مرة واحد إخوانى تطاول على إخوانه، وفسفس على الفيس يسخر من قادتهم المؤتمنين، ويغمز فى ذمتهم، وقبل أن يرتد إليه طرفه، كان يعتذر، ويلتمس العفو، ويمسح ما كتبه، ويبلع لسانه، ويخرس عن الكلام المباح، الإخوان ذوات مقدسة يا هذا.

عمرو فراج، مؤسس «رصد»، إذ فجأة يفسفس، يفضح ما يجرى فى جماعة السمع والطاعة، وكأنه ارتكب المعصية، شق عصا الطاعة فى جماعة السمع والطاعة، لقد جئت شيئاً إمراً يا عمرو.

عمرو فراج فى تدوينة على «الفيس» قال عجباً: «مرة واحد قيادى فى مؤسسة ما.. اسمه (محمود).. كلم واحد هربان تانى اسمه (محمود) إنه يطلع مقال يهاجم فيه أفعال ناس تانيين بتحاول تقوم بثورة إصلاحية وثورة شعبية فى مكان ما.. و(محمود) التانى ده كان له تصريح وقح أيام مجلس الوزراء فى دولة ما بخصوص البنت اللى اتضربت واتعرت فى الشارع».

ويكمل مفسفساً فاضحاً: «محمود» الأولانى بعت لـ«محمود» تالت هربان ومختفى تماماً عن الساحة بقاله سنتين علشان يقوله الحقنا ولازم تظهر وتبطل أى نتيجة انتخابات أو حاجة تمت فى فترة اختفائك لأن الثورة دى هاتشيلنا فى طريقها لأننا ناس مش نضيفة وتقدر تقول علينا من المرجفين فى المدينة.. الممتع فى الموضوع أن «محمود» الأولانى بيواجه الآن جلسات محاسبة تتهمه باختلاس مالى وشوية حاجات مايصحش عمرو يقولها فى الفيس علشان عيب، وهو حد محترم نسبياً.

حلوة حكاية محمود الأولانى (محمود حسين)، ومحمود التانى (محمود غزلان)، ومحمود التالت (محمود عزت)، جماعة محمود، الأخ بتاع «رصد» يكتب أحاجى وألغازاً، الممتع فى الموضوع أن عمرو فراج بيلسن على الثالوث محمود، الثالوث المقدس، لا تخمين ولا تلسين من جانبنا، فضائح الإخوان على كل لسان، حتى نطقت بها ألسنتهم، اختلاسات مالية وشوية حاجات متصحش، المالية وعرفناها، ايه اللى مايصحش يا عمرو؟!

الطريف أن فراج يعتذر ويلبّسنا العمة: «أعتذر للجميع إن كان ما كتبته فى الصباح والذى أوضحت تماماً أنه لا يمت للواقع بأى صلة.. وفهمه البعض على أنه إسقاط على أشخاص حقيقيين.. يعيشون معنا فى الفيلم القمىء اللى كلنا عايشين فيه ده.. أعتذر لهم لو حسوا إن كلامى فيه تجريح لأى شخص هما حسوا إن كلامى جاى عليه».

امسح يا عمرو، فمسح فى المساء ما كتب فى الصباح: «مسحت ما كنت قد كتبته اليوم فى أمر ما.. بعد وصولى لقناعة شخصية أن الحديث هنا لن يؤثر ولن يفيد.. وأن الإيمان.. هو ما وقر فى القلب.. وصدقه العمل.. وليس ما باح به اللسان فقط».

إيمان إيه، ووقر إيه، وعمل إيه، عملكم أسود، اللى بيفسفس مبيغطيش دقنه، الفضيحة بجلاجل، محمود حسين، أمين الجماعة، متهم باختلاس أموال الجماعة، ويخضع لتحقيق داخلى، ومحمود غزلان يدلس على الجميع، وينتظرون ظهور الذئب الأحمر محمود عزت لمداراة الفضيحة بسطوته ونفوذه، ياما الدقون تخفى مجون.. إلهى يفضحكم فضيحة الإبل!
نقلا عن المصرى اليوم