رباعيات مرقسية

مرقس كمال
شاف فى الرؤيا يوحنا الكهنة ماسكين شورية وفيها بخور
ويسوع قاعد فوق على عرشه وملايكة تسبح بسرور
تحت المذبح أنفس تصرخ إمتى تجيب لدِمانا حقوق
لسه شوية إستنوا إخواتكم أصل هييجى عليهم دور

نفس المنظر جوة كنيستى يوماتى بشوفه وبعيش فيه
نفس الشورية ونفس الكهنة نفس المذبح وأنا تحتيه
ساجد بصرخ ربى إرحمى وهو بجسده ودمه فوقيه
بيطمنى وأقوم أتناول يثبت فىّ وبثبت فيه

ويا اللحن القبطى أنا مَسبى روح ف السما وجسد ع الأرض
واتحرر من قيد يملكنى مهمَن كان له سطوة وفرض
بره الذات تسابيحى تشارك بالتَهليل  تسابيح الكون
وألقى كيانى وقلبى بيدرك حُب بعمق وطول وبعَرض

أيوه كنيستى تاريخها يشرف أيوه بكل أبائى فخور
لا إيمانهم فى الشدة إتحرّف ولا قلب فى ضيق كان بيخور
ثابروا وجاهدوا ودَفَعوا حياتهم لاجل ما يثبت لىّ إيمان
 مشيوا فى درب يسوع بأمانة وصبحت لينا خُطاهم نور