بولا وجيه
 لاول مرة وبعد ما ربنا خلاني أخيراً أحس بالعيد بجد بعد الخسسان والذي منه قررت أني أروح أحضر ليلة أبوغالمسيس ولمن لا يعلم ليلة أبوغالمسيس دي الليلة اللي بتتعمل بعد الجمعة العظيمة (جمعة صلب المسيح).

بعيداً عن روعة التسبحة والصلاة والروحانيات اللي كانت في الليلة بس اللي أحزني وبشدة هو تصرف أحد الأباء الكهنة لما الشباب الصغير بتاع إبتدائي وإعدادي دخلوا علشان يقعدوا في الهيكل فمكنش في تصرف منه غير أنه يقول أطلعوا برة .. لحد ما تعرفوا معني كلمة كنيسة أو هيكل.

ده كان الموقف الأول؛ زائد بقي موقف يوم التلات بليل لما جه أبونا مع الأعلامي "وائل الإبراشي" في برنامجه "العاشرة مساءاً" واللي بيتذاع علي قناة "دريم" بيقول أن مفيش فرح هيتعمل ولا في أكليل هيتصلي لو العروسة لابسة فستان مش ولا بد.

المشكلة هنا بقي أو اللي بيخليني أضحك من قلبي فعلاً وبشدة لما بلاقي الكهنة بيقولوا هما الشباب بيسيبوا الكنيسة وبيبعدوا ليه؟!.

لا بجد، قدسك بجد يعني؟!، مش عارف مين السبب في أن الشباب يجري من حضن المسيح ويسيبه ويسيب الكنيسة؟!، ما مصيبة فعلاً أن بعد كل اللي أنت بتعمله بالسلطان اللي المسيح وهبهولك وبتسأل مين السبب؟!.

ما ببساطة حضرتك السبب في أن الشباب دول والناس بتجري وتسيب الكنيسة والمسيح، هو أنا أروح الكنيسة ليه وأصلي لما هو بيتقالي أطلعوا برة لحد ما تعرفوا معني كلمة كنيسة؟!، أة ليه أجي طالما بيتقالي لبسك مش محتشم؟!.

يعني في كل الحالات بتطرد، طب ما أروح بقي أي كافيه أو مطعم علي الأقل هناك أول ما بدخل بيتقالي أتفضل وأنست ونورت، مش أطلعوا برة لحد ما تعرفوا معني المكان اللي أنتوا فيه.

عزيزي الراعي -مهما كان مسماك- حاول تكسب الولاد والجيل الناشئ الجديد صح، أنصحه بينك وبينه مش تفضحه أو تعلي صوتك عليه وتستغرب لو بعد عن الكنيسة وعن حضن المسيح لأن صدقني أغلب الأولاد بيجروا بسبب بعض تصرفاتكوا أنتوا مش علشان هما عاوزين يبقوا كده .. المسيح بيقولك دعوا الأولاد يأتون إليّ مش هربوهم مني.