![إسعاد يونس إسعاد يونس](uploads/2536/51_20160210112530.jpg)
إسعاد يونس
الأفراح فى كل الدنيا طقوسها مختلفة من مكان لمكان، فى الغرب مثلًا، ربنا يستر على عبيده، الناس بتتجوز وبعدين يبقوا يعملوا الفرح دا، دا لو عملوه يعنى، لو قرروا يعنى يكملوا فى الجوازة.
فى بلاد تركب الأفيال الفرح بالجهاز بالمهر بالشقة بكل حاجة، اللهم احفظنا، بتبقى على العروسة مش على العريس، يعنى العريس عليه يوافق بس على التفاصيل دا لو عجبته أصلًا، النبى متحكم علينا يا رب.
بس خلونا نركز حبتين فى الفرح المصرى الحلو بتاعنا، بتاع اليومين دول يعنى، تبدأ فقرات الفرح اللطيفة بداية من الزفة مرورًا بفقرة عاوزين صاحبات العروسة يقفوا صف وأصحاب العريس يقفوا صف، وفقرة الرقص على أنغام أنا قلبى دليلى، من منطلق أنها حاجة جديدة، والأجدد بقى هو رقصة البطريق، آه وربنا البطريق، والله زى مبؤلك كده.
هوب العريس ياخد ديل العروسة فى سنانه وأصحاب العريس يُشبكوا فى ديله، وورا منهم صاحبات العروسة والجيران والأحباب والعيال الصغيرين كله ورا بعضه كده زى حبل الممبار، وكله على نطة واحدة، نطة قدام ونطة ورا واحدة يمين وواحدة شمال، وتلاقى القاعة بتتمخمض بيك من فرط اللذة، اللذة والله اللذة.
هوب تلاقى الكهارب خفت ووطيت، ومزيكا قدرية كده بتعلا شوية شوية فى أرجاء المكان الساحر، وإذ فجأة بلاك لايت فى القاعة كلها يحول الموجودات إلى أشباح سننها بتلمع، والمزيكا القدرية دى عمالة بتعلا تعلا تعلا، وباب يتفتح فجأة يطلع منه دخان كتير، والمزيكا عمالة تعلا تعلا تعلا، وهوب يدخل كائن زاحف بيطلع نار وشرار وغضب جبار من كل أركانه، ويتمركز فى نص القاعة، وهوب ينوروا النور الطبيعى، تطلع التورتة.
تقولش قفشوها بتهرب مثلًا، ولا التورتة دى طقس وثنى يلزمة كم التشويق والساسبس دا كله، يعنى مثلًا قبل مندبح العريس ونضحى بيه على أول دور من أدوار التورتة مثلًا تيجى بقى فقرة الساحر المتمثلة فى الجرسون اللى هيمسك الشوكة ويحط فيها حتة تورتة ويشدها فجأة، قال إيه يعنى عشان يبوسوا بعض، قال وهما مش واخدين بالهم، ياختى جميلة ياختى.
طبعًا فى فقرة العروسة وهى بترمى البوكية بقى، قال إيه قال يعنى اللى هتقفشوه هتتجوز وتبقى محظوظة، ياختى مشوفتش واحدة قفشتوه وحالها مشى أبدًا إلا لو كانت أصلًا متفقة مع العروسة لأنها اصلًا مكتوب كتابها، وبعدين نط إيه وفط إيه وبوكيه إيه ما زمان كان الموضوع أسهل بكتير، كان المثل ياختى بيقولك اقرصيها فى ركبتها تحصليها فى جمعتها، مش فطى ونطى واعملى الكلام دا.
نيجى بقى لأهم فقرة ومحور الأحداث وهدف الأهداف ومركز الأرض، البوفية، بس دى بقى محتاجة يوم من أوله فخلينا نحكيهالكم بكرة.