تسالى روحية صيامية بالعامية

الأب أثناسيوس حنين – مصرى صعيدى مقيم باليونان

قولى من أنتيمك (صديقك) ’ أقولك مين هو مسيحك !
هذا المقال ما يقراهوش الا الصايمين !!!

أنقضت على الخواطر دية ساعة قرأية انجيل الحد الثانى من صوم الاربعين فى كنيستى فى بارية (بيرية) زى ما بيسموها الصعايدة ’ النهاردة يعنى ’ والقصة من انجيل مرقص الاصحاح الثانى والعدد 1 -12 ’ والحكاية معروفة ’ بنسمعها من زمان وكام مرة قريتها بالعربى واليونانى والانجيزى والفرنساوى والقبطى ’ وما فهمتش حاجة برضة ’ الا قليلا ! ’ ويموت المعلم ولا يتعلم ’ فهمت انى ما فهمتش حاجات كثيرة فى النص بتاع الانجيل ’ وفهمت كمان أنى لما حن على ربنا وفهمت ’ متأخر قوى قوى ’ فهمت اللى على كيفى ’ وقصرت فى حق الانجيل زى ما بيقول الغيورين من أخوتنا الانجيليين .

فهمت أيه بقى ؟
فهمت وزعلت أنى قصرت فى حق اصحاب البيت وفى حق اصحاب الراجل العيان ’اللى كام وكام مرة قريت انجيل المفلوج وما ختش بالى من أهم نقطة فى الموضوع وهو البيت اللى قعد فيه يسوع يوعظ (سمعوا أنه فى بيت ) ’ كده علطول ’ بيت ! نكرة ! ouyiبيت واللغة القبطية رائعة كتبت البيت بالرابط (هو أى) اللى بيشير الى اسم نكرة ومش معرف اى بيت ما ! بيت وخلاص بيت والسلامة يا اخى ها تدوشونا لاه ! من غير ما يقول مين اللى سمعوا وعظة يسوع والبيت ده بتاع مين ! وزعلت من مار مرقص الانجيلى قوى قوى أنه ما قالش لنا حاجة عن البيت ولا صحابه ’ البيت اللى من غيره ما كانش يسوع ها يوعظ ولا المفلوج ها يقوم ولا حاجة عن صحاب المفلوج ومرض الفالج ده بعيدة عنكم مرض وحش قوى قوى ! (مر 2 :2 )’ البيت اللى سقفه من جريد النخل زى بيوت الفلاحين زمان ’ وأكيد ان الشباب الاربعة تعبوا فى انهم يفتحوا فى السقف من غير ما

يوقعوا حاجة على راس القاعدين جوة ومن بينهم يسوع ’ طبعا ما كانوش محتاجين للودر زى العمال اللى طلعوا (عين ) ’ أقصد ’ راس جدى رمسيس فى المطرية ’ لكن برضة اكيد تعبوا فى (نقب السقف ) ودى الكلمة الاصلية ومش (كشفوا) بتاع الأخ فاندايك ’ ولكن (نقبوه) زى اليسوعيين ما بيقولوا ’ والى ينقب سقف البيت ’ فى بلدنا ’ هو الحرامى ومش أى حرامى ’ دى صنعة ! يعنى يسوع مش بس غفر خطايا العيان ولكن سامح الاربعة اللى نقبوا السقف لانهم كانوا حرامية قدام وعملتهم مع العيان غفرت لهم ! أكيد ! وزعلت كمان أنه ما قالش حاجة عن تاريخ الاربع شباب دول (اكيد شباب عشان يقدروا ينقبوا السقف أو عواجيز متشبشبين ! ) واللى هو برضة عمل مش كويس ’ وعمل حرامية محترفين ’ والمحترف عليه ربنا زى ما كانت ستى تقول وتعرى راسها ’ ياترى خدوا اذن اصحاب البيت والا لع ؟’ عملوا كدة من دماغهم ؟ يا ترى خذوا ذن من البلدية بهد السقف والا لع ؟ تصور تلاقى سقف بيتك مهدود على دماغك وانت بتسمع وعظة ’ دا حتى ربنا ما يرضاش بالخراب ’ ونازل قدامك ’ فجأة ’ سرير

عليه واحد عيان ومشلول وبقه يمين ورقبته شمال وحالته عيضة وريحته فايحة !ومش بس كدة وعندك ضيف مهم بحجم قد يسوع !!! يا لهوى !!! يسوع اللى كل البيوت كان نفسها تستقبله ويوعظ فيها من غير تخريب سقف ولا أذية ! طب واصحاب البيت دول ’ دا من حقهم عمل شكوى فى المركز (الشرطة زى ما بنسميها فى بلدنا ) ! دا تخريب فى عز الضهر يا اخواننا !مش من حقهم تعويض ؟ معقول يسوع يوعظ فى بيت والبيت يتهد وهو قاعد ساكت ؟ بيقول الاخوة اليسوعيين فى ترجمتهم انه بيت سمعان ’ ولو برضة ’ بيت سمعان والا بيت عمران ’ دا تخريب ! ليه سكتوا اصحاب البيت ؟ ’ ومنين لقى قوة اصحاب المفلوج ’ والاهم ليه استسلم المفلوج للمجانين دول ! ما اعرفش هل المفلوج بيكون واع والا لع وعلى الاقل بيسمع ويشوف ! ياريت حد من الدكاترة يقول لنا رأيه !’ لازم يكونوا اصحابه جوى جوى جوى ’ فيه بينهم ربطة روحية كبيرة قوى !’ مش فعلة خير وبس عشان يعملوا عملة زى دى ممكن يقع فيها قتلة ’ الموضوع اكبير من كده ’ الموضع مش اخلاقى وبس ’ لع ’ الموضوع وراه سبب لاهوتى كبير !

القصة ممكن تتقرى بطريقتين ’ طريقة نسطورية ’ انفصامية ’ وانفصالية ’ يعنى ان الاصدقاء دول كويسين ومؤدبين واخلاق ومية مية وخيرين واولاد حلال وهنيالك يا فاعل الخير والثواب ! فعل خير تخريبى بلا مسيح ولا رؤية ولا نور من برة ولا استنارة من جوة ويتفلقوا اصحاب البيت’ ويسوع ما يهموش ’ مادام بيوعظ وخلاص !!! نقب سقف بيت الناس الفقرا دول وما قلش النص انه تم تصليح البيت او تعويض صحابه وما يكفيش نقول خذوا بركة لانه ممكن يكونوا خدو بمبة ! الا اذا خرج علينا الالهيين ومش المتألهين ! منا يقولون لنا ان البيت اتبنى تانى بين يوم وليلة بمعجزة ميتافيزيقية واتحلت المشكلة واجعين راسكم وراسنا ليه ! ’ المهم هو ان يسوع يوعظ ! ’

والطريقة التانية هى الطريقة المونوفيزيتية بالمعنى الانسانى والثقافى والسلوكى للتعبير ’ ’ يعنى المزاجية والالاوية وكله عند العرب معجزات ! وكله من عند يسوع ونعمة يسوع وحب يسوع ويتفلق اهل البيت واللى فى البيت بلا اعتبار لاصحاب البيت ولا لموقف الصحاب ولا لظروف الحادث وناسوت النص ولا لرأى العيان نفسه ! ’ هنا موقفين ’ موقف اخلاقى (دول ناس طيبين قوى قوى يا خال !) ’ يعنى قصة اخلاقية بلا لاهوت ونعمة (فصل نسطورى) يسوع فى حته والناس فى حته والسقف فى حته واصحاب البيت فى حته والصحاب فى حته أو قصة الهية بلا ناسوت وشركة (خلط مونوفيزيتى) يعنى كله من عند ربنا مالنا احنا ومال البيت واصحابه ’ انشالله يتهد على راس صحابه ! مالنا احنا ! وبعدين الصحاب عملوا عمل خير ’ ربنا يعورهم قصدى يعوضهم مالنا احنا ’ خلينا فى يسوع ومع مريم ومالنا ومال دوشة مرثا ووجع الراس !وكلها بيوت ربنا بلا دوشة وتفسير وتعب ونصوص اصلية وبتوع التفسير دول ناس رايقين يا عم !بياكلوا من قتة محلولة ! زى ما كانوا ناس زمان لما يلاقوا واحد بيتكلم كثير وبخلط الدنيا فى بعض يقولوا له (انت ها تمعكه يعنى) ! احنا ’ بتوع اللاهوت ’ مش عاوزين نمعك ’ احنا عاوزين نفهم !

دا كله حصل فى القداس النهاردة ومن وقت للتانى يبص على ابونا اليونانى عشان اصلى فى دورى يلاقينى ماسك ورقة وقاعد وباكتب من اليمن للشمال بالعربى ! الراجل اتحول وقال فى نفسه بس اثناسيوس (مخه طق خلاص من كثر الكتب !) ’ عشان كده دا كله خلانى افكر بطريقة تانية وأدور على مخرج قانونى (واحد صعيدى بدا يفكر ربنا يستر ! ) ’ أه هى ’ مع انجيل المفلوج وفى نفس القداس بنعيد ’ فى الكنيسة الارثوذكسية الرومية ’ لتذكار وحضور قديس عظيم وعالم كبير من القرن الاتناشر وهو اغريغوريوس بالاماس ’ طب وايه يعنى ! مش قلنا ان مخ ابونا اثناسيوس طق وخلاص !واحنا مالنا ’ يا عمى ’ ومال بالاماس وبالامند !وايه دخل بالاماس فى انجيل المفلوج ! بلا دوشة بقة ! اصبروا على بس شوية وهى مصر بنوها فى يوم زى ما بتقول امى ! اصبر على انت اصلك مش عارف مين بالاماس وانا زيك ما كنتش باعرفه ! دا شغلانة طويلة عريضة ! ؟ ولو عارف ماربطتوش بانجيل النهاردة لأنى ما كنتش لسه فاهم ان الانجيل هو ليتورجية الكلمة ولا يفهم الا فى ليتورجية الخبزة ! أهههه بدأنا نلخبط تانى ! يا عم بس اصبر وساعدنى لانى انا احتاجك معاى ’ ما هو بالاماس دا هو اللى عاش وقال وداق وشاف وكتب عن النور الالهى ’ يعنى نور ربنا الحقيقى ’ من غير ما يتحرق بجوهر اللاهوت ! شفت مش قلنا ان بتوع اللاهوت دول مخهم ضارب ! صدقنى لع احنا بنشوف نور ربنا حقيقى بس ما بنشوفش ربنا نفسه لان لا يرى حد الله ويعيش ! مش كده زى اللمبة بنعيش نورها ونحسه وندوقه بس ما بنروحش نحضن اللمبة او نتبت فى السلك ! ! بالاماس قال انه فيه نور من نعمة يسوع يحل فى قلب ومخ المسيحى الحقيقى وينور عليه ’ وسماه النور الغير المخلوق ’ يعنى جاى من عمل(الانيرجيا) ربنا ومش من جوهر ربنا (الاوسيا)! وده سببه ان يسوع هو كلمة الله الانسان يعنى بقى انسان حقيقى والانسان يسوع الحقيقى اتحد

باللاهوت الحقيقى ’ وبقينا فى ناسوت يسوع الحقيقى نقدر نشوق ونذوق لاهوت ربنا الحقيقى ’ من غير ما نبقى ربنا ومن غير نتحرق ’ نبقى زيه ماشى ويبقى هو اخونا الكبير برضة ماشى زى مال قال بولس ! ودا بيسميه بتوع اللاهوت (تبادل الخواص بين اللاهوت والناسوت فى شخص المسيح الواحد ) ودا عشانا احنا وعشان خلاصنا وعشان يحصل فينا بالنعمة الموهوبة لنا من الهع فى المسيح بالروح القدس ’ يبقى الموضع يستاهل تعبه ودا معناه ان يسوع وسيط وما فيش غيره بالمعنى ده وسيط خالص !بس الناس اللى حبوه واتقدسوا بيه واتعلموا منه هم عيلتنا الكبيرة وومكن اوسط اخوى الكبير عند ابوى واختى عند امى وكده يعنى القديسين العلماء فى بساطتهم والبسطاء فى علمهم متوسطين مش وسطاء !.حلو وده ايه علاقته بالمفلوج والبيت والصحاب ؟ علاقة جامدة قوى لان نور المسيح اللاهوتى والظاهر فى ناسوته قدام الناس ’ فى البيت ومن خلال كلمته اللى هى نور ’ عشان كده يسوع كان انسان محبوب من الله والناس وبينموا فى النعمة فى شركته اللاهوتية مع الله الأب وفى شركته الناسوتية مع الناس

عشان احنا ننموا فيه ونبقى زيه ’ وكان بينور الكل ’ بالنور الالهى الساطع فى كلامه واعماله وحركاته الانسانية جدا والعادية جدا واليومية جدا’ لاهوت وناسوت مع بعض وفى بعض وما حدش يعمل حاجة لوحده حتى لو بان ان اللى بيعمل هو يسوع الانسان أو يسوع الاله ’ هو شخص واحد ورب واحد وذوكسا واحدة وسجدة واحدة ! فقرروا ’ كلهم ’ بارادتهم الحرة وحريتهم المريدة ’ طبعا ’ بلا جبرية ولا قدرية ’ ان يشاركوا بدون اتفاق مسبق فى هذا العمل الالهى اللى ظهر على الارض وفى البيت وفى المفلوج وفى السقف وفى الحاضرين . هما عاشوا الموقف بكل كيانهم وسلموا

نفسهم للكلمة اللى بيوعظها يسوع واستنارت عقولهم وتقدست قلوبهم ونشطت ارادتهم (يعنى بقوا كنيسة روحية قبل الكنيسة التاريخية )’ وطبعا عارفين يسوع وسامعين عنه يعنى قاريين العهد القديم وعلامات الزمان ومشتاقين يقابلوه ’ مش حاجة فجعة كدة ! ’ فقرروا ان يعملوا اللى عملوه ’ واتبنت النعمة قرارهم وباركتهم ’ اسعى يا ابنى وانا اقدسك ! التانية مش بتاعتنا !!! ’ وصحاب البيت ما اعترضوش على اللى حصل ’ كان نازل على الجميع مش (سهو الله ) ولكن (نور الله) الغير المخلوق اى نعمته اللاهوتية العاملة والفاعلة فى الناس من خلال شركتهم الفعلية فى حياة والام وقيامة السيد المسيح . هنا يحلو الكلام ونرجع لموضوعنا ولسؤالنا قل لى من صديقك انتيمك’ أقولك مين مسيحك حبيبك ؟ السؤال مهم وسط الغربة اللى بنعيشها النهاردة واللى بقيت فيها وسائل التواصل الاجتماعى اسم على غير مسمى ’ بقيت وسائل (التنافر الاجتماعى) ! ’ لان النهاردة ’ الكل ’ ما عدا قلة جريئة ’ بيقدموا انفسهم للناس على (القفا بوك ) كما اسميه انا وليس (الفيس بوك ) وباسم مستعار (بنك نييم !)زى ما بيقولوا الخواجات ! يعنى

كلنا لابسين قناع ! كرنفال وثنى زى بتاع ريودو جانيروا كده وكله ’ فجأة ’ وبدون تعب ولا سهر ولا تخزيق عيون ولا تفضية جيوب ’ بقى عالم لاهوت وكله بقى عالم نفس وكله بقى مؤرخ وصحفى وناقد فنى ورجل سياسة وشيخ روحانى حضرته ! وقاعد ورا اللاب بتاعه عماله يلب فى الناس ويلبلب على الناس ويبلبل عقول والسنة الناس ! عمال على بطال بلا دراسة ولا توثيق ولا تعب ولا جرأة روحية وعلمية وصحة نفسية ولا قدرة على قبول الرأى المختلف من ناس درسوا وتخصصوا وتعبوا ! وبالمناسبة قريت بحث لعالم نفسانى فى جريدة اوربية بيقول ان هناك من اصدقاء ! القفا بوك بيجيلهم امراض نفسية لما ما يلاقوش لايكات كثيرة على الكلام الفارغ اللى بيكتبوه ! ولا تستبعد أن تنفتح مكاتب علاج نفسى لمرضى اللايكات ورزق الهبل على المجانين ! ! طبعا لما الواحد يكتب حاجة عميقة وحلوة ويلاقى لايك بيفرح وبيتشجع بالشركة مش اكثر ! دا موضوع تانى خالص ! وفين تلاقى وجه صديق ’ صدوق ’ صادق ’ ومصداق ’وصديق !

أقول وممكن الصحاب اللى بيقروا كل واحد يلاقى حاجات تانية احسن منى

أولا صديقك لازم يكون جرئ ومش خواف
اللى ميز اصحاب البيت اللى اتهد واصحاب المريض اللى نقبوا السقف والمفلوج اللى سلم نفسه لشلة اصدقاء مخابيل بيخرموا سقف البيت عشان يعالجوه بدل ما يودوه لطبيب ’ هو الجرأة وحب المغامرة والاصرار وعدم الايمان بالمستحيل (راجع ماتش باريس سان جرمان مع برشا زى ما بيسموها الشباب !)! الانسان كائن ديناميكى ومش ستاتيكى ! يحب الحركة والمغامرة جرئ مش تمبل ! مش من حزب (وأنا مالى وأنا مالى ...) وهو الشعار الوطنى والنشيد القومى لجمهورية (وأنا مالى الكبرى! ). مية مليون بنى أدم من خير أمة أخرجت للناس فى بلد له تاريخ عريق وحاضر يتمخض ومستقبل واعد ! يقدروا يحفروا الصخر ويعمروا الصحراء ويجيبوا عاليها واطيها للخير !’ مستنيين رغيف العيش من الحكومة !!! تصور !!!فين الجرأة !تصور ناس يتهجر قدام عينيهم جيران ليهم وعشرة من سنين ايا كان ملتهم وهما واقفين زى التيوس بلا حركة ولا اعتراض ! فين النخوة ! ولا كسوف ! فكرتونى بكلمة قوية لاغريغريوس الثيثؤلوغوس بيقول (هناك اوجاع نحتاج الى جهد لنخلص منها ’ انا فاهم ده صعب ’ بس اللى انا مش فاهمه ’ هو عدم الكسوف والخجل من هذه الاوجاع ! ) شوية خجل صحيح اللى اختشوا روحيا ولاهوتيا وانسانيا ة ماتوا ولا عزاء للحاقدين والجبناء ! فين الشجاعة اللى تحفر فى الصخر وتتحدى المستحيل ! ها تلاقيها بس فى الاغانى الوطنية جدا ! قال لى صديق ’ صدوق منياوى جدع فى زيارتى الاخيرة للمحروسة (لو ما كنتش تتعب طول عمرك عشان تفهم ’ عمرك ما ها تفهم ! ) شكرته !

ثانيا صديقك لازم يكون مبدع مش مبتدع
اصحاب المفلوج مبدعيين وخلاقين ’ مش بالصدفة ’ مبدعين عشان ذاكروا و درسوا الموقف والظروف كويس واتناقشوا مع بعض وممكن يكونوا اختلفوا واتخانقوا وبقوا اصحاب برضة عشان مصلحة الكل وعمار البيت وشفاء المريض وفرحة يسوع ! اكيد انهم قالوا لصديقهم المريض بيفكروا فى ايه واتشاوروا معاه ! وهوب طلعوا على السقف ’ اللى عارفين النوع ده من السقف مش سهلة العملية خالص ونقبوا السقف بايديهم والا كان معاهم عدة مش عارف ! ابداع وعمار بس شكله البرانى تنقيب وخراب ! لو جماعة من اياهم كانوا حطوه ولطموا عليه ! وشحتوا عليه ! او كانوا فجروا البيت على راس اللى فيه عشان خاطر ربنا !!!

النهاردة بصيت لايقونة القديس اثناسيوس جوة الهيكل بطوله وعرضه ’ وقلت له وانا زعلان منه وزعلان عليه ’ أه زعلان عليه ’ مش ابوى وشفيعى مش وسيطى ! ( يا ما بيتكلموا عليك وبيخطفوا من كلامك وبيقولوا باسمك حاجات ولا قروك كويس ولا عرفوك ولا درسوك ولا حطوك فى سياقك التاريخى واللاهوتى ولا قروك مع بقية حبايبك واخوانك اللى قبلك والا اللى بعدك ’ والاوسخ من كدة أنهم يستعملوك عشان يردحوا لبعض و يبرروا انقساماتهم وابتداعاتهم وبدعهم وانت منهم جميعا برئ وبتبكى عليهم كلهم !!! وبدال ما يبدعوا باسمك ’ بيبتدعوا على حسك !!! ). عشان كده بولس حذر تلاميذه تيموثاؤس وتيطس ’ وهم ناس كبار وخدام ولاهوتيين مش عيال يعنى ’ من البدع والمبتدعين (الرجل المبتدع بعد الانذار مرة
ومرتين اعرض عنه ) تيطس 3 :10 ومن الناس اللى صارت لهم التقوى تجارة ومهنة وحرفة وسيليوة وسبوبة !(1تيمو 6 : 5)

ثالثا صديقك لازم يكون مبادر ومش خيبان
المبادرة الكبيرة فى القصة هى مبادرة قبول اصحاب البيت ان يتم ما تم فى البيت من تخريب ’المبادرة هى فى بذل الذات وتقديم البيت فى عمل الخير ونشر الحب . كان ممكن يرفضوا ’ لا يوجد جبرية فى رسالة يسوع ’ هم اختاروا سماع الكلمة ودفعوا الثمن ’ بيتهم اتهد ! النعمة مجانية ’ نعم ’ ولكنها ’ مكلفة ’ قال احد الاصدقاء الجدعان قوى !

رابعا صديقك لازم يكون مؤمن ومش ملحد
لاشك ان الايمان والالحاد قضايا نسبية على راى استاذنا مراد وهبه ’ ولكن هذا ليس معناه تعويم الموضوع ’ يسوع لوحده يكفينا زى ما قلت للفيلسوف وهبة فى حوارنا على اقباط متحدين نعم فى البدء كان الكلمة ة ولكنه صار جسدا ’ نحن ننزه الله الأب ولكننا ننزل الله الابن المسيح اللوغوس ! احنا بنبشر بيسوع واياه مصلوبا ’ عثرة للمتدينيين والاصوليين ’ وسخافة وجهالة وتجهيل للمفذلكيين والميتافيزيقيين ! احنا بنكلم الناس عن يسوع وبس ! لا طايفة الا فرقة ولا شلة ولا عزبة ! لما يقابل يسوع فى عظة زى بتاعة النهاردة الكل بيجرى عشان يخدم بروحه ودمه وفلوسه وسقف بيته وخطر

طلوع السطوح ! ها يتعرف الناس على البيت بعد ما شافوا حلاوة رب البيت ! لازم يقابلوا يسوع فى بيته بعد ما قابلوه فى بيت الجيران وبيته ’ تاريخيا ’ مكون من عشرين دور يساوا عشرين قرن ’ اتبنت بتعب وعرق وسهر !وفيه ناس عاوزة توقف البيت عند الدور الرابع وناس عاوزة توقفه فى الدور السبع تاشر ! وتفجر باقى الادوار على ادمغة اللى لفيها ’ بس بعد ما ينقبوا سقوف باقى الادوار ينهبوا خيراتها اللاهوتية والعلمية وينسبوها لنفسهم وبدون ما ينزلوا مفلوج واحد من سقف اى دور !وبس بيخانقوا على مين ليه فضل بنى البيت كله أو حته منه ’ حته منه ولا كله او حته منه ! ومش عايز الناس تقرف مننا و تلحد ’ يا ررررراجل ! كثير من الشباب الطيب والذكى النهاردة هو ملحد نفسيا وليس وجوديا !’ الانسان بيقول (يا ربى ...) فى أهم لحظتين فى حياته ’لحظة الخطر الداهم ولحظة النشوة الغامرة ! بدون ما يكون مؤمن او ملحد ة بتطلع طبيعى من انفاس ايقونة الله فى كل نفس ! انا التقى اليوم ثقافيا وروحيا مع الكثيرين من الشباب (الملحد!) اكثر ممن يدمنون تعاطى المخدرات الدينية والخزعبلات والاكاذيب السياسية !

ممكن اللستة تكبر و اترك لكم تكملوا فى البحث فى النص عن يسوع واصدقائه وعائلته ’ وطبعا يسوع ’ اول واخر ’ هو البيت وهو رب البيت والبيت هو كل البيت وليس ادوار منه ’ لأنه بيت الصديق الوحيد الالصق من الاخ بيت العز اللاهوتى والناسوتى يا بيتنا .