هى وزوجها من ذوى الاحتياجات الخاصة، جمعهما القدر فى بيت واحد، هى معاقة فى إحدى قدميها، وهو يعانى من إعاقة ذهنية، أنجبا أطفالاً عانوا معهما من قلة الدخل، لم تصمت هى على إعاقتها وتجلس فى البيت فى انتظار «حسنة» من أهل الخير، قررت أن تعمل سائقة على «توك توك» للإنفاق على أسرتها ولأنه المركبة الوحيدة التى تستطيع قيادتها دون أى مشكلة.

التزام حسن توفيق، 47 عاماً، هى أول سائقة توك توك من ذوى الاحتياجات الخاصة بالمنصورة، خرجت إلى سوق العمل رغم ظروفها الصعبة، للإنفاق على زوجها المريض وأولادها: «كنت بشتغل خياطة، لكن الحال كان واقف بسبب عزوف الناس عن التفصيل، أهل الخير ساعدونى واشتريت تروسيكل معاقين، واشتغلت بيه فى مصانع البلاستيك، لكن كان تعبنى فى سواقته وكل ما أنزل منه أقع على الأرض، لأن رجلى بدون أعصاب، لكن التوك توك مريحنى رغم استغراب الناس من سواقتى ليه وأنا برجل واحدة». تقود «التزام» توك توك من النوع القديم الذى لا يعود للخلف: «نفسى أشترى واحد من النوع الجديد عشان ده بيتعبنى برضه، أنا رجلى على الفرامل فى كل الأوقات، لكن عايشة ومكملة بدعا الناس ليا»، مؤكدة أنها لا تخاف من السير فى الشوارع بمفردها: «الحمد لله الناس هنا كلها عرفانى وليا زباينى عشان أنا مبفرضش أجرة على حد، ورغم أن المدارس بيطلع منها سبوبة كويسة، لكن أنا رفضت أوصل أى طلاب لأن مطلوب منى أنزل من التوك توك وأدخلهم المدرسة وأنا مقدرش أعمل ده بسبب رجلى».

رغم أنها معاقة هى وزوجها ولديهما أولاد فى مراحل تعليمية مختلفة، لم تفكر «التزام»، فى تسجيل اسمها فى جمعية خيرية للحصول على دخل شهرى تعيش منه: «أنا أحب أأكل عيالى من فلوسى، ومن شقايا وشرطة المرور عرفانى، وعارفين إننى ملتزمة ومفيش حد اشتكى منى».