كافيه للسيدات تحت حراسة أمنية: لا مضايقات ولا تحرش

على الرغم من انتشار المقاهى المخصصة للسيدات فى بعض الأماكن بمختلف المحافظات، إلا أنه لضمان السلامة للسيدات والبنات، افتتح إسلام فارس «كافيه» خاصاً لسكان البوابة الرابعة بمنطقة حدائق الأهرام، واستعان بأفراد من شركات أمن خاصة لتأمين الكافيه من الخارج، حتى يتصدوا لأى ضرر من الممكن أن تتعرض له السيدات أثناء وجودهن فى الكافيه.

يرى «إسلام» أن الخصوصية والأمان محوران مهمان قبل فتح أى كافيه: «الأمن ليل نهار واقفين عندى بره عشان لو حد اتعرض لأى مضايقات، لأن الست ممكن تتعرض لأى موقف وهى بتركن أو وهى داخلة وخارجة، فالأمن بيتصرف». يوفر الكافيه كل الخدمات الترفيهية مثل الكوتشينة والطاولة، ويخصص مكاناً للمذاكرة، فى حال اصطحبت إحدى السيدات أبناءها إلى الكافيه للمذاكرة: «هى تقعد مع صحابها براحتها وتستمتع بأكلها وشربها وتسيب ولادها يذاكروا، وعندنا الدنيا هدوء». يتميز الكافيه بألوان هادئة محببة للسيدات ما بين البمبى والأحمر الوردى، بهدف تهدئة أعصابهن ومساعدتهن على قضاء وقت ممتع فى يوم الراحة الأسبوعية: «دايماً الستات بيبقى عندها مشكلة فى الخروج، نفسها تخرج وتقعد فى مكان وخايفة من مضايقات الناس أو التأخير بره البيت»، بحسب «إسلام» ولذا حرص على أن يضمن الكافيه الأمان للسيدات خصوصاً سيدات المنطقة، كما يعتبر الكافيه قريباً من معظم الأحياء بالبوابة، وكذلك العاملون داخل الكافيه من البنات: «عشان يبقوا قاعدين مرتاحين كأنه مكانهم أو كأنهم فى بيتهم».