مينا ملاك عازر
هي حيرة ما بعدها حيرة أن تكتب عشية عيد ثورة يناير، وأنت بحاجة لأن تقرر بين نفسك قبل أن تعلن عن موقفك مما حدث بمصر، هل كان ثورة أم أحداث؟ يعني إنت سايب كل الأيام اللي فاتت وجاي تقرر الآن عشية الاحتفال بعيد الثورة كما تعتبرها الدولة، هل أنت توافق الموقف الرسمي للدولة، وبحسب الدستور، وتعتبرها ثورة ولا لأ، رد عليَّ

لا هي أحداث، حمادة هلال نفسه قال كده، لما غنى وقال إن شهداء يناير ماتوا في أحداث يناير، ويعني هو هلال ده بيفهم أكتر منك، لأ بس كل الناس وقتها كانوا موافقين على اللي قاله، حتى النشطاء الثوريين وقتها في عز إللي كانوا بيعملوه كانوا شايفينها أحداث، لأ بس البلد شايفاها ثورة، وأهل شهدائها شايفينها ثورة، والرئيس كان عايز يعمل قانون لتجريم إهانتها.

ألا بالحق، الرئيس ما عملشي القانون ليه؟ عشان ما يزعلشي أحمد موسى، لا ما أظنش، يمكن علشان هو مش شايفها ثورة، يا عم أهدأ، إنت حاتحط الرئيس في مواقف بايخة ليه؟ كل هذا أنا بأفكر عزيزي القارئ مع نفسي، بأكلم نفسي، ثورة يناير خلتني أكلم نفسي، عشان عايز أعرف هي ثورة ولا لأ، طب ما انت أهوه قلت ثورة يناير في السطر إللي فات، لا بس أنا بأقول كده وأنا مش مرتاح، دي يمكن تكون كانت مؤامرة كمان، مؤامرة خارجية، طب ما تمشيها ثورة وركبها الإخوان فبقت مؤامرة، ممكن مافيش مانع.

بس لو سلمت بمنطقك ده، ما تبقاش مؤامرة، تبقى ثورة فشلت، طب بنحتفل بيها ليه وهي فاشلة وإتخطفت؟ عشان إتصححت في ثورة الثلاثين من يونيو، يبقى نحتفل بثورة يونيو بس، لأ يا سيدي، ما إحنا بنحتفل بثورة يوليو للآن

رغم إن الرئيس السادات قام بثورة تصحيح لها، يمكن ما بنحتفلشي بثورة التصحيح خالص، يا خوفي من إننا ننسى نحتفل بثورة الثلاثين من يونيو، ونبقى نحتفل بثورة يناير، ونبقى في حيرتنا دي للأبد، لا ما أظنش، لإن تصحيح صورة يناير إللي حصل في يونيو نجم عنه نظام جديد ودستور جديد ورئيس جديد، طب ما ثورة مايو ثورة التصحيح بتاعة السادات نجم عنها دستور جديد ونظام جديد، ورئيس منفرد بالسلطة هو السادات، بس التانية كانت ثورة قام بها الرئيس السادات

وليست شعبية كما جرى في يونيو لكن ثورة السادات التصحيحية أيدها الشعب، طب إنت عايز إيه؟ خللي موضوع ثورة التصحيح لوقته، وخلي موضوع ثورة يونيو في وقته، خلينا دلوقتي هي ثورة ولا أحداث؟ هي إيه؟ ثورة يناير آديك قلت إنها ثورة، خلاص نخليها ثورة، ولو حد زعل منا نبقى نقول له هي ثورة لكن فشلت وتكريماً منا للشهداء نكرمها، ونحتفل بها للآن.

المختصر المفيد تحية لشهداء ثورة استشهدوا لأجل مصر وليس لأجل أي شيء تاني