حملة كراهية وإرهاب ضد مذيعة خلعت الحجاب ونشطاء: إحنا مجتمع داعشي

استنكر بعض نشطاء على الفيسبوك، حملة الهجوم على المذيعة غادة جميل، مقدمة برنامج طبخ على فضائية cbc سفرة، وذلك بعد قرارها بخلع الحجاب.
 

يقول النشطاء، "دخلت تقدم علي صفحة البرنامج طريقة عمل صينية البطاطس ولكنها اتفاجئت بهجوم حاد وشرس وتعليقات منحطة والسبب أنها اختارت تقلع الحجاب.. معظم التعليقات كانت شتيمة وسب وخوض في سيرتها وتعبير عن مدى كراهية واحتقار لها، وتهديد أنهم هيقاطعوا البرنامج لأنها سقطت من نظرهم و فقدت مصداقيتها (دة علي أساس كانت بتذيع وصفات أكل إسلامي يعني ولا إيه !!).
 

أضاف آخرين على السوشيال ميديا، كون الست إنسانة بتعمل شغلها بضمير وبتأدى واجبها علي أكمل وجه وبتديه حقه وعندها ضمير وأخلاق ولا لا مش مهم ... الأهم طبعًا متر القماش اللي علي شعرها!
 

كميه حقد وغل في الكومنتات من بنات نفسها تقلع الحجاب ومش قادرة، او من شباب حاسس إن ذكوريته بتضرب في مقتل، بيدى إحساس للي بيقراها أنهم لو اتملكوا منها في اللحظة دى كانوا هيقطعوها حتت بأسنانهم.
 

وتابع، لو اللي حصل معاها دة مش إرهاب ديني يبقي إيه هو الإرهاب الديني !! ولما نيجي ننتقد ثقافة الحجاب اللي أدت لظهور كل الأمراض والسرطانات دي في المجتمع بيتقال لنا انتم مالكم الحجاب حرية شخصيه واللي تلبسه هي حرة وفين احترام العلمانيين للحريات!!
 

إحنا بنهاجم ثقافة الحجاب اللي نشرت الوباء دة في مجتمعاتنا واللي أصبح بالنسبة لهم الحجاب هو صك الشرف والعفة والأخلاق واللي ما تلتزمش بيه تستحمل اللي هايجرالها، ثقافة نشرت العفن الفكري والعفن في كل شئ حوالينا، ونشرت التحرش والعنف ضد المرأة والنظرة ليها علي أنها مجرد جسد منحط بيحرض علي الفسق والفجور، إحنا أصبحنا مجتمعات داعشية بكل معني الكلمه.