بقلم بولا وجيه
بما أن النهاردة 1/1/2016 تاريخ قرأة حضرتك لمقالي ده فأحب أقول لحضرتك أن حضرتك قدرت تهرب من نكسات السنة اللي فاتت اللي لسة مودعينها من كام ساعة اللي هي سنة 2015.
 
في 2015 أتعلمت دروس كتير وأستفدت من مواقف كتير جداً حصلتلي وطلعت بناس كتير حلوين بس في المقال ده حابب أتكلم في الدروس اللي أتعلمتها في 2015.
 
1-  أياك تتعلق بأي شخص بزيادة لأن في أغلب العلاقات بيبقي أحد الأطراف مستعد يعمل كل اللي وسعه علشان يفضل علي التاني مهما كانت نوع العلاقة (حب - صداقة - اخوة) وفي الغالب الطرف التاني برضو بيعمل اللي في وسعه لكن علشان يبعد؛ علشان كده حاول بقدر الأمكان تعمل ريجيم من العلاقات اللي ممكن تتعبك أنت قدام مش معني كده بقولك متبقاش أجتماعي بالعكس الأنسان أساساً مخلوق أجتماعي بس كل اللي أقصده خلي بالك من التعلق بالناس اللي ممكن يسيبوك في أي لحظة وتتعب بسبب تعلقك الزيادة بيهم.
 
2- حاول بقدر الأمكان أنك تفضفض بس تفضفض لحد يكون محل ثقة علي رأي بدرية طلبة في فيلم لا تراجع ولا أستسلام أحنا محتاجين حد محل ثقة بس علشان نفضفضله بس خلي بالك أن ممكن لما بتحكي بزيادة ده ممكن يضرك فخلي بالك من النقطة دي كويس أوي.
 
3- أقطع علاقتك باللي بيقولك معلش أكتر كلمة بتخنقني في الحياة كلمة معلش تقعد تحكي للي قدامك ساعة وفي الأخر يقولك معلش ؛مش عارف والله لولا معلش بتاعته دي كنت أرتحت أزاي في حياتي؟؟.
 
4- متستناش حد يطبطب عليك وحاول دايماً ترمي حمولك عند ربنا لأن دايماً اللي هتحكيله هيقولك ربنا يعينك طب ما تختصر السكة من الأول وتحكي لربك اللي فعلاً هيعينك.
 
5- أتعلم أن لكل شئ تحت السموات وقت أنا كنت فقدت الأمل في أني أخس كيلو واحد لكن لما ربنا أشاء بعتلي الدكتور فادي مكرم اللي قدر ومازال بيحقق المعجزة دي في أني أخس وأقدر أتحرك زي ما كنت بحلم ويمكن أكتر من اللي كنت بحلم بيه علشان كده ثق أن ربنا هيحققلك اللي نفسك فيه ويمكن الأحسن لكن في الوقت المناسب لأرادته لذلك أتعلم دايماً تقول لتكن ارادتك ومشيئتك.
 
6- حاول دايماً تبعد عن النقاشات اللي صدقني مش هتكسب منها غير وجع راسك وتمن الأدوية بتاعة الصداع فحاول بقدر الأمكان تبعد عن مجادلات الحمقي وأفتكر دايماً لا تجادل الأحمق فقد يخطئ الناس في التفريق بينكما فحاول دايماً تقلل من المناقشات اللي بتدور حوالين أنت عملت كده ليه او قولت كده ليه.
 
7- حاول خلاص طالما 2015 خلصت تنساها بحلوها ومرها وتركز في اللي أنت داخل عليه في 2016 عارف أنه أحنا دايماً بنعشق النكد ونتعلق بالماضي ونقول أصل لو كنا عملنا كذا مكنش حصل كذا طب ما كويس أنك أتعلمت علشان لو مريت بنفس التجربة تعرف كان ايه الصح اللي المفروض يتعمل.
 
8- أبعد عن أبو نضارة سودة في الحياة واللي بيبقوا ماشيين في الحياة بمبدأ أبتسم سنموت بعد قليل ؛لأن الناس دي كفيلة تنقلك طاقة سلبية أنت في غني عنها في بداية السنة أو طول عمرك بمعني أدق وأفتكر أكثم بن الصيفي لما قال خطبته الشهيرة أمام كسري ملك الفرس ؛حسبك من الشر سماعه يعني أصلاً كفاية أنك لما بتسمعه بتتعدي فحاول بقدر الأمكان تبعد عن الناس اللي زي دي وادعي أن ربك يخليها سنة حلوة علينا ولنبدأ بدءًا حسنًا.
Twitter : https://twitter.com/PaulaWagih