ونقف مع الناس دي عشان منرجعش نلومهم لو طلعوا علينا احنا.. دي ناس بنتهم اتقطعت قدام عينيهم بسبب الحاجة وأكل العيش».