قصيدة : صرخة مواطن

   الشاعر/ فادي ثروت مرتضي

 أنا أنسان مسيحى الاسم والعنوان
بقولها علنى ومش فى السر
هنكتب شعر
آه يا بلد دائما بتيجي عليا في كل حاجه كفايه عليا الحمل زدتي
وشوفتيهم وهم بيقتلوني لمجرد إني إسمي قبطي

أنا مش مسامح
 الى من يهمة الامر خليك معايا فى الحديث

أنا إسمي مواطن وجاي بستغيث
وقلبي اللي شايل .. وعامل عمايل ودمي اللي سايل وأصبح رخيص

تعبنا فخامتك  بقي لنا كتير بكلم سعادتك لأنك كبير
ولأني فخامتك بدوق المرير ولأني فخامتك على بلدي بغير

أما أنا مش مسامح
دموعنا بتحفر خلاص ف الخدود بحق الضحايا ... وحق الجنود
بطالب بحق اللجوء الإلهى  وحق شهداء الكناكئس
وحق اللي ماتوا هناك ع الحدود

أما أنا مش مسامح
وقلبي اللي قايد .. وفايض بخيره وهمي اللي زايد وحاسس بغيره
ودم الشباب اللي ملو الشوارع وشوف الكنايس..وشوف الجوامع

ودمي اللي لسه ما عارف مصيره ..............الله يعيننا
مالقوش طريقه تانيه يخشوا بيها غير إن هما يدبوا نار الفتنة بيننا
لعبوها صح وداسوا ع الجرح القديم اللي جوة في كف أيدينا

التكتيك مظبوط والوقت بالثانية والخطة شغالة
والمصري يمشي في أرض مصر مرعوب وخايف حالتة حالة
ومافيش مكان في أرض مصر غير لما ياخد بالعلامة

وأنا بلدي دايما رافعه راسها ودرعها عمرة مايتلويش
واللي قال إن مصر فيها فتنة  والإرهاب اللي فيها عمرة ماينتهيش

واللي قالوا أن المواطن المصري في سوق الإنسانية مايساويش
لية بتقول كلام مالهوش وجود وبنار الفتنة قسمت مصر لحتتين
وإن الشعب المصري في شهادة الميلاد بيتميز بخانة الدين
هي دي الحتة اللي بيلعب عليها الإرهاب وبيعافر

إني علشان حر في ديني يقول عليا إني كافر
أنا مش هسيب البلد دي لو هموت أنا مش مسافر
....بس برضوا مش مسامح....

يا لبس العيد ولله ماهتلاقي اللي يلبس كلو مات
وإن كان فيه حد فينا لسة عايش أكييد قلبة مات
ومعدش فية للفرح بيننا مكان خلاص بقي ذكريات
أنت ياشهيد اللي مت وأخدت معاك كل الحاجات

أما أنا مش مسامح
ياللي زرعت الشر نبتة في أرض الخير
مين مستفاد من الشر غيرك لية تأذي غير
بكرة هييجي الدور علينا ونفتكر اللي كان

وإني نبهت كتير إني مش لاقي الأمان
بكفاية الأسية والحرمان والكل بيقول عليكي أنك حنان
واللي بيداري الحزن والعتاب منك بالإبتسامة دة بتاع مصالح

أما أنا شربت من نيلك وأكلت من أرضك علشان كدة أنا مش مسامح
وزي ما أتعلمت فيها ولادي برضوا هيبقوا فيها...... قسمتي
لكن لما أشوف اللي بيحصل دة وأسكت وأقول قسمتي
يبقي كل اللي بيحصل واللي هيحصل في وطني منطقي