بقلم: هانى رمسيس

معجزة صيد السمك
(الشخصيات : الراوى – يسوع المسيح - سمعان بطرس – إندراوس شريك بطرس )

(يُفتح الستار على منظر السفينة وسط الماء ليلاً .. تظهر النجوم فى الخلفية ... ومصابيح باهتة منتشرة بالسفينة .. يظهر شخصان يرتديان ملابس الصيد وظهرهما للجمهور .)

بطرس : شد يا أندرو
أندرو : يا رب المرة دى
بطرس : هيلا هوب

(تخرج الشباك خالية)

بطرس ناظراً للجمهور وقد بدا عليه الضيق : إيه ده الشبكة فاضية
أندرو : إحنا تعبنا خالص
بطرس : النهار قرب يطلع ومفيش ولا سمكة واحدة
أندرو : هو السمك راح فين
بطرس زاعقاً : رحت فين يا سمك
أندرو : يمكن السمك نايم يا بطرس
بطرس : أو يمكن متعشى و شبعان
بطرس ملقياً بجسده عند أحد أركان المركب : أنا تعبت
أندرو ملقياً بجسده عند ركن آخر : وأنا كمان

(يتحدثان إلى نفسهما بصوت يخفت رويداً رويداً)

آآآه يا ضهرى
آآه يا دراعى
رحت فين يا سمك
رحت فين يا سمك

(يبدأ المسرح فى الإظلام رويداً رويداً ... ينزل الستار )

***************************

(يدخل الراوى )

موجهاً كلامه للجمهور : أنا زعلان ... زعلان خالص خالص على بطرس و أندرو .. تعبوا الليل كله وما إصطادوش ولا حتى سمكة واحدة .. انتو مش زعلانين عليهم برضو ؟
متجها ناحية الجمهور بحماس : طاب مين فيكم بيحب يصطاد سمك زى بطرس وأندرو ؟ أنت .. وإنتى ... وأنت كمان ؟
بطرس كان بيشتغل صياد سمك ... بيصطاد السمك علشان ياكل منه ويبيع الباقى .. لكن الليلة دى تعب بطرس و صحابه من غير ما يصطادوا حاجة خالص .... لكن لما يسوع شافهم زعلانين عمل إيه ... قال للسمك يدخل الشبكة .. راح السمك فرحان سمكة تزق سمكة ياللا يا سمكة خشى الشبكة يسوع بينادى علينا ...واتملت الشبكة ... بطرس يشد و أصحابه يشدوا هيلا هيلا ... و من ساعتها بطرس بقى بيصطاد إيه .. سمك قرش لأ ... حيتان لأ .. غزلان لأ.. بطرس بقى بيصطاد الناس .. يعنى بقى يكلم الناس عن يسوع الطيب يسوع الحلو .

***************************

(يُفتح الستار على منظر السفينة وسط الماء نهاراً )

بطرس و هو يغسل الشباك : النهار طلع يا أندرو
أندرو وهو ينشر الشباك : الشمس ملت الدنيا ومفيش ولا سمكة واحدة فى السفينة .

(ينظر الإثنان بعيداً)

بطرس : شايف يا أندرو مين اللى هناك ده
أندرو : دا باين جاى علينا

(الرب يسوع يتقدم إليهم)

يسوع : أنا يسوع اللى من الناصرة
الإثنان : أهلا أهلا بيك يا يسوع
يسوع : أنا عايز السفينة بتاعتكم
بطرس : عايز السفينة فى إيه
يسوع : عايز أعلم الناس الكتير اللى جايين ورايا ..من السفينة
الإثنان : إتفضل يا يسوع

(يدخل الرب يسوع السفينة )

يسوع : حركوا السفينة

(يقف يسوع ممسكاً بأشرعة السفينة وهو يعلم الناس و بطرس و أندرو تحت قدميه ينصتان إليه ... وبعد أن إنتهى يتوجه إلى بطرس فى حديث )

يسوع : ادخلوا لجوة شوية و ارموا الشبك
بطرس : احنا تعبنا الليل كله وما اصطدناش ولا سمكة واحدة .. لكن على كلامك حنرمى الشبك تانى .
بطرس بصوت عالى : جدف يا أندرو
أندرو : حرك الشراع الناحية دى يا بطرس

(تعلو الأصوات و تتحرك السفينة ...)

بطرس : نرمى الشبك هنا يا أندرو
أندرو : هيلا هوب

(يمسك الإثنان بالشبكة)

بطرس : الشبكة تقلت
أندرو : الشبكة إتملت سمك
بطرس : نادى يا أندرو على أصحابنا فى السفينة التانية
أندرو : يا يوحنا يا يعقوب
بطرس : يا يوحنا يا يعقوب

(يتقدم بطرس ناحية المسيح )

بطرس : يا رب أنا راجل خاطى
يسوع : ماتخافش يا بطرس ... من دلوقتى حتقول لكل أصحابك وتكلمهم عنى
الإثنان بصوت قوى : واحنا من دلوقتى مش ح نسيبك يارب ... ح نسيب كل حاجة و نبقى معاك

(يُظلم المسرح و ينزل الستار )

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :