أحد العاملين بالغردقة: 90% من العاملين بالقطاع السياحي مقتنعين إن "السياحة حرام"

خاص - الأقباط متحدون
تداول عدد من النشطاء، تعليق أحد العاملين في الغردقة، بعد حادث الاعتداء على 6 سائحات أمس الجمعة، حيث أشار إلى أن 90% من العاملين بالقطاع السياحي مقتنعين إن "السياحة أصلا حرام".

وقال "محمد ماهر"، أحد العاملين بالغردقة: "بمناسبة حادث الغردقة بتاع امبارح انا عايز اقولكم ان 90% من العاملين في قطاع السياحة مقتنعين تمام الاقتناع ان السياحة اصلا حرام وان الشيخ الشعراوي رفض يدخل شرم وقال انها بلد شيطاني وحجتهم في الشغل ده ان مفيش بديل وربنا يسامحهم بقا".

وروى "ماهر" قصة بشأن عداء بعض العاملين في السياحة للمسيحيين، وقال: "في العشر الاواخر من رمضان اللي فات كان عندنا رحلة تابعه لاحد الكنائس المصرية وحصلت مشكلة بين احد العاملين وبين احد النزلاء بعد ما النزيل سئل العامل انتم متعودين ينزل عندكم مسيحين كتير فرد عليه العامل وقاله لا والله انا عارف ايه جابهم عندنا يلعن دين ابوهم وكانت المفاجاة ان النزيل طلع مسيحي وعمل مشكلة كبيرة والعامل تحول للتحقيق ولما المدير سئله ليه قولت كدا قال انا بحسبة مسلم عشان ماسك سبحه في ايده".

كما أشار إلى أنه "في المصلية بتاعت الفندق حصلت مشكلة بين المصلين بعد ان رفض مجموعه من الاصطاف الصلاة وراء واحد زميلهم بحجة انه شغال (بار مان) ".

واختتم حديثه قائلا: "في النهاية انا عايز اقولكم ان العاملين في قطاع السياحة زي الاغلبية الكاسحة من الشعب المصري متشبعين بالفكر السلفي اللي غزا مصر في السنين الاخيرة".