في 20 أغسطس 2015 تواردت أنباء من تونس تفيد بأن خلافًا كبيرًا وصل إلى «خناقة» نشب بين لاعب الزمالك، باسم مرسي، ومجموعة من الأشخاص يبدو أنهم جماهير «أهلاوية» كانت موجودة في مطار قرطاج.

ما قاله «مهيب» جعل «الثعلب الصغير» يبدي رأيه فيه وفي باسم مرسي، موضحًا أن الموقف لم يعجبه، وأنه يشعر بالغضب تجاه ما فعله «باسم»، لأن اللاعب يجب أن «يمسك نفسه أكتر من كده» لأنه معروف ومشهور أما الـ4 غير معروفين، وبالتالي فإن الإعلام سيسلط الأضواء على «باسم» أكثر من أي شخص آخر.

وقال «حازم»، عضو مجلس إدارة نادي الزمالك السابق: «لازم تبقى عارف يا (باسم) أو أي لعيب إنه يمسك نفسه وياخد باله، واحد هيقولك كلمتين أو الناس تستفزك، معلش اعمل نفسك مش واخد بالك، أو رد باحترام ممكن ترد رد يكسفهم أساسًا».

وتطرق الأمر إلى أبعد من ذلك، ورأى «العو» كما تطلق عليه جماهير الزمالك، أن «باسم» تغير بعض الشيء في الفترة الأخيرة، وأنه لم يعد كما كان، قائلًا: «أنا حاسه متغير شوية، عايزه يرجع (باسم) اللي هو كان خالد قمر هو رقم واحد، وهو كان بينزل يبقى رقم 2 فكان بيلعب وهو مركز وعايز يجيب أجوان».

وأضاف: «(باسم) بقاله 3 ماتشات بيتكلم كتير جدًا في الملعب لما بتيجي عليه الصورة، ولما بيضيع كورة ولا حاجة حاسه بيمثل شوية أكتر من الطبيعي وبيعمل حاجات غريبة، مش مركز، خايف يكون شايف إنه هو هداف الفرقة، فابتدى يعيش شوية».

ووجه «حازم» رسالة إلى «باسم»: «إنت لعيب كويس وكلنا أشدنا بيك وإنت كويس، لازم تركز في اللعب وإنك تنزل تبقى كويس، مش إنك تبقى مركز إن الناس تلعب لك كورة فتقعد تزعق».

وتابع: «أنا بحبه وهو عارف، لكن حتى بعد ماتش الاتحاد يقال إنه مرضيش يتصور مع حد وقال لهم الدنيا حر وأنا مش هتصور، الله أعلم إيه اللي عنده، بس إنزل إمشي على الأرض يا (باسم) عادي تاني وإرجع اللعيب اللي بيحاول يثبت نفسه، لو حسيت إن ثبت نفسي مش تعرف تلعب».