د. ماري بديع 
شوف يا عزيزي هى مغامره
هتعديها لو ركزت
عارف الجندى  جوه مناوره
زيك زية و اهو دة ال test

البس خوذه امن نفسك
و ابعد عن مترو الانفاق
البس كوتشى تقل لبسك
قالوا فية رعود ف الانباء

طبعا عارف ان المطرة
ف دقيقتين راح تبقا اكوام
كله يكربس ما احلى العطله
عطسة ف عطسة هتبقا زكام

طب و المترو مالة يا سيدى؟؟؟؟؟؟؟

اواعاك تركبة سيبك منه
فى كل محطه محطوط كيس
تلقى الكل بيبعد عنه
و يحاوطوا لك  بالمتاريس

هى دقيقه و تانية و هوباا
تبدا حفلة من الهايصيين
ما هو كان فية قنبلة و اتعبا
امال فاكر مليان تين؟؟؟

يبقا خلاص و مفيش غيرة
اول توك توك هركب فية
امن جدااا كتر خيرة
على مشاويرى و هروح بيه

بصراحه يعنى قلبك طيب
لا و النية يا عينى تمام
اهلك هيبلغوا متغيب
هيلفوا ف معاشات يا حرام

قبل ما تركبة خد عوامة
و طبعا اى دروس ف العوم
او لو حظك ميح يا ندامة
هنلقاك تحضن شجرة دوم

هو انت فاكر ان ده نافع؟
دة اخرة يعنى كرسى صالون
و سايقة عيل بايع ضايع
مرفود من مصنع كارتون

طب انا شغلى هروحة ازاى
و لا نافع مشى و لا ركوب
مديرى هيقولى باى باى
و انا اسمى ف غياب مكتوب

شوف بصراحة صعبت عليا
خدها نصيحة من قلبى ليك
غمض عينك سيبها عليا
سيب لى نفسك و هوريك

روح هات ورقة و اكتب فيها
انا مصرى و بفخر بعيش
و الدنيا القاسية هوريها
اية يعنى مقضيها قراقيش؟

برضة هعافر راضى بحالى
هغلبها قريب دة اكيد
لو مت هسيبهالكوا بدالى
هتحلوها ..وهيبقا عيد