بقلم : ماجد ويصا

إمبارح و زي كل يوم من أيام الاسبوع اللي فات أصحى الصبح الساعة 10 أو11 قبل ما أفتح عيني و أصلي أو حتى أغسل وشي اضغط على الريموت كنترول اللي بينام تقريبأ فى حضني اقلب بسرعة فى قنوات العربية و اون تي في و الجزيرة و اخبار مصر و البي بي سي خايف يكون فيه حاجة حصلت فى الكام ساعة اللي عدوا علي و انا نايم مع اني مش نايم ..
مع اي صوت باكون قمت و صحيت خايف .. يمكن المهم اشغل التلفزيون و اعلى الصوت علشان اسمعه و انا باغسل وشي و اشرب النسكافيه شويتين قدام الاخبار و لو محتاج حاجة من الشارع احاول انزل اجيبها كل الناس فى الشارع هجوم مكثف على السوبر ماركت و مخابز العيش بصراحة بقيت استسهل و اجيب عيش فينو علشان الزحمة الناس كلها فى الشارع يا إما بتتخانق مع الناس التانية يا بتشتكي من كل حاجة يا بتتكلم فى السياسة رجعت البيت قبل ما أغير هدومي الحق اجري على التلفزيون و اشوف اخر الأخبار الموضوع مش سهل قوي لأن غالباً الوقت ده - وقت خروجي - هو الوقت المفضل لبيشو ابني علشان يتفرج براحته على كارتون او قنوات الرياضة و غالباً على غير المعتاد تنتهي هذه المعارك اليومية لصالحي تقديراً منه لأهمية و خطورة المرحلة الحالية أنا جعان عايز اتغدى تأكل إيه مش عارف أي حاجة ده الحوار المتكرر و المعتاد بيني و بين زوجتي 3 أو 4 مرات يومياً بخلاف المعتاد أكيد وزني زاد الكام يوم دول ارجع تاني للأخبار لحد ما أنعس و أنام شويتين و لا زلت أحتفظ بالريموت كنترول مع ملاحظة ضبط التايمر على 30 دقيقة أخبار لحد ما أنام ساعة أو ساعتين بالكتير و أصحى تاني أبدأ استعدادات الحرب بنطلون جينز و جاكيت شومة ميراث من أجدادي الضربة منها ممكن بجد تموت.. كبريت فى جيبي علشان نولع النار و نتدفئ مفتاح قفل سلسلة باب البيت الجديدة طبعاً مناديل ورق علشان البرد كوفية و شراب و ممكن موبايل من الاتنين لحسن التاني يضيع أو يتسرق
نزلت من البيت الكمين مستعد عند اول الشارع موقعي عند باب المدرسة تقريبأ حواجز و متاريس بالحجارة و شوية دواليب قديمة للنجار اللي على الناصية المتواجدون بالكمين فراشين المدرسة و دول بيقعدوا للساعة 2 أو 3 الصبح بس و يناموا جيران من أمامي و حولي واحد معاه كرباج سوداني أصلي واحد معاه ماسورة حديد و التاني معاه خشبة مثبت فيها سكينة مطبخ زي الحربة تمام قنابل مولوتوف محلية الصنع
تبدأ السهرة كلام فى السياسة فى الأول شتيمة فى البلد و الحكومة شتيمة فى المتظاهرين شويتين ضحك على اي حاجة فجأة تبدأ الصفافير و الصيحات الحق مسكوا عربية عند موقف 43 مليانة سلاح هم دلوقتي عند كوبري النعام و جايين علينا لا دول جايين من عند المزرعة و الارض اللي فى المسلة هم مخزنين السلاح هناك و بيحاولوا يطلعوه ........
من الآخر كلها اشاعات محدش شاف حد بعينه كله سمع محدش شاف نولع فى شويتين خشب علشان نتدفى تشوف بعينك من أول الشارع للأخره 4 أو 5 ولعات نار المشكلة فى الخشب بسيطة نكسر الشجرة اللي قدام بيتي يااااااه الشجرة خلصت تقريبا و لسه عايزين خشب مفيش مانع نولع فى دكك المدرسة القديمة للاسف مش مكفية و الجو برد مش فاضل غير المتاريس الخشبية مش عارف بكرة هنولع فى ايه تاني اول يوم الموضوع جاد جدا و الكل متحمس و على اعصابه لو حد دخل كان مش بس هيتضرب يمكن يموت العربيات بتتفتش التوك توك ممنوع يدخل الموتوسيكل مخوفنا بطايق و رخص و الشباب مبسوط بلعب دور الشرطة الدنيا بعد كده ابتدت تهدى خلاص اتعودنا العدد قل خلاص الشباب بتحاول تصحصح بلعب كورة ساعات لللأسف الكمين اللي قبلنا بيشرب و بيهيس و بينزل السماعات و الأغاني اصبحت الشوارع بالليل قهوة كبيرة مفتوحة شيشة و سلاح و حكاوي و دخان ابيض و ازرق مبادرات جميلة من شباب فعلا حلو يلا ننور الشارع تعالوا نكنس الشارع و ننظفه كله تضييع للوقت بشكل ايجابي و حلو بجد اتعرفت على كل سكان و شباب المنطقة اللي كانوا ساكنين جنبي من سنين و مكنتش حتى اعرف اساميهم يمكن دي الميزة الوحيدة
اخيرا بعد الفجر بشوية و بعد ما يتسرسب من الكمين بتاعنا واحد ورا التاني انا كمان تعبت اطلع البيت و انا قلقان يمكن حد عارف و مستني ان احنا نطلع و يستغل الفرصة و يهجم مفيش غير ربنا هو اللي يحرسنا نسيت اقول باحاول اصلي و انا قاعد فى الكمين و اخلص قانوني ... باحاول اطلع البيت مش شايف قدامي الاقي بيشو بيحاول ينام او بمعنى ادق بيمثل انه نايم اول ما يحس بي على السرير جنبه يمد ايديه و ياخدني فى حضنه و يبدأ ينام زوجتي تقول لي انه مش عارف ينام بيعيط على طول بيصرخ و يبكي و يقول خايف على بابا خايف على البلد

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :