بقلم: ماجدة سيدهم
وصلنا يا نوسة ،اعدلي هدموك ،حطي  شوية ريحة ، شهّلوا يا  جماعة ،والله وها تدخلى القصر يا نوسة ،بيئولوا جوه دنيا تانية ،وأنت إيش عرفك يا عوض، كنت جيت هنا قبل كدا ..؟لا يا معلمة بس بنشوف الباشا قاعد مالي مكانه كدا على كرسي مشعوط فخامة ،امسحي شبشبك كويس يا نوسة ،شبشبي نظيف يا حيلة أمك ، يا بختك يا نوسة ها تتغدي   مع الباشا حتة واحدة ، اسمعي أوعي تكشي ولا تتهزي ، مين دي ياله  اللي تتهز وتكش، ما قصدش  يا نوسة ، أقصد لما تمسكي  الشوكة والسكينة يعني ، بلا  خوتة .. الباشا بياكل من أكلنا ، خدي بالك يا نوسة القصر الفخم دا من فلوسنا يعني تاخدي راحتك ، تمدي ايدك  كدا تفسخي وتؤرمي   أجدعها ورك ، ما تخافوش  عليا .. الفسخ دا شغلتي  استنوني هنا ..
*على باب القصر
-أيوه سعادتك  أنا نوسة ، فتشني  طبعا  ما هو واجب أمني برضة ،  دا  لمؤاخذة توك توك للباشا ، حاجة كدا على أد حالنا ، عشان المشاوير الصغيرة ، بدل ما يتعطل ويتأخر في الشوارع الزحمة يعني .

*جوه القصر ..
-اهلا بيك  ياباشا ،الله يعزك و يجبر خاطرك زي ما نت جابر خاطرنا ، دول شوية فطير بالقشطة  لجنابك بس ، لكن البهوات اللي معاك طفحوه .. لمؤاخذه يعني ما هو ما حدش شغال غيرك هنا  يا باشا ، و دا توك توك  عشان جنابك  هدية  الغلابة بئا ،هو يعني مش جديد بس والمصحف يا باشا  من حر مالنا  ، لأ وإيه جاهز بشخاليله ، شوف معاليك مكتوب عليه إيه " اسكع وهش دا عدوك حبة  قش " ..
*وبعد وقت بسيط شربنا السائع والسخن
- ماشي  يا باشا نجرب التوك توك سوا ، فجأة ومن غير سابق إنذار اتقلب وش نوسة وضربت على صدرها : نهار أسود ومنيل  ،إيه اللي جاب البتاع دا هنا ..

-- إلاّ اعرفه  يا باشا دا  .. حسن أخو رجب المخصي، لأ والنبي يا باشا ماتبرئليش  كدا مش وقته خالص ، الواد دا بيعمل إيه هنا ، ياواطي كلمني أنا ولا فاكرني لسه هاصدقك   يامفضوح الكبارى والجوامع
 *جريت نوسة وهجمت عليه ،انت ياله  مش  أفشوك  ميت مرة  يا وسخ مع أخوك في حمام المسجد عندنا  يارمة ..،تقاوم بقوة : حوش رجالتك  عني  يا باشا ، والمصحف لأخلص عليه  ،ذاد غضب  نوسة جدا ونطت ببونية راس : الواد دا  دواعشي يا باشا  والمصحف دواعشي ..
- إيه إيه إيه ..بتشتغل  إيه ..مفتي ..!  طبعا  وهو اللي  ف وساختك هايشتغل إيه غير مفتي ، ياكش يفتوك في أروانة جلـّة زي فتاويك ،  ماهو كتيرك آيتين ملخبطين  وإعجن يا معلم ، فضحتونا ولخبطتونا يلعن أبو  اللي جابكوا.
- يخربيتك وكمان انتخابات  ، وله  أنت بتفور دمي  ،ولا  محوء فيك ضرب ولا تف ، بص ياله انت دواك الشبشب ، تصرخ : والنبي ياباشا حوش رجالتك عني  دا مش وقت أدب وإتكيت  خالص ،  الواد  دا لازم يتخصي زي أخوه ..
*لمة وهيصة ، نوسة منفعلة  جدا وهي بتجره من قفاه  :انت ياله مش كنت بتكبر على سجارتين حشيش  يوم ما ندبحنا  ف ليبيا يا رخيص، أيوه يا باشا الواطي دا كان قاعد يكبر ويتكرع ويلغ  ويضرب بانجو..
 
-لا لا لا ، كله  الاّ كدا  ، ويمين بالهن مانت منزلي كلمة يا باشا ،الواد  ما هو راكب معانا  ولا ها يحط رجله فيه  ، أنا مش طايقاه  أساسا .. يا باشا صدقني أنا ست مرمطها الزمن وياما لطش فيا  بمزاج ، مولانا الواطي دا أول ما يتمكن  ها  يلف يخلص عليك  أول واحد ويندار عليا،  دول  أنجاس يا باشا  ،لا شرف ولاعرض ولا ضمير ..
* اتلفتت نوسة  للشيخ حسن بانفعال شديد  ولازالت تقاوم منع العساكر لها :انزل يا له ،  بقولك انزل يا بن الشريفة التقية ، بذهول تكاد تجن : شوف الوطينة دا حتى قبل ما نركب إحنا نط  زي الطلوقة  واتجعص على الكرسي أدام ،أطبقت نوسه على  رقبته بعنف تحاول جره بره التوكتوك : بقولك انزل  قبل ماسيح دمك..
  - ما يموت في ستين نصيبة  وسخ وراح ،سيبني يا باشا سيبني أخلص عليه وأطفي ناري ، أنا هاتجن  هو معاليك مستني إيه ..! قولتك روحي فداك ومن ايدك  دي لايدك دي ،  ما تفرم وخلص بئا  ،  وراك ولاد بلد مستنين إشارة منك..
- وهي بتنهج تعدل هدمتها وتقرب  :  بص يا باشا  واسمعني كويس ،  التوكتوك  دا بتاعي  وكمان قديم  ،وزي ما نت شايف مفتح من كل جهة ، لا باب  ولا شباك  وتلات فرد عجل ماشين بالعافية ، ويا دوب معاليك  تركب أدام وأنا وراك  وأديك شايف الشوارع ضيقة ومكسرة والحال تعبان ،  دا يركب بوساخته  فين بئا   ، يا باشا  أنا كل ما بحاول أهدا  دمي يفور ،  يا باشا  اسمع كلامي  والمصحف ها نتقلب كلنا ، يا باشا أنا اللي ها تفعص بينكوا ، يالهواااي  ألطم على وشي بقول لمعاليك  مش طايقاه ، بقولك خاين..رخيص ..دواعشي  ،  دا  ماينفعش معاه الأدب وناخد وندي ، دا بايع شرف أمه أصلا ، يا باشا أبوس إيدك  دا اللي إندبح وإتكوى عليه قلبي يبئا ضناي  اللي حيلتي، واللي اغتصبوها  دي  تبئا بنتي ، أنا لازمتي إيه إن ماعرفتش أخد حق ولادي ،أنا مش قادرة أرفع عيني ف عين  بنتي وهي مكسورة  ، نضف  الحتة بئا والنبي يا باشا كفاية 
*فجأة  كانت صرخة قوية : يالهوااااااااااي ، صدقتني يا باشا   أهو التوك توك اتقلب وإحنا لسة ما طلعناش  ..
-  طبعا اعيط ياباشا  ، دا اتفكك من بعضه ودي فلوس غلابة ، وببعدين دي هديتنا ليك ، تمسح نوسة بكمها  دموعها ..
- ماشي يا باشا  خاطرك على راسي وجزمتك كمان ، ماشي  ، خلاص ،ايدي  على ايدك نصلح أبوه ، هو بس جنابك ما تنساش  إن التوك توك دا بتاع الغلابة اللي معايا  ، تلتفت بغضب للشيخ حسن :  ما تحطش ايدك  يا واطي معانا  مش كفاية خربتها ..
- خلاص يا باشا  ،تضحك نوسة  وتقترح اقتراح : بأقولك إيه ياباشا وإحنا مقلوبين على الأرض  كدا خلينا مكفيين  شوية ،و النبي انت القعدة معاك عسل ..
*تتعدل نوسة في  كفيتها وتضحك : لا لا، هي دي عيشتنا ،  إحنا أصلا مقلوبين  كدا على طول ، شوف معاليك وإحنا مكفيين كدا بنعمل حاجتين ، نضحك ..ونشوف العجب – أي والله ،بالك الشعب دا ابن نكته  ليه..؟ من كفيته على طول ،أي والله ..
- شوف معاليك  هم عشر دقايق بالوضعية دي وهاتلاقي جنابك بتفطس  م الضحك ،  عشر دقايق  كمان ها تألف  جنابك نكت صاروخ تضرب ف النفوخ عدل  وبعدها تعمل أجدعها قرار، لا يهمك أم ريكا  (أمريكا ) ولا حتى أم حنفي 
-عارفاك يا باشا ولعة ، دا انت سكعتهم أحلى قفا ..
 
-الله يضحكك يا باشا ، أصل العيشة  المكفية دي عيشة بنت كلب مسخرة ،  وأهي والحكومة  مروئة علينا بالأوي  ، راخر   مابنرفعش راسنا لفوق أبدا ، وانتوا بئا الناس اللي فوق يعني مابتبصوش علينا الاّ لما تكونوا  بتفوا أو بتنفوا ،قطع لسانك يانوسة والنبي ما أقصد حاجة ، لكن الاّ قولي يا باشا هي الحكومة بتاعتنا العدل فيها مايل ليه ..!
- والمصحف ياباشا ولا واحد فيهم يدخل في زمتي بقرن شطة حتى ، الاّ مافيهم حد ملهلب كدا ودمه حامي ،عاملين  زي الخضار البايت ، مالوش لازمة ، لا يتباع  ولا ينطبخ  ولا حتى  يترمي ..

- بالك ياباشا  وإحنا تحت واقعين كدا بنشوف الحقيقة على نيتها ،  بص بص بص أهو زي ما جنابك شايف  ، قرب جنبي شوية .. أهو شوفت ..ما فيش غير الجزم والزبالة ..
- هو فيه حاجة في البلد غير الجزم والزبالة ، والنبي ما تفهمني غلط ، تأزأز لب ياباشا ..
 - أه البيئة ..! .. بيئة إيه لمؤاخذة ياباشا ..!  أي والله معك حق ، بس ما هو كله بيتف على كله ، انتوا تتفوا علينا وإحنا  بنتف على الجزم اللي دهسانا والزبالة اللي  كاتمة على نفسنا  ..
–  بص معايا كدا ياباشا قرب والنبي  واتفرج ،هنا عالم ودنيا تانية خالص ، أهو الكل ماشي ، فيه جزم كبيرة ..دي واخدة ف وشها وداهسة اللي ف سكتها ، وجزم صغيرة  ..دي بتحاول تتمط  يعني وتكبر .. دي  بئا  جزم تمشي على الحبل  وتعاشر التعبان عشان تظهر وتلعلع ، واللي هناك دي  جزم  تانية بتلمع  أوي .. أل يعني هانخ ونكش  ، وجزم  قديمة  ..برضة  مش خسارة فيها  التف ، وعندك جزم مقطعة  ولا بتصعب  علينا ولا بتهز فينا شعرة ، ما إحنا استوينا بئا خلاص ،  وعندك اسم الله على مقامك جزم بكعب  ..بتهوش يعني .. ولا بيهمنا،  وجزم زحافي ما تحسش بيها  أبدا الاّ وهي نازلة فوق راسك ،يخربيت لسانك يا نوسة  والمصحف ماقصد يا باشا  ، حقك عليا، أقصد فوق راسنا  إحنا يعني وراس اللي خلفونا ، دا  بئا غير الحافين ،  نهايته أهو كلهم في الأول والآخر  جزم وسخة ،  شوفت أديك ضحكت ..
-لا مائولكش على الزبالة ، الأّ هي بتكتر ليه ياباشا ..! دا إحنا قربنا نعيط زبالة ، دي  لوحدها دولة تانية خالص ،تلاقي فيها العايشين  والواكلين واللي  بيلقط رزقه واللي بيعمل لمؤاخذة واللي بيسمسر ،  وكل الحكاية بنشيلها من هنا   ونحطها هنا برضة ، و حتى لو حطيناها هناك  برضه –ماهي هي الزبالة نفسها ..

- شوف ياباشا ما دام نوسة لسة تعبانة يبقى كلهم زبالة ، ماتحرقها ياباشا  ونضف البلد، وفجأة تلف نوسة بسرعة  وترزع قلم على وش الشيخ حسن  ينزل يرن  : مين دي اللي تتحرق ياله ، مش كفاية إنك قاعد فيها ،هبت نوسة واقفة : وهجمت على  الشيخ حسن :كمان بتمد إيدك عليا ،طب  تعالالي يا سكر... طرحتي دي ياله  أنضف  من حجاب أمك ،  لمة وعاركة من تاني ، وأوعي يا نوسة ها يموت تحت إيدك،  يفلت  الشيخ حسن  ويجري يستخبى ورا صاحبه ، قربت نوسة :  بتستخبى يا جتة على فار ، ودا مين دا كمان ؟ مين ..!  جورج  ..! وكسة توكسك يا أهبل ،  ندل  يستخبى ورا خاين ، وبتوالس عليه كمان  ، حقاش لو ماكنش مكفرك ومطلع دين أمك يا أهبل ، دفعلك كام يا رمة ، دانت ياله في سوق الخضار ماحطكش فوق البيعة وتقولي  نتصالح ، عند أم زتون ،  كسر إيدك ، مش نوسة ياله اللي تتزء ولا ّ تتهدد ، والمصحف لاجيبه  من شنبه وأجيبك معاه  ، إتفو على وشك منك له  رخيص ..
- اتفرج ياباشا  أدي  كوم زبالة  أهو اتصرف بئا ،
-لا لا لا ياباشا المشكلة جوه  مش بره ، دول زي الدود ضربوا  خلاص  ف البلاص  كله ، بص ياباشا اسمع مني  ومتعملش ، تتنهد شوية : بس لو تدينا الفرصة والمصحف نخليهملك لا محصلين كدا ولا كدا ..
- لا لا، دا  شغل نوسة ونسوانها ،مش  محروق قلبنا ولا ايه ،  أما بره  ماعليك فيه ، بس لو تسمع كلامي، والمصحف  دا أحنا  بس لو رصينا شباشب نسوان السوق كله على الحدود داير مايدور ، خلي بئا أجدعها شنب متلتم يقرب ويشوف، دا  إحنا قدرة ، عاوزين  فرصة ياباشا ، فرصة واحدة بس ، ماتجندنا يابشا الله يسترك نفسنا نخدم البلد
*  هدوء شوية .. وقعدت نوسة مع الباشا تحكي :  بالك ياباشا البلد  دي محتاجة إيه ، أقولك ، شوية أدمغة..
 - فين ياباشا ..إنت شوفت ..! لأ أنا ماشوفتش  ، لا لا الأدمغة فوق مش تحت كدا ،اللي تحت دي حاجة م الاتنين يا إما  دماغ منداسة أو اتقطعت  رقبتها ، عشان كدا تلاقيها ياحول الله  ميتة  ومرمية تحت الجزم والزبالة .. ياسلام ياباشا لو عندنا كدا عشر ادمغة نضيفة بتفهم وتحس ،  دول يخلوا البلد فلة ..وأردم بئا على ردح المشايخ

- أنا اقول لمعاليك وعلى قد  فهمي يعني ، بالك الأمل كله في ليبيا ، أمال إيه ، دا هي دي فاتحة الخير على مصر وعلى ليبيا ذات نفسها، ومش ليبيا   بس والحتة كلها ،بس ليبيا أكتر عشان  قريبة يعني ..
-   أيوااااا مسافة السكة ، الله يضحكك  ياباشا ، وبعدين ناسها قريبين مننا كدا  وإحنا خلاص أخدنا عليها
- أقول  لسعادتك ،  ماهو لما  تنضف مصر  ودا قريب أوي ونردم ع  اللمامة كلها ، هو الحقيقة يعني هانتوجع  أوي تاني ، لكن  بعدها هاتنضف البلاد كلها ورانا ،  أصل راس الحية  ياباشا هنا ، أي والله ، ودي لازم تندك ، قوم  سعادتك لما تيجي ليبيا بئا  عاوزة  تقف على رجليها تعمل إيه ..!، احنا اللي نوقفها ، ، نروح  نعمرها ، عمال على مهندسين على دكاترة ومدرسين وفلاحين ،واهو خير لينا وليهم..
- بقول لمعاليك إيه ياباشا ،هو إحنا ليه مش بنعمر الصحرا ونوسع على نفسنا شوية دا اتخنقنا خالص ..؟
- فيه إيه يا باشا . مشغول على مين ، أهو  متلئح  هناك أهو.

-لا  معاليك ، لسه ما موتهوش ، أنا بس  حطيت جزمة ف  بؤه وربطت عليه ، طب بزمة معاليك مش ارتحنا من أرفه ..
- مش عارفة قلبي متغوغش ،سؤالك عليه كدا خلي الفار يلعب ف عبي ، و من ساعة ماشوفته  ف القصر وأنا شايطة نار، وعمالة أكدب نفسي، أحكي شوية  وأضحك شوية وأصرخ شويتين ، هو بيعمل إيه جوه يا باشا ، لاداهية  تكون الحكاية كلها  مطبخة فوق راسنا  ، يا سواد الحلل دا يبئا خابور مغري ..
- ياباشا والنبي سيبني أقول الكلمتين المحشورين جوه ، خايفة يا باشا الشر بره وبعيد  لاينشوك ، شامة ريحة الخيانة حواليك زي الهوا ،وكمان  قلبي مش مرتاح  لبتوع الجاز خالص ، ياباشا   أنا مغلطتش ، ماشي على عيني وراسي لكن الصراحة يعني  ولا دخلت عليا  السلامات والبوستين دول بنكلة ، يا باشا مصلحتهم مع الأقوى واللي يرعبهم ،  وهم شكلهم كدا غيروا الحسبة وشموا ريحة الخيانة جاية جاية فقالوا نضمن حمايتهم  ونميل ناحية الإخوان شوية وكدا تكون قوتهم في وحدتهم سوا، وملعون أبو الشرف ، والمصحف مجرد إحساس ف قلبي بس ، الله يخليك ياباشا مش  كل شوية تبرئلي ، أكدب علي معاليك يعني ، ولا أفطنك ..
-شوف جنابك هيه العين الحمرا ، بئا حد يصدق اربع سنين  عيضة وطبطبة  يجيي شوية دقون عرر يمرجحوا فينا  لما بئينا مسخرة ، يا باشا عليك  بالأحكام عسكرية بسرعة وخلص ، دي بلد مش مكرفون ف مولد ، جندنا معاك يا باشا

- لا  ياباشا ،ماهو أنا مش راجعة، أنا ورجالتي هاننصب السوق وها نفضل هنا جنب التوكتوك ، ولاد الحرام كتير
 
-  لا أبدا ، نوسة تتعب شوية ، تتكعبل شويتين لكن عمرى ماطاطي أبدا ، فلاحة  بنت فلاحة ظهري جامد ،امال ايه ..
- ربنا يعزك ،لا ياباشا مش عاوزة  أي حاجة ،أنا بس  نفسي  أعيش عيشة حلوة ومطمنة
-الله هو مافيش عندكو  غير العمرة والحج، طب ما ترصفوا لنا طريق ولاّ اعملوا لنا  مدرسة ولاّ مستشفى عدلة ، ولاّ شوفا البلاعات ولا  العيال الضايعة في الشوارع  ، دي البلد شرقانة  ، تعرف معاليك  بحلم بأية كل ليلة ، سرحت نوسة شوية : نفسي أمشي مرة  قبل ما موت ف شارع نضيف مزروع شجر ملون ونجيلة طرية  زي  بلاد بره ، أقولك لمعاليك  اعملنا سيما ،والنبي  يا باشا اعملنا سيما ولاّ مسرح ، نفسي أوى أدخل مسرح ، يا لهوي  يا باشا دا ناقصنا حاجات كتير أوي  ، دا أنا حاسة إننا ف بلد مهجورة ولاّ يمكن  مسروقة..
*همت نوسة وحطت ايدها ف ايده : ايدك  يا باشا ، وشبكة العشرة دول ، ولا يهمك ، وراك جدعان  وها تبقى فلة ..
- بينا يباشا ،  اتكل على الله واطلع بالتوك توك دوغري ، أنا حافظة السكة وعيني مفنجلة أهو ، بس  إيه ..اللي ها يقف  ويتصدر ف الطريق مالوش غير الفرم ...اتفقنا ..؟ سمعني اتفقنا والنبي ..
- ماشي يا باشا مش ها أزأز لب ..
- باشا تأزأز لب ..!