English
بقلم - هند مختار
حقيقي حقيقي والله العظيم تلاتة وحياة النبي نفسي أعرف الرجالة عايزين إيه بجد ، أنا غلبت وتعبت وطلع عيني في محاولة فهم هما عايزين إيه؟
تقعد مع الواحد من دول تلاقيه ضارب البوز المتين وحواجبة معقودين ودخان الشيشة وللا السيجارة كأنه دخان حريقة وماسكة في كومة قش تسأله مالك يرد وهو مكلضم مافيش مره في التانية يقول أصلي متخانق مع مراتي
طيب وإيه الجديد ما كل الرجالة والستات بيتخانقوا مع بعض ليه الشبورة اللي أنت عاملها دي ؟
أصل أنت ماتعرفيش حاجة دي غبية ونكدية ،ومش فهماني ، أنا عارف بس ليه اتجوزتها ؟
إلا هو أنت اتجوزتها ليه؟
هايكون ليه يعني بصي يا ستي أنا كنت أعرف قبل منها واحدة كده زي حضرتك مطرقعة ومجنونة ،و كنا بنحب بعض جدا بس العلاقة ما كملتش أنا بصراحة قلقت منها أصحابها رجالة وبتخرج وبتسافر
وبتسهر هي صحيح ماكانتش بتخبي حاجة وكله قدام الناس بس ماكنتش هاعرف أعيش معاها سبتها بقه واتجوزت بقه الست اللي معايا هادية كده ومطيعة وكانت قطة مغمضة ،عارفه كده حاجة عاملة زي الست امينة ما كان ما تحطيها تتحط ،بس عارفة أنا ندمان قوي هي كويسة وكل حاجة فيها تمام بس مش حاسسها ولا حساني ، مالهاش في
واتخانقتوا ليه؟
أصلي قعدت تلت أيام بره البيت رحت إسكندرية أغير جو وقفلت التليفون وماعرفتش حد أنا فين أروح ألاقيها عاملة محضر في القسم إني مخطوف وإنها مش عارفة تلاقيني غبية وللا مش غبية ؟
أنا سبته ومشيت بدل ما أروح فيه في ستين داهية
