بقلم: مروة رخا
صيف 1999
عدت عليا واحدة صاحبتى فى شغلى – كنت وقتها مديرة العلاقات العامة فى فندق بيراميزا – و كان شكلها زى الزفت.
سألتها مالها و إيه اللى جابها فجأة. قالت لى انها خايفة يكون عندها سرطان.
طبعا أنا اتفزعت و سألتها ليه بتقول كدة قالت لى ان الـ period جات مش فى ميعادها و بتنزف بقالها 10 أيام و عندها مغص جامد مش زى كل شهر.
نزلنا من المكتب و ركبنا عربيتها و احنا مش عارفين هنعمل إيه.
أنا ماعرفش دكاترة و هى مش متجوزة و مش virgin.
بعد لف كتير قلتلها "هو انتى رايحة تكشفى و لا رايحة تناسبى ... انتى مريضة و من حقك العلاج"
سألتنى هنعمل إيه قلت لها خليكى سايقة على اليمين و أنا هقول لك. هى ساقت و أنا قريت كل يفط الأطباء اللى فى العمارات اللى على الشارع لحد ما لقيت يافطة دكتور نساء.
ركننا العربية و طلعنا سوا و أنا نبهت عليها انها ما تتهزش و ما تتوترش و تقول للراجل بقلب جامد انها متجوزة و تشرح له الأعراض.
الدكتور طبعا ما دخلتش عليه الحكاية بس دخل معها حجرة الكشف و أنا قعدت برة. شوية و خرج و شوية و هى خرجت و شوية و نزلت أنا و هى.
"أنا كنت حامل و سقطت و لازم أروح بكرة المستشفى أعمل عملية كورتاج و إلا هاتسمم" و انفجرت فى العياط على أول طفل تحمل فيه و تسقط و نسيت انها لو ما كانتش سقطت من نفسها كانت هتبقى كارثة!
بعدها واحدة صاحبتى حملت من جوزها و هو مش عايز عيال و فضلت تتحايل عليه يحتفظوا بالطفل ... رفض و حلف عليها يمين طلاق - قهرها! أجهضت الحمل و فضلت تحلم بطفلها اللى قتلته فى صمت و فى ألم و لوحدها.
بعدها واحدة قريبتى كانت لسة والدة و حملت بالغلط و قررت بالاتفاق مع جوزها انهم ينزلوا الطفل و بعد العملية قعدوا هما الاتنين يعيطوا و يتبادلوا الاتهامات!
و ستات كتير ... متجوزين أو مش متجوزين ... حملوا من رجالة مش عايزين عيال ... و الست هى المسؤولة الوحيدة عن التخلص من الجنين!
أنا عمرى ما حملت و لا عمرى سقطت و لا عارفة أى حاجة عن المعاناة النفسية أو الجسدية اللى الست بتمر بيها عند فقد أو قتل الجنين! لكن ... خليكوا معايا ..

شتاء 2004
توتا!
توتا دى أول قطة نتاية دخلت بيتنا ... توتا اتجوزت مشمشة و خلفوا 4 قطط زى القمر فى 2001 و فضلت توتا تحمل و تولد و أنا مستمتعة معها بأمومتها اللى تعلم البشر يعنى إيه أمومة.
فى شتاء 2004 توتا كانت حامل و قعدت استنى توتا تولد ما بتولدش ... و أنا حاسة ان فى حاجة غلط ... رحت بتوتا للدكتور قال انها لازم تولد بعملية قيصرية ... قعدت برا و أنا قلبى هيقف من الخوف ... شوية و الدكتور طلع و قال لى ان الـ 3 بيبيهات ماتوا لكن توتا كويسة و سألنى لو كنت عايزة أشيل لها الرحم. فى لحظة غبرا من لحظات الإنسانية المنعدمة وافقت و قلت له ان أنا عندى قطط كفاية.
بعد العملية توتا فاقت ... ضعيفة .. هزيلة ... حرارة جسمها واطية ... و صوت أنينها لسة فى ودانى لحد دلوقتى. أول لما روحنا البيت توتا زحفت على بطنها فى البيت كله و هى بتدور على ولادها اللى كانت مستنيا تخلفهم و ماتوا. هى ما تعرفش انهم ماتوا. قلبت البيت زحف و عياط و فى الأخر مسكت قط تانى صغير – ابن قطة تانية عندى – من رقبته و أصرت ترضعه و كأن هو دا البيبى بتاعها!
أول مرة أعرف ان الأمومة ممكن توجع للدرجة دى. أول مرة أعرف ان العلاقة بين الأم و الجنين اللى لسة ما اتولدش بتبقى قوية كدة. توتا اتجننت على ولادها اللى ضاعوا منها و على الرحم اللى اتشال و هورموناتها اتلخبطت و تحولت من توتا القطة الحنينة الهادية لمجنونة رسمى ... بقيت بتنط من الأرض لفوق التلاجة و فوق البلدكانة و فوق دماغى ... بحثا عن أطفالها.

صيف 2009
حطيت لينك لفيلم بيشرح عملية الإجهاض و بينفر منها باستعراض الأجنة الغير مكتملة النمو اللى اتقتلوا ... و اتهاجمت بشدة من كل من يساند حق المرأة فى الإجهاض. و طبعا الشباب الهمام المتدين قعد يستغفر ليه و للزمن.
أنا بقى ليه حطيت الفيلم؟
مش علشان أخوف الستات من الإجهاض ... أنا أصلا مش فارق معايا مين تعمل إيه فى جسمها ... كل واحد حر فى نفسه. يعنى أنا ضد أى قانون أو تشريع يفرض على المرأة الاحتفاظ بطفل مش عايزاه أو التخلص من طفل محتاجة له ... دا جسمها و هى حرة فيه و بما ان الجنين دا جزء من جسمها و جواه تبقى حرة فيه هو كمان.
أنا حطيت الفيلم علشان
1)كل واحدة مصاحبة واحد و هتنام معاه تفرجه على الفيلم و تقول له انها لو حملت مش هتسقط (مش عايزة تأفف .. حصل و بيحصل و على كل المستويات!)
2)كل ست متجوزة تفتكر انها مش لازم تتحمل الألم و الذنب و المعاناه دى علشان متجوزة راجل ما بيحبش يستخدم condoms
3)علشان كل واحدة تتأكد ان اللى معها راجل بجد و مش هيعمل كدة فيها و فى ابنها ... أصل الرجالة لسة فاكرين ان اللى بتحمل دى بتحمل من الهوا و انه مالهوش يد فى الموضوع دا ... هى حملت يبقى هى تتصرف ... و البيه كان فين أصلا و فين مسؤوليته؟

يا رب ما تحطنيش فى الموقف دا! أنا مش هقدر أحمل فى طفل و اتخلص منه و لا هاقدر أفقد طفل بعد ما ولدته!
Abortion is not birth control
الاجهاض ليس طريقة لتحديد النسل
***

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :