بعد قانون الصحافة.. الحسيني للحكومة: «لو عايزين إعلام نازي.. ملناش فيه»

  انتقد الإعلامي يوسف الحسيني ما اعتبره سعيا من حكومة المهندس شريف إسماعيل إلى تقييد حرية الصحافة والإعلام من منطلق أن وسائل تعمل ضد مصالح الدولة، على حد تعبيره، قائلًا: «هو عشان أنتم فشلة، مش عايزينا نقول كده».

وهاجم الحسيني، خلال حلقة أمس الاثنين ببرنامج «السادة المحترمون»، المذاع على قناة «أون لايف»: الحكومات السابقة: «الحكومات الأربعة الأخيرة نسيوا إن الإعلان لعب دور كبير جدًا في إنجاح ثورة 30 يونيو، وكانوا خط المواجه الأول أثناء هذه الفترة، ونسيوا إنهم كانوا مهددين في أسرهم وجيرانهم وأصدقائهم.. حكومة دلوقتي شايفة إن الإعلام بيشتغل ضدها ومش عايزة تديله حرية واسعة».

وأضاف الحسيني: «حكومات تتصرف بمنطق مناديل كلينكس، اللي بستخدمته منها بعد شوية بترميه.. منتهى السذاجة، شكلهم ما بيقروش تاريخ، عمومًا مش مشكلة خالص، على رأي محمد صبحي: اعمل نفسك مش واخد بالك وطنش خالص، ولكن على الباغي تدور الدوائر».

وتابع الحسيني: «دايمًا المعركة اللي بتدور بين المعارضة (اليسار) والحكومة تحسم في النهاية ليسار السلطة وليس للعكس، فلو عايزين إعلام نازي قولوا لنا، بس قلة مننا (الإعلاميين) ملناش فيه مكان في الإعلام ده، عشان نطلع على المعاش بدري بدري ونشتغل في أي حاجة تانية».