مينا ملاك عازر
وسط موجة الغلاء الطاحن، والرئيس السيسي يبحث عما يُرضي الشعب ويحسن من اقتصاد الفرد والبلد، يبحث السيد خالد حنفي وزير التموين المصري عن حظوة لدى الرئيس، ورضاه عنه، طب تيجي إزاي الحكاية دي؟ تيجي إزاي يا خلود؟ آه نسود عيشة الشعب وننيلها أكتر، ولو حد إتكلم نقوللهم ده السيسي عايز كده، وهما بيبلعوا له الظلط، ونبقى كده في عين الريس بنوفر وبنحب البلد وبنحبه، مش فاهم خلود إنه لما يخنق الناس ساعتها ستتقلص معزة السيسي، وفي يوم يطقوا من جنابهم، ما هو مش معقول إنه يبقى الحد الأدنى للمنتفعين من التموين العظيم بتاعه لا يزد عن مرتب 1500 جنيه مصري والمعاش 1200 جنيه مصري.

يا خلود يا حبيبي، مش معنى إنك بقيت وزير والمواد التموينية بتيجي لغاية عندك في البيت إنك تنسى أهلك وناسك، وتنسى احتياجاتهم، يا عزيزي خالد يجب أن تراعي الناس إللي زادت عليهم اسعار المواصلات، بسبب ارتفاع أسعار الوقود إللي بالمناسبة رخص عالميا جامد بسبب نزول سعر برميل البترول لأقل من نصف ثمنه إبان رفع سعره في مصر، ولم ينزل عندنا سعر الوقود، يا سيد خالد إنت يبدو إنك نسيت إن الشعب تحمل انقطاع الكهرباء وارتفاع سعرها غير المبرر أبداً، وتحمل صفاقة موظفي وزارتك من المشتغلين بمكاتب التموين، وهما بيعملوا له البطاقات، وتحمل سوء تنظيم وزارتك لتجديد البطاقات، وتيجي حضرتك بعد ده كله تلغي البطاقة، ده بقليله ما خرجت من المكتب مصحوبا باللعنات إللي حاتنهال عليك.

هو إيه حكاية الاستسهال بتاعكم، هو إنتم مش بتتشطروا غير على الشعب الغلبان، محدود الدخل، معدوم القدرة، ما بتحاولوش تاخدوا من رجال الأعمال إللي بياكلوها والعة من الغاز إللي ببلاش، إللي بيشغل مصانعهم، والكهرباء إللي بلاش إللي برضه بتشغل شركاتهم،واللي واضعين ايديهم علي اراضي بالمليارات، وتسيبوا كل دول وتيجوا على الغلبان، فكرك ده يفرح السيسي، كان ساب صاحبك بتاع المترو يغلي تذاكر المترو، لكن لإنه عارف إن كل شيء بالعقل وبحدود، وطلع رئيس الوزراء الباشمهندس إبراهيم محلب، ونفى النية لرفع تذاكر المترو، ومنع أحد أعضاء حكومته من ارتكاب أكبر حماقة كانت ستؤدي به وبالحكومة.

يا وزراء مصر تريثوا وترووا قبلما تصدروا تصريحاتكم، مش معقولة يفضل رئيسكم يلم وراءكم أخطاء وكوارث تؤدي لاستفزاز الناس، يعني لما فئة المستفيدة من التموين والتي معاشها يصل ل1200 جنيه مصري تتشال من التموين، هما بقى المفروض يجيبوا أكلهم وشربهم ولبسهم ودواءهم ويتنقلوا ويدفعوا كهربتهم وغازهم بالمبلغ ده، طب لو عملتها إنت يا خالد يا حنفي، يبقى حلال عليك، تبقى في منصبك ده طول عمرك، أتحداك أن تستطيع أن تفعل كل هذا، ولو بألفي جنيه، مش حاقول لك بألف ومئتين، ولا بألف وخمسمائة كما تريد إنت، عايز موظف مرتبه ألف وخمسمائة جنيه ياكل ويشرب ويلبس هو وأسرته ويدخل عياله المدارس وينتقلوا ويتفرجوا على تليفزيون ويجيب دواء للعيال بألف وخمسمئة جنيه، ما كانشي حد غلب يا سيادة الوزير، ما كناش احتجنا وزارتك وموظفيها إللي بالمناسبة مؤرفين.

قبل الختام، عايز أفكرك بحاجة إنت قلت إنك في يناير حاتسلم الجميع بطاقاتهم الذكية الجديدة لكل من قدموا على بطاقات، ويناير قرب على نهايته ولم يروا شيء، وفيه ناس لهم سنوات لم يحصلوا عليها، واضح إن موظفينك بيقدروك أوي، وبيعملوا لك ألف حساب، وإنك مسيطر في وزارتك وكلامك ماشي، ولا إنت إللي قريب ماشي؟؟