قالت الفنانة إيناس عز الدين، نجمة "أراب أيدول" إنها لن تدخل من بوابة "ماسبيرو" في ظل وجود محمود عبدالسلام رئيسًا للفضائيات المصرية، مشيرة إلى أن "عبدالسلام" غير مقدِّر للفن والفنانين المحترمين، وقال إن "الفضائية المصرية ليست قناة فنية".

وأضافت "عز الدين"، خلال تدوينة لها عبر حسابها الشخصي على "فيس بوك"، أن رئيس "الفضائية المصرية" يقوم بالسخرية من شكل الضيوف وصوتهم وجسمهم وملابسهم، قائلة: "لما الموضوع يوصل لحد عندي ويقول دي تخينة وصوتها وحش مين دي أصلًا وتتكلم بصفتها إيه.. يبقى لأ".

وأشارت إلى أنها سجَّلت حلقة في التليفزيون المصري مع الفنانة مروة ناجي وتم التشويش على البرنامج بإذن منه ولم يتم عرض البرنامج بشكل كامل، حيث عرض أقل من نصف الحلقة وتم تشويه مضمون الحلقة بأمر من مخرجة البرنامج أو فريق البرنامج.

وتابعت إيناس قائلة: "وصلني أنه قال لفريق البرنامج عشان يوصلولي التهديد إنه مش هيدخلني التليفزيون المصري في نفس الوقت اللي أنا كنت بصور فيه حلقتي إمبارح مع صديقتي الفنانة الجميلة مروة ناجي طبعًا هو يستغل إن فيه فنانين مصريين كتير مش واخدين حظهم للأسف وبيدوروا على أي فرصة يظهروا بيها فمش فارق معاهم تطلع شكل الحلقة إيه ويتنازلوا عن حاجات كتير ﻷنهم يحلموا بس بالظهور في التليفزيون".

وواصلت: "يتريق عليهم ويهين فيهم والكلام ده بيحصل قدام فريق العمل وده ظلم وإهانة للمواهب المصرية اللي هي أكبر وأهم من إنها تطلع في برنامج في القناة اللي هو فاكرها بتاعته لكن المرة دي حظه وقع معايا أنا وأنا الحمد لله مش مستنية حلقة في التليفزيون المصري اللي مش بيقدر مواهب وطنه علشان أطلع فيها والحمد لله بطلع في كل القنوات وفي أي وقت وفي أي مكان وليا أجر محترم وأنا لو طلعت على القناة اللي هو فاكرها بتاعته فأنا طلعت مش علشان أتشهر لأن الحمد لله معروف كويس أنا مين".

وأضافت: "أنا طلعت بدون أجر وبدون شروط وبدون طلبات فقط احترامًا لتليفزيون وطني اللي أنا قدرته وقولت زي ما طلعت في برامج كبيرة وقنوات خاصة ﻻزم أطلع في تليفزيون بلدي وكمان تقديرًا لصديقي المحترم الإعلامي محمد السماحي".

ووجَّهت في النهاية رسالة لرئيس القناة الفضائية: "أنا إيناس عز الدين وكفى".