بولا وجيه
من أكبر الخدع اللي بيخدع بيها الإنسان نفسه تملي هي أنه فهم نفسه أن ممكن حدث صغير ربما مدته متعديش الدقيقة ممكن تخليه ينكد طول اليوم ويقولك أهو اليوم باظ .

ممكن تقول أن كلامي غلط بس تعالي نفكر فيها سوا ؛ لما أنت بتكون نازل الصبح وقابلت شخص ممكن يكون ما بينك وبينه خلافات أو مشاكل أو حتي مش متقبله بيبقي لو حصلك أي حاجة يا عيني بيبقي هو المتهم الرئيسي وهو السبب وهو الفقر اللي حل علي يومك أو حتي قراءة الأبراج ده لو أنت فتحت بس وقريت برجك اليوم و لقيته بيقولك اليوم سئ تلقائي بتؤمن أنك لو خرجت ح يحصلك حاجة.

طب أيه العلاقة بين مثلاً الدقيقة اللي شوفت الشخص ده فيها او قريت برجك اليوم فيها بباقي الـ1939 دقيقة الباقيين في اليوم ؟! ، حدث مر وخلص ابتدي عيش بعديه متفكرش في أي حاجة ممكن تعكنن عليك اليوم واتعلم دايماً أنك تاخد كل موقف أو حدث في اليوم طالما أنتهي متربطوش بالأحداث اللي بعديه .

اليوم عبارة عن 86400 ثانية الموقف أخد 60 ثانية مازال متبقي في اليوم 86340 ثانية يبقي حرام متستغلش الوقت المتبقي ده كله أنك متحققش فيه حاجات مفيدة في حياتك سواء علي مستوي العمل أو العلاقات علشان حدث حصل وأنتهي .

في الأنجلش في قاعدة أسمها الــ ((Past Perfect الماضي التام لما درسنا القاعدة دي لأول مرة أتقالنا عليها قاعدة الحدث اللي حصل وأخد وقت وأنتهي علي عكس ال(Past continuous) الماضي المستمر اللي هو حدث في الماضي ومازال مستمر في الحاضر و يمكن يكمل معانا في المستقبل .

مشكلتنا دايماً بنخلي الأحداث السيئة في يومنا ماضي مستمر وتفضل شماعة لأي حاجة وحشة تحصلنا في اليوم تاني والحاجات الحلوة اللي بتدينا قوة دافعة علشان نكمل بنخليها ماضي تام حدثت وأنتهت بالرغم أنك لازم تخلي الحاجات السيئة هي الـماضي التام والحاجات الحلوة بس هي الماضي المستمر علشان تقدر تكمل وتخلي الحاجات الحلوة دي بدل ما تكون ماضي ماضي مستمر لا كمان تبقي مضارع في كل وقت ويبقي مستمر كمان في المستقبل  متخليش حاجة تعكننك أو تعطلك عن حياتك وأستمر ومتوقفش .