فى وقت قصير جداً تستطيع أن تنجح في 4 خطوات

بقلم - د. جون مجدى
اللي عايز ينجح في أمر ما في وقت صغير , في 4 عوامل رئيسية لازم يتبعهم بكل جدية :

1- الاعتماد علي مصدر واحد فقط
(( لنفترض أنك عايز تنجح في تعلم لغة ما , هتعمل search هتلاقي مصادر ملهاش عدد . أول ما هتشوف المصادر الكتيرة أوي دي هتحبط جداً و مش هتاخد و لا خطوة .. لكن اللي عايز ينجح بجد ,, هيقوم مختار مصدر واحد فقط مشهود ليه بالجودة و يبتدي علي طول من غير تأجيل ))

2- أبدأ من مستوى منخفض لمستوى عالي
(( معظم الناس بيبدأوا أول يومين بطاقة و حماس و جهد كبير أوي . بعد كده بيتعبوا و مش بيقدروا يكملوا ,, نعكس الفكرة أول يوم هتبدأ بساعة واحدة بس ,, تاني يوم ساعة و نص و كل يوم تزود نص ساعة و تطلع تدريجياً ))

3- ما تقارنش نفسك إطلاقاً بحد
(( دايماً اللي بيبدأ يتعلم حاجة جديدة , عقله بيكون مركز أوي في الحاجة دي و مع كل واحد بيعملها , فمثلاً واحد عايز يتعلم يعزف علي آلة موسيقية أو هيكتب شعر أو هيرسم , لو شاف حد متمرس في أى موهبة من دول و قارن نفسه بيه , هيحبط جداً جداً و ممكن ييأس و ميكملش .. عشان كده ما تقارنش نفسك إطلاقاً بحد , و لكن فيه حاجة حلوة هى إنك تقارن نفسك بنفسك كل يوم باليوم اللي قبله هتلاقي نفسك كل يوم بقيت أحسن و نفسياً أحسن و افتكر دايماً إنك لو يأست أو استسلمت هتفضل مكانك و كل يوم هيكون عادي ذي اللي قبله))

4- استمر , استمر , استمر "لا تيأس أبداً"
(( الاستمرار هو سر النجاح الحقيقي , لو استمريت شهر واحد بتعمل الخطوات دي مستواك هيتطور بشكل ملحوظ و هتنجح بالفعل في وقت قصير جداً أنك تكتسب مهارة و خبرات في أى حاجة نفسك تحققها .. علشان كده لازم تستمر في كل الظروف ( هتعدي عليك أيام سيئة "استمر" , في أيام هتكون متضايق "استمر" , في أيام هتكون مجهد جداً و نفسياً مش قادر "استمر" ... النجاح حلو خصوصاً لما يجي بعد تعب عشان كده استمر , استمر , استمر " لا تيأس أبدأ" ))

سلسلة معجزة الأمل الحلقة السادسة