اااه من مرارة الألم والحسرة الزايدة
ناهد شاروبيم
٢٦:
٠٥
م +02:00 EET
الثلاثاء ١٣ ديسمبر ٢٠١٦
الشاعرة ناهد فاروق شاروبيم
اااه من مرارة الألم والحسرة الزايدة
اااه من النار اللى جـوة القلب قايدة
اااه ع الـحـبـايب اللى سابونا فـجـأة
قتلهم مجرم .. ماعندهوش رحمة ولا شفقة
يا مين يقولهم .. فـراقـهـم نـــااااار
وحشنا حضنهم .. ومشتاقين لهم بإستمرار
يا نور عـيـونـا ..وحـشـتـونـا
يا فرحة قلوبنا .. وجـعـتـونـا
إستفاد ايه بس الـمجرم اللى قتلكم !
غير إنه حرمنا منكم ومن ضحكتكم
يا ورود قطفها الـغـدر قبل الأوان
يا رياحين خنقها الشوك والزوان
فُراقكم سـكـاكـيـن جازت ف قلوبنا
يا مرارنا ف بعادكم .. ايه العمل قولولنا
شـكـوتـنـا ليك يـارب وحـدك
حقنا وحقهم .. أمـانـة عندك
بدموع عيونا بنترجاك كـلـنـا
وصلهم سلامنا وأشـواقنا وحُبنا
أمانة يا عدرا صلى من أجـلـنـا
لإنك عارفة وحاسة ب غلاوة الضنا
كونى ليهم الـحـضـن والـحـنـان
وإدينا على أد غلاوتهم صبر وإيمان
#شهداء #البطرسية #11ديسمبر2016
أعتذر لأننى أتكلم بلسان هذه الام التى تحاول ان تحتضن صناديق بنتيها الوحيدتين الشهيدتين (فبرونيا ومارينا ) قلبى معاكى ومصر كلها قلبها بيبكى معاكى ..ربنا يعزيكى ويعزى كل اللى فقد بنته او مراته أو أى عزيز له .. مصر كلها تئن وتتألم بل وتحتضر من أجل ابنائها.. عزائنا الوحيد انهم أحياء ينعمون بالسلام والطمأنينة فى أحضان رب المجد ف هنيئا لهم بملكوت السموات
