رد الإعلامي الساخر باسم يوسف ، على ما وصفته وكالة أنباء الشرق الأوسط الرسمية بـ«أهانته على مسرح لندن »، وقال إن «أجهزة معينة سلطت 6 أشخاص للتشويش عليه أثناء وقوفه على أحد مسارح لندن».

وقال «يوسف» عبر حسابه الرسمي على «فيس بوك»، اليوم الخميس: «للتوضيح بس عشان اللي حصل في لندن، طبعا في عناوين بتقول اني عملت عرض مسرحي يحرض ضد مصر وفيه مصريين هاجموني وشتموني والكلام المحفوظ ده».

وأضاف: «الحقيقة ان دول كانوا عبارة عن خمسة أو ستة واضحين انهم مزقوقين من الاول وعمالين يغلوشوا عليا من الأول، واللي يطّلع يقول انا خاين واللي يطّلع يقول ان السيسي هو مصر ومصر هي السيسي واللي يطّلع يشتم، عرفت بعد كده لما وريت صورهم لناس اعرفهم في لندن ان دول محترفين غلوشة وبلطجة ومزقوقين من اجهزة معينة، وبيكتبوا تقارير في المصريين اللي هنا بل ان فيه واحد منهم معموله محضر هنا عشان هدد واحدة من المتظاهرات قدام السفارة بالقتل».

وتابع: «المهم انا رفضت ان يتم اخراج أي حد من العرض وكنت متوقع إن الموضوع كله معمول عشان يتم تصوير دقيقتين وينزلوا على النت وده فعلا اللي حصل بعد نص ساعة من نهاية العرض ونازل مع ترجمة وآخر حلاوة، المهم كان فيه ناس في المسرح مع النظام وضد النظام ولا حد حس ان فيه اهانة لمصر أو تحريض لا أي حاجة».

وواصل: «انا بأطلع في سي ان ان ووسائل إعلام مختلفة لو عايز أحرض كنت حرضت من زمان. بالعكس الناس على اختلاف ميولها استمتعوا جدا. المحزن ان موارد البلد بقت تتصرف عشان حبة بلطجية يدفعوا تذاكر عشان ييجوا يعملوا حركات عيال ويغلوشوا زي بلطجية الافراح. انا سعيد جدا بليلة امبارح دي وباستقبال الناس ليا وياريت يتم توظيف موارد البلد في حاجاتاحسن من كده».