مايكل دانيال
صموئيل عزت .. هو شاب مصري عادي جداااااااا لكن أفكاره هو و اصحابة مش عادية ..

في الوقت اللي الجبهات السلفية و الاخوان بيدعوا لجهاد مسلح ضد الجيش و الشعب المصري الموالي لجيش بلادة و بيدعوهم بألانقلابيين ، كان هو كمان بيدعوا لحاجة تاني .. ولنوع تاني من الجهاد ..

الجهاد اللي صموئيل و اصحابه عملوه هو مبادرة سموها "عيش" !!

الفكرة انهم مش عاوزين الناس تتكلم عن الدين و الاخلاق لكن عاوزين يعيشوا الكلام ده بجد ، علشان كده بدأوا بصفحة علي موقع التواصل الاجتماعي فيس بوك بنفس اسم المبادرة و هو "عيش" ، و حددوا فيها مجموعه من المباديء اللي عاوزين الناس كلها تطبقها في حياتها زي مثلا (و ده نقلا عن صفحتهم الرسمية) : " أعمالك هي التي تبقي ، هي التي تشهد عليك ، هي سمعتك و صورتك الخارجية و ليس (نيتك) ، لذا احرص علي ترجمه تلك النية بأعمال صالحة" .

مش بس كده لكن كمان كان ليهم جولات حقيقية علي ارض الواقع بحسب ما قالت "مريم نبيل" و هي أحد الاعضاء البارزين في تلك المباردة .. زاروا "مستشفي سرطان الاطفال 57357" و كمان سافروا اسيوط و زاروا ملجأ "ليليان تراشر" هناك ، و لسه فيه جولات تاني كتير في القاهرة و المحافظات مقرر ليهم انهم يعملوها لنشر افكارهم و مبادئهم و مش بس كده لكن كمان يعلموها للأطفال للمساهمة في خلق جيل جديد واعي .

علي فكرة الشباب دول سنهم من 24 لحد 30 سنة ، يعني لسه صغيرين و كلهم مؤهلات و افكار و توجهات مختلفة ، لكن جمع ما بينهم حاجة واحدة و بس و هي "حُب البلد دي" .

و ده الفرق بين اللي عاوز يخرب او عاوز يبني ، اللي بيحب مصر بجد و اللي بيقول كلام و بيعمل عكس كلامه ، اللي بيدعوا للجهاد ضد بلادة و اللي بيدعوا الناس علشان يعرفوا معني الأخلاق و يعيشوها و تكون هدف ليهم انهم ينشروها علي اوسع نطاق .

ممكن يكون كلامي عنهم خلص .. لكن اعمالهم الحلوة الهادفة لسه ما خلصتش .

ياريت كلنا نقف جنبهم .. مش لازم نكون اعضاء معاهم لكن علي الاقل نتعلم منهم حاجة حلوة و هي اننا نشتغل بجد لخير بلادنا و اننا ننشر مباديء الحب ، الخير و السلام حوالينا في كل مكان ، صدقوني ها تفرق كتير .