قال المستشار مرتضى منصور، رئيس نادي الزمالك، إنه لن يقف في لجنة انتخابية لكي يطلب من أحد انتخاب ابنه في البرلمان كما أشيع قائلًا (أنا مش بعمل دعاية لابني وأنا نفسي في الانتخابات بقول اللي عايز ينتخبني ينتخبني واللي مش عايز عنه ما انتخبني).

 

وأضاف أثناء مداخلة هاتفية مع الإعلامية رانيا بدوي في برنامج (القاهرة اليوم) إنه كان يطالب الناخبين عبر الصحفيين والقنوات الفضائية إلى المشاركة في الانتخابات بدل الجلوس على المقاهي وإنه كان يخاطب مصر كلها وليس الناخبين في اللجنة.

 

وعلق على المرشح الذي اتهمه بالتعدي عليه (وحياة أمك أنا وطني أكتر منك.. ووجع الدماغ ده أنا مش فاضي له، وده واحد عايز يقل أدبه علشان يشتهر).

 

وكشف مرتضى منصور عن أنه قام بدعم ابنه في الانتخابات البرلمانية عبر عمل دعاية من خلال نادي الزمالك وهذا حقه القانوني مضيفًا (لو فيه إعادة تاني هبعت لأعضاء النادي دعاية تاني) مضيفًا (الناس مش بتتكلم ليه على المرشح التاني اللي بيدفع ملايين للدعاية وهو مش لاقي يأكل أصلًا وأحمد مرتضى معندوش قناة ولا برنامج ولا دولة الإمارات بتصرف عليه).

 

وقال مرتضى منصور إن نجيب ساويرس، رجل الأعمال، أحضر له شنطة فلوس لدعم أحمد ورفضت أخدها وقلت له اتفضل محدش يصرف على ولادي، وابني صارف على الدعاية في حدود المسموح به.

 

واعترض عمرو أديب على أن دعاية أحمد مرتضى منصور أكبر من الطبيعي كما أن لمرتضى منصور خلافات مع نجيب ساويرس فرد مرتضى منصور أن خلافه مع نجيب ساويرس هو المذيعين في قناته وتحديدًا –على حد قوله- (مكنتش بحب الرجالة التلاتة دول ليليان داود وريم ماجد ويسري فودة).