الراسل: يوسف ثابت
ليه كده يا بلدي: ده أنا محدش خدمك قدي
عملتي فيا اللي ميتعملش: وأنا كنت بسكت وأقول معلش
أنا اللي بنيتك وأنا اللي عليتك: والمر في يوم عمري ما سقيتك
المر دة كان يادوب فطاري: والعذاب دة كان بيحلي مراري
لو سألتي الضربة الجوية هتقوللك أول واحد:
ولو سألتي السادات هيقوللك أحسن نائب.. وعمري ماكنت جاحد
أنا اللي حررت سينا وأنا اللي حررت طابا:
وبتصرفاتي خليت الكل يقولك ياماما
أنا اللي استلمتك وكان حالك يغم: طردتيني بعد ماخليتك أحسن أم
لو مش مصدقاني اسألي المترو يقولك: أو المدن اللي اتبنت على أرضك
اسألي كل شبر فيكي عملت ايه فيه و: حضارة الهرم كبرتها على أراضيه
ده حتي السلام أنا اللي معرفك بيه: وبعد كل دة ترميني ليه؟
في كل مكان تلاقي مدرسة: والتعليم نشرته بهندسة
كنت مدي حرية للجامعات: ولا انتي وحشك الماضي اللي فات
جيشك خليته من العشرة الأوائل: كنت بحارب علشان ميبقاش فيكي حد جاهل
وبكل قوتي حاربت علشان قضايا العرب: كنت بحاول ألحقهم قبل ما يبقوا جرب
الجرب دول الصهاينة والأمريكان: اللي اتقال عليا عميل ليهم وجبان
اسألي إسرائيل وهي تقولك شوكة في الزور: واقفة والعرب يقولولك أنا التندا
أنا اللي في يوم ما فكرت أبيعك ولا فكرت أبيع القضية:
 كان نفسي أخدمك لحد ما تموت الصحة فيا
60سنة مش فكرالي حاجة حلوة يا مصر:
 قابلتيني ليه بكل قساوة وشر
دة انتي معروف عن أهلك الجدعنة والأصل:
 مش هاين عليكي أقعد فيكي كام شهر
لو دورتي في تاريخي هتلاقي إنجازاتي كتير:
اسألي أي حد أو حتي ميدان التحرير
لما الثورة قامت ضدي مرضتش أجري أو أهرب:
 قلت أنا مش خاين ومش هاسيب حد يخرب
فضلت قاعد 18 يوم: يمكن على شعبك أهون
مهمهوش كسرتي وأنا في آخر سني:
 ولا الشباب تعرف يعني إيه موت ابن ابني
 بس شكرًا يا مصر على كل اللي عملتيه
وكل الإهانة والشتيمة والذل راضي بيه
بس برده ها موت فيكي ومش هابيع القضية
وكل لحظة في عمرك هتشهد عليا
***
أنا بقى يا ريس فاعل خير: جاي أقولك احنا ليه قعدنا في التحرير
ثورتنا يا ريس مش ثورة ضدك لا دي ضد نظامك
إحنا شباب تعبنا من ظلم رجالتك ورافضين توريث جمال مبارك
 قولي انت يعني ايه
أبقى خريج جامعة بس سواق تاكسي
 وأفضل طول اليوم أحارب يدوب عشان أعرف أكسي
ويجي عسكري المرور يقولي فين العلاوة: أو الشاي والوهبة أو الإتاوة
مدفع كل اللي حالتي لسلم العربية: وتبقى دي يا ريس بلد الديمقراطية
لما يطلع واحد يقول كفاية فساد وهو مش تبع حزب أو انحيازي:
وبكل ذوق أمن الدولة تشد معتقل سياسي
يعني إيه أعيش 30 سنة في قانون طوارئ:
يعني إيه الناس تموت في الأقسام ومش فارق
يا ريس كلنا عارفين يعني إيه موت الحفيد:
بس انت ليه مسألتش على دم خالد سعيد
لما مروه الشربيني اتقتلت وفد محامين راح علشان صورتنا بره:
ولما الناس تتقتل وكرمتها تداس عادي جوه
ولهشام طلعت مصطفي أرض مدينتي ب 2/1جنيه:
وللناس الغلابة كيلو اللحمة ب80 جنيه
اه يا ريس عملت معاهدات سلام ومترو الأنفاق
بس نسيت تعمل مع شعبك اتفاق
ان الميه مش هتقطع: إن الكهربا راح ترجع:  إن إيد الظابط مش هتوجع
لما أحمد عز ثروته ما شاء الله40 مليار:
وأنا على 100 جنيه ألف واحتار
ولما العادلي ورا حادث القديسين:
طب والناس اللي ماتت مدهوسين
وفجا منلاقيش أمن في الشارع: والتلفزيون يقولك الأمن مستتب وراجع
وانتخابات الشعب والشوري مزورة: وبتسأل الناس ليه لتاريخك مش مقدرة
ياريس انت عودتنا أو رجالتك عودونا
إن على رغيف العيش أقف طابور
وفي المصالح الحكومية لو مش واسطة بالدور
ولو مش هتدفع إكرامية يبقي أحسنلك غور
والميه توصلي أنا معكرة: ولناس تاني توصل مسكرة
ظلم فساد نهب خوف جشع احتقار: عايزني استنى لما تجبلي حقي.. موت يا حمار!!
أنا مش عايز أجرح اكتر من كده: بس انت اللي وصلتني لكده
تبقي مصيبة لو مكنتش تعرف: ومصيبة أكبر لو تعرف ومطنش
بس احنا ياريس مش هننسي اللي في يوم علشانه عملته
وحقك محفوظ ومش هناكله
انت عملت لينا حاجات كتير: وربنا قدرك على عمل الخير
أنا آسف ياريس لو تطاولت على حد قد جدي: بس سامحني أصل ده حقي
وصدقني يا مبارك يا طيار: جيشك وولادك مش هيسبوها تولع نار
واطمن بلدك هتلاقيها أحسن مما كنت فيها
وعيش جوها محمي بحواريها
 ونوعدك هنكمل هنكمل مسيرة الدنيا: لحد ما تعلى وتبقي على كل عالية
انت أكيد عارف إصرارنا وعزيمتنا وقوتنا.. ووقفتنا في الشدة
ومتنساش إنه زمان اتقال علينا
           مبارك دول شعبي مصر